2 WAKORINTO 2 - Bibilia Kui Mdedie fo Kimochi

¹ Kya indi njiledumbuo, ke njilakiche-se lingi na konu njimwendie fowa.

² Kyamba kokoya inyi ngamuinenga fowa nyo; nyi o ku echinjiwihiṟya moo inyi shile nyi walya walya njilewainga pfo?

³ Nakyo kilenjinenga ngamṟehya kilya kilya kundu njilashikye imwendie fowa munjiendie fowa nyo muwesumhanyi ilyendie sia. Njikusirie nanyo mose ke sia yako nayo yanu mose da.

⁴ Kyamba mandi njilemṟehya njiweimrohie na ifoyo mrimenyi njechitonyitsa mchenyeṟe ifoi chi ke nyi kundu muwado nyi fowa-pfo indi nyi kundu muwute-ho imanya chando ikunda lyako ling'anyi konu.

Mhoṟie

⁵ Indi kokoya kuweipfo awewawiṟye mndu chio inyi alenjiwawiṟapfo chila nyo awembawiṟye mose, hamba kyenga kyanu, kundu njilawongishe ideda.

⁶ Nahong'u ili ulya ulya amhenda idedyo kyumu n nyo wafoi limshikye.

⁷ Nanga-nanga muwuye imhoṟya na imbihiṟya moo, kundu mndu chu ili amba adi nalawone echifoyo nyi iwawiṟa lya ngoseṟa limhoya njia ii ang'u ii.

⁸ Nkyo kimaduma ngamtutuma mumdumbuye kyemloṟa ikunda.

⁹ Kyamba njileṟehya na kipfa kya iki da kundu njiwute-ho imanya onu lonu kokoya muwei weidikya kya shindo shose.

¹⁰ Indi ipfo kundo nyo mohoṟya mndu na inyi na mbeho; kyamba nyo ohoṟya mndu na inyi na mbeho; yamba nao inyi kilya ngamehoṟya kokoya kuwode kilekunda ihoṟyo nyi inyi, nyi njilemkihoṟya kimaduma kyanu njii odatsinyi lo Kristo.

¹¹ Kundu lulashike itambyo nyi Satana; kyamba luichi necha mahio hake.

¹² Kyasia njekishika Troa keongwo ndumi ya sia ya okiio, na mongo fukanjiṟuhukya-ho kui Mndumii.

¹³ Indi njilewona sia mrimenyi fokopfo cha kipfa ndalewona Tito monowama oko, indi ndesamana nawo ngakure ihenda Makedonyia.

¹⁴ Indi Ruwa nakae echiwikyo mwaano ili ailuenenga iwinza lyi lya kui Kristo kitsitsi echipfamiṟa orio kundu kose mtambahalukye foke ai naso.

¹⁵ Kipfa so lowiia Ruwa mpfaamo fo Kristo fuchee iwo wehenda ikiṟo na iwo wehenda ideka.

¹⁶ Kya iwo wamu m mpfaamo fo opfu fuwaendie opfu, kya iwo wengi mpfamo fo moo fuwaendie moo. A nyiwu asumuhanyi ipfuṟukanya shindo shi ngesa?

¹⁷ Kyamba so lulai cha wengi wafoi wekehaluo dedo lya Ruwa kindo kyekapa mbucha, kya indi luideda kui wulalutsu shiwukye ko Ruwa lukeri Kristo hu odatsinyi lo Ruwa.