2 WAKORINTO 5 - Bibilia Kui Mdedie fo Kimochi

¹ Kyamba luichi ke mba ya tengo lyadu lya wanda ii ikasanjo luwode wiko liwukye ko Ruwa, mba ilanjiwike na mawoko ii ya mlungana ipfo ruwehu.

² Kyamba nakyo kyatewa luisumukya ili lueṟeṟukye iṟiko ṟao lingi nyilyo kikaya kyadu kiwukye ruwehu.

³ Kombona lomeṟiko lulechikiwoneka-se li kitaṟe.

⁴ Kyamba naso ilindi lukeri kunu tengonyi ili nyi lusumukya luiwalemye, cha kipfa lulakunda iheda yatuo kya indi likunda ishikyo ṟao lingi kundu kilya kii kyepfa kihende imeṟo nyi kilya kii mo.

⁵ Na ichu aluteseheṟye iki iki nyio Ruwa amelusumba Mumuyo chu aluwiia mriteke.

⁶ Nkyo kitewe lukarya hando hose na imanya ke mandi lui na mbihu fu kikaya kyadu lukeri aleshe na kanyi ka Mndumii.

⁷ Kyamba kiluhendeshye nyi wuidiki chi iwonapfo.

⁸ Indi lukarya na ikundya kya ngoseṟa isama mbihunyi fu na isamya ko Mndumii.

⁹ Nkyo kimaduma imchihiṟa o ma lui na kikaya ma lulai na kikaya lyo lulikutanya kiṟumi.

¹⁰ Kyamba so lose pyu nyi kiluwaṟi ihoṟotso na pata ipfo mengenyi injidose nyi Kristo kundu orio mndu ose naambye kiheo kyake chando awetana kui mbihu shiwe nyi shicha a shiwe nyi shiwicho.

¹¹ Kyasia ili luichi wowu wo yowuo Mndumii nyi lokeisima wandu indi Ruwa nyio luimtambahalukya na kamu; indi njikusihye ke nyi lutambahalukye na konu mrimenyi ipfo kundo ngo tsa mrimenyi tsi njiilikishe.

¹² Lulawuya ikumanyisha luwenyi ipfo konu, kya indi nyi lomnenga mweke fokuṟumisha kyadu so kundumuwute-ho ikukaya nafo sumuhana na walya wekekushela na kiṟumi kya oshangu tupu kiladoye ngoonyi.

¹³ Kyamba kiwe luleṟango nyi kya Ruwa kiwe luisango mhie nyi kipfa kyanu.

¹⁴ Kyamba kilya kilusanza lomba kimu nyi makunda ha Kristo hakaluinenga ihamba iki, ke kwipfo ichu umu alepfia wose; mpfo kundo wamepfa wose.

¹⁵ Nao nyi alepfia wose kundu iwo wai na moo walawone wechikukaya na moo kipfa kyawo wawenyi, kya indi wawe wechikaya nafo ichu alewapfia kashika iṟutso.

¹⁶ Nkyo kyanenga wokia wulalu lukiichi mndu kui nyama tsake ma kawa upfo. Ma kikawa so luweichi Kristo kui nyama tsake, kya indi wulalu lulakimwichise ludi.

¹⁷ Nkyo kyaenenga kokoya mndu ai Kristo-hu nyi amba mbika njihya; sha kacha shamesia, ate shose shamhenda ilawuka.

¹⁸ Indi ishi shose shiwukye ko Ruwa ichu alusanzye so nao amonyi kui Kristo nao aluinengye wupfuṟukanyi wo kisanza-ki.

¹⁹ Nyi kipfa Ruwa awei na Kristo kechisanza wuyana nao amonyi, nalawaitaya kisanza ki.

²⁰ Nkyo kyaenenga so lui wasu waende ndumi ya Kristo, na Ruwa nyi aimututuma ipfo kundu luideda, lomuterewa lui-wadume nyi Kristo, ke kundenyi isanzo na Ruwa.

²¹ Ichu alaweichi wunyamaṟi nyio alemtana wunyamaṟi kimaduma kyadu so, kundu so luwe wenyi-wuhoṟotsu wo Ruwa lui mbihu-hu foke.