2 WAKORINTO 4 - Bibilia Kui Mdedie fo Kimochi

¹ Nkyo kyainenga ili lui na wupfuṟukanyi wu kui isaṟia lilya nyi lokewuya numapfo.

² Kya indi lulehye sha kiṟikenyi shepfia sonu; manya lulahendekye lui na ngeṟo, manya lulalongya idedo lya Ruwa kindo kii wongo, kya indi lokekumanyishya luwenyi ngo tsilya tsii mrimenyi tsa wandu lochihamba a pata kilya kii lohi lui oshanguny lo Ruwa.

³ Indi kokoya na ndumi iya yadu ya sia ya okiio kokoya i-njishikye, na ipfo ko iwo wehenda deka.

⁴ Nawo nyiwo Ruwa lya kiwulalu ki lilewaha mhie ya walaidiki wo, ngeela ya ndumi ya sia ya wuitoṟi wo Kristo ilahende iwalimika. Nao nyi awake Ruwa.

⁵ Kyamba lulakeri ikuhamba so luwenyi, kya indi nyi luihamba Kristo Yesu mndumii, naso luwenyi lui masinga hemsingya nyo kimaduma kya Yesu.

⁶ Kipfa nyio Ruwa ahambye kuwe sa iwae iwuka meemenyi nao alewaa ipfo ngoonyi tsadu kuwukye-ho ngeela yemanyisha wuitoṟi wo Ruwa wukeri oshangunyi lo Kristo.

⁷ Indi lurie kisa ki shihienyi shii-shiwumbe na wumba kundu pfinya ii iingiki idi imanyike ke nyi ikeri ya Ruwa, ilahambo ke nyi kodu so iwukie.

⁸ Njora tsose nyi lui wafiṟite kya indi luifihiṟa; lipfio n mdo kya indi lulawuta-ho mdo.

⁹ Loterengyo kya indi luladeo luwenyi; lukumbo wanda kya indi luladumbuka.

¹⁰ Handu hose lurie opfu lo Yesu mbihu-hu fodu kundu moo fo Yesu nafo fuhende iwono mbihu-hu fodu.

¹¹ Kyamba so moo fu lurie lodambiko nafo opfunyi mkonu yose kyepfia Yesu kundu moo fo Yesu nafo fuhende iwono mbihu-hu fodu fui mopfa.

¹² Nkyo kyanenga kilya kikuwodye naso kyeṟunda-ho nyi opfu, indi kikuwodye nanyo kyeṟunda-ho nyi mo.

¹³ Indi ili luwode mumuyo na fulya fo wuidiki wulya wu-wuṟehye wuwehambye; njiidikye nakyo kimaduma ngadeda, naso nyi luidikye ludi likaenenga luideda.

¹⁴ Nyi luichi ke o ichu aṟutsye Mndumii Yesu echiluṟutsa naso lui kimu na Yesu na iluhoṟotsa-ho handu hamu nanyo.

¹⁵ Kyamba ishi shose nyi shitanyika kipfa kyanu, kundu wutonga wu wufeṟikye wafoi wadi wuwe wofeṟa mwaano fohamba mng'ano fo Ruwa.

¹⁶ Nkyo kyaenenga lulahenda ilemo, kya indi kokoya na mbika yadu iwono yahenda inyamaṟika, indi iya ilawono yo yahenda ilawuka mkonu na mkonu.

¹⁷ Kyamba iṟiyo lyo lyangu lya wukiwa wodu lyekaa oweṟe lo kidempfu, lyo lyalutanya wuitoṟi wo mlungana wuwode onu luiwonyo mwengeṟia na mwengeṟia.

¹⁸ Natso nyiso lularinga shilya shiwona indi shilya shilawono. Kyamba shilya shiwono sho shiipfo sha kiwulalu kya indi shiilya shilawono sho nyi sha mulungana.