2 WAKORINTO 13 - Bibilia Kui Mdedie fo Kimochi

¹ Ili nyi lya kaṟaṟu ngacha na konu. Orio kindo kyechikapo owanzo kui madumbu ha waṟingishi wawi ang'u waṟaṟu.

² Mandi njiwei konu lya kawi njilemsonguo iikimba, na wulalu ili nji kuleshe nanyo ngawuya-se iikimba walya wawutie wunyamaṟi kacha na wengi wose ke ngacha-se lingi njilechiwika mwidyo.

³ Kipfa nyi muitika ihesha Kristo chu aimsanze na inyi echideda, nao sa alamuwiia nyo mfafa kya indi amukerye nyo menyi-pfinya.

⁴ Kyamba ma kikawa alewambyo msalabe-hu arie wufafa kya indi ai-ho na moo arie pfinya ya Ruwa. Natso na luifafaa lukuwodye nao, kya indi lochikaa-ho na moo lurianyi nao kui pfinya ya Ruwa yekuloṟa nanyo.

⁵ Kuheshenyi nyo muwenyi kokoya mukeri wuidiki-hu, muhendekekutichya muwenyi. Ang'u mulakuichyo muwenyi ke Yesu Kristo akukerye konu? Kilamewa ke mui-wallakia.

⁶ Kya indi njikusirye nawo mochimanya ke so lulai-wallaikia.

⁷ Indi njiterewa Ruwa namringe iwuta kindo kiwicho, chi njikeri imterewa kundu so lumanyike lui wekiapfo kya indi nyi kundu muwe wewuta kilya ki kicha naso luwe cha ili lulawekia.

⁸ Cha kipfa lulaidima iwuta kindo kiṟunduma ya lohi indi kui kitewe kya kiwulohi.

⁹ Kyamba nyi kyaluinenga sia ili so lui wafafa nanyo mukawanga. Na kilya luiterewa kikeri kile, ke muhendesungusika.

¹⁰ Nkyo kimaduma ngaṟehya isho njii kuleshe kundu ili njechikaa-ho ndawone kyenjiitika njiṟunde na wunesi kui kiheo kya pfinya iya njimwenenge nyi Mndumii inteṟye yemuhoṟotsa ilainteṟye yemuhutsa.

¹¹ Kyefurumya, wanawawama, kaenyi-pfo na sia, mukunde iikimbo, muwe mochikumbuo kilya kimu, mukae na ofoṟo, nao Ruwa menyi ikunda na ofoṟo echikaa hamu nanyo.

¹² Muiṟikiṟane ipfo ngombanonyi njele.

¹³ Iwo wai waele, wamuiṟikiṟa wose.

¹⁴ Wutonga wo Mndumii Yesu Kristo na ikunda lya Ruwa na kyando kya Mumuyo Mwele shikae nanyo mose.