2 WAKORINTO 10 - Bibilia Kui Mdedie fo Kimochi

¹ Nao inyi Paulo ili njiimhambe wai ke ipfo oshangunyi njimkerye mmamiri indi ngamuwia ngolohoda ngamshika aleshe, nyi njikuwode na wuhoo na wuwongoya wo Kristo njemtutuma.

² Indi ngaterewa kundu njilawone njechiwa mkahari njii ipfo oshangunyi kui mkusihie fonjinenga ihamba njechiwikya tumbe iwa weluhamba so cha ili luwei wandu wehendekya mbaṟi ya kimbihu.

³ Kyamba ichumia luichumia na mbihu indi lulakapana shida ya mbaṟi ya mbihu.

⁴ Kyamba shisha sha ngapano yadu shilakeri sha kiwandu, kya indi shii-shiwikye pfinya nyi Ruwa yewunduo mṟi mikare lochiwunduo mloshye ya kiwandu.

⁵ Luwewunduo na orio tunja yekuirya wuṟango wo Ruwa, lochilaṟa na mhie yose iwe yechihendelya Kristo.

⁶ Natso lurie mteseheṟye fohoṟuo orio wulemi wose, shika nyo momekutoṟikya wuhendeli wonu.

⁷ Shilya shii ipfo oshangunyi mushitukuye. Kokoya mndu akusirye koke amonyi ke o nyi ai mndu o Kristo, nawekusaṟa adi da ipfo koke amonyi ke chando o ai mndu o Kristo na wudo naso luwei wandu wa Kristo.

⁸ Kyamba kokoya ngaengeṟa ihamba kyeṟumisha wuheki wodu Mndumii aleluinenga wuwe womlunga wulawe womuwunduo njechipfia sonupfo.

⁹ Ndashike iwono cha nyi njikundi imwowesha kui paruo tsako.

¹⁰ Cha kipfa kwipfo wehamba, hoo paruo tsilamye, mnu na yapfinya, indi kiheri aiho o amonyi afafaa adi kui mbihu na mdedye foke nyi fomina.

¹¹ Mndu modeda adi nakuteseheṟye ipfo koke mrimenyi iki, ke mkae iya lui nayo kui madedo ha paruo-hu lulamcha luwenyi nayo nyiyo iwe yadu ya kui mawuto lomcha so luwenyi.

¹² Ma lulakwaamye ikuitala kimu na iwo wekumanyisha wawenyi ma ikulinganyisha nawo; kya indi ipfo kundo wakuheṟa wawenyi na ikulinganyisha wawenyi mpfondo waashye imanya hando wai.

¹³ Indi so lulakunda ikushela na kiṟumi kilawa ihesho, kya indi liwe lyechisumhanya kihesho kya kilya Ruwa alelupfungya kitane kyamelushitsa na ipfo konu.

¹⁴ Kyamba so lulakuengeṟeṟa cha wandu walashika mṟasa konu cha kipfa lulemshika na mṟasa konu lochionguo ndumi ya-sia ya okiio ya Kristo.

¹⁵ Manya lulakushela na kiṟumi kilawa ihesho ili kiwewiko na mweke fo mawina ha wengi indi lukushye ke mwidikye fonu fukang'ana lushike ilandaṟishyo mwaanya ipfo konu fuhianyi na kila kyadu kifeṟikye.

¹⁶ Luwute-ho yongoya ndumi ya sia ya okiio ipfo kundo kukeri kuleshe na konu, lulawone lochikuṟumisha kui kila kii-kipfungye ungi kyekuihetsa na shindo shilemmaa isungusio.

¹⁷ Indi mndu mokuṟumisha nakuṟumishe ai Mndumii-hu.

¹⁸ Kyamba chi ichu akuhamba amonyi awa mtechipfo shila nyi ichu aihambo nyi Mndumii.