2 WAKORINTO 6 - Bibilia Kui Mdedie fo Kimochi

¹ Indi ili lukeri wa kyando-ki nyi lomututuma, ma mulawone mochiambya wutonga wo Ruwa kya wulya.

² Kyamba ahambye, Nyi kiheri kichihianyi ngamekuadanya, nyi mkonu fo okiio ngawekuekanya; ambuya wulalu kiheri kichihianyi na kamu kiipfo, ambuya wulalu mkonu fo okiio fuipfo.

³ Kyamba kii kido lulaenenge mndu tewe lyepfuluko kundu wupfuṟukanyi-wu wulawone wochiisalucho.

⁴ Kya indi kya orio kindo kyose lukuloṟa wapfuṟukanyi wa Ruwa ili lokutirisia sa kafo, kiwe lui shiwirenyi kiwe lui mawinenyi kiwe lui wakoṟome mkoṟomu.

⁵ Kiwe luikapo, kiwe luipfungo, kiwe lui maponganonyi, kiwe lui shifotsyonyi, kiwe lulaa dembo kiwe lukuotoya.

⁶ Luiho lukeri na wusalari na wutiichi na wuleeli na wuwongoya luwodo nyi Mumuyo Mwele na mkundie fulakulembetseṟye.

⁷ Lukaukerye na dedo lya wulohi, lutsindye-ho kui pfinya ya Ruwa. Lochikuringa na shisha sha wuhoṟotsu shii sha ora lo pfumu na lo ngao.

⁸ Lokuidya hando lowikyo kiṟumi na hando lohenda isutso, kundo luiselio mnyeri na kudu lohenda iichiko, lotano walembi na luende kilya kii lohi.

⁹ Luiho cha ili lulaichyo na lumanyikye na kamu, cha ili lui wepfa ate lui na moo, cha wehoṟuo indi walechiwoho.

¹⁰ Lui cha ili lui-walise wukiwa indi luwode nyi sia mkonu yose, lui-ho cha wakiwa indi lichisuṟisha weengi, lui cha walawode ma kindo na lui wenyishose.

¹¹ Lanye Wakorinto, dumbu lyadu limpfungukye mnu, ngoo yadu ii njichunguṟuo.

¹² Mui-wapeṟehetsye-ho handopfo, indi ipfo ngonyi tsanu mpfondo kupeṟehekye.

¹³ Ngadeda nanyo mui wana wako ke mutae kimu na kimu mochichunguruo nanyo ngoo tsanu.

Wuikimbi kya shindo sha walaichi Ruwa

¹⁴ Mulawone mochisangana kyandonyi kimu na walaidikye, kyamba wusumhanyi na wukika nyi hanga shidikyana? Ang'u nyi ki kyechilunga sa na meema?

¹⁵ Na mlingana mki fo Kristo na Beliali? Ang'u msa aidikye ai na ohawi luki na msa alaidikye?

¹⁶ Na maidikyano m maki ha hekalu lya Ruwa na mfano ya maruwa ha wongo? Kyamba so lui hekalu lya Ruwa menyi moo; chando Ruwa ahambye, ke ipfo kowo njechitana kanyi koko njehendekyaho, inyi njechiwawiia Ruwa owo nawo wechinjiwiia mkambo foko.

¹⁷ Nkyo kimwitike muwuke ipfo kiidi kyawo mulekane nawo, lyo nyilyo Mndumii ahambye. Na kindo kifanyi ngafu ma mulakuwashe nakyo; na inyi njechimuambya koko.

¹⁸ E-wo njechimbiia Wande nanyo mochinjiwiia wana wako wa nguo ii na ii. Lyo nyilyo Mndumii ahambe ai menyi-pfinya tsose.