2 WAKORINTO 1 - Bibilia Kui Mdedie fo Kimochi

¹ Inyi Paulo njii msu o Kristo Yesu kui kyama kya Ruwa, so na Timoteo manowama loiṟikiṟa siṟi ya Ruwa ikeri ipfo Korinto kimu na waele wakeri orukenyi lo Akaya wose.

² Wutonga wukae nanyo na ofoṟo shiwukye ko Ruwa Nde yadu na Mndumii odu Yesu Kristo.

Mwano ko Ruwa

³ Kuṟumisho Ruwa ai Nde o Mndumii odu Yesu Kristo, nyio Wande moichyo wandu wukiwa nao Ruwa mowawihiṟya moo.

⁴ O ai moluwihiṟya moo shiwirenyi shadu shose luidime ikuwutya-ho iwihiṟya moo walya wai warohie kui kiwihiṟia kilya luikarisho nakyo nyi Ruwa.

⁵ Kipfa chando so luifeṟyo mawawio kya Kristo na wudo kiwihiṟa moo kiilufoya kui Kristo.

⁶ Kya indi ma ili luirohyo ludi nyi kundu limwendye kiwihiṟya moo na okiṟo; ma ili luiwihiṟyo moo so nyi kundu limwendye kiwihiṟa moo kikuhambye kui ikuitirisia marohyo hamu na halya halurohye so.

⁷ Na ili lukusihye kyanu ludi nyi lui-wawanze ipfo kundo luichi ke chando mui wakyando wa marohyo halya na wudo mui wakyando wa kiwihiṟa moo kilya.

⁸ Kyamba le, wanawawama, lulakundi mude mulamanya kya irohyo lilya lileluhoya kulya Asia ke lulelemyo mnu kiidye pfinya tsadu lukashika ihutsa macha ha moo yadu.

⁹ Kya indi so luwenyi luwekuwodye-ho ke nyi lui waanduye wepfa, nakyo kilehenda kido kundu lulakikusirye so luwenyi, indi nyi ko Ruwa ichu, ai moṟutsa wapfu.

¹⁰ Nyio aleluletsa ndenga ya opfu luwicho ludi na iletsa echiletsa. Nyio luwekumsirie ke echiengeṟa ilutetsa.

¹¹ Nanyo nyi mochikaa wetaramana naso mochluterewya kundu shamu sha wandu wafoi shiile kya ngaya iya lulesaṟyo nayo wafeṟe iwika-ho mwaano kimaduma kyadu so.

Kyaṟo kya Paulo kyailachika

¹² Kyamba kiṟumi kyadu kii-kiṟingishye nyi ngo tsa mrima tsadu tsihoṟoki nyi kikeri kii-le, ke nyi luwehendekye iya wuyana kui wutambachu na wuharami wuwukye ko Ruwa, chi luweṟanguo mbari nyi kiwandufo kya indi luwewodo nyi wutonga wo Ruwa, na wandu lulewakaya ludi kya wueṟa nyiwo nyo.

¹³ Kyamba lulamuṟehya idedo lihambie kiwungi shile nyi chando mokelisoma na ilimanya. Inyi njikusihye ke mochilimanya necha nakamu.

¹⁴ Chando mṟasa wulalu mulemlumanya kya kyenga ke nyiso lumkerye nyo kiṟumi, nanyo na wudo mulukerye so ili lya Mkonu fulya pfo Mndumii odu Yesu.

¹⁵ Na mkusihye fu fukannenga mbekundi ilawa icha na konu kundu muwone mboṟa kafoi kawi.

¹⁶ Njiide konu njishike Makedonyia; na kiheri kyewuya wuka Makedonyia njiwuye na konu njishike isamo nyi nyo na itaramo kyaṟo kehenda Yudaya.

¹⁷ Alewo ili mbekusaṟie njido nyi njilaweichi kindo njiwuta? Ang'u isho njikuteseheṟye nyi njikuteseheṟye kui kiwandu, ke njihamba, “Ee” na Ote handu hamu?

¹⁸ Kya indi Ruwa nyio o lohi kanega idedo li luwelimwendie lilaweṟukeweṟuke liwe ee na ote.

¹⁹ Kyamba Mana o Ruwa Kristo Yesu ichu luimhamba konu inyi na Silwano na Timoteo, o alakulongye ee na ote, kya indi nyio ai “Ee” ya Ruwa.

²⁰ Kyamba ipfo koke shasa sha Ruwa chando shifoi shi “Ee.” Nyi wudo nao awikye Amenyi iya, Ruwa nawute-ho iichiko nyiso.

²¹ Kyasia ichu aluwanzye Kristo-hu handu hamu nanyo na ilushimbuo nyio Ruwa.

²² Nao nyio amelutisiṟa luwe masaa hake kaludeya mriteke fo Mumuyo ngoonyi tsadu, kya shindo shose alelusuṟumia.

²³ Kya indi Ruwa nyi mongochi oko naichi mrima foko. Njichase na konupfo, kipfa kya iwasaṟia na iwawikya nyo kitanyo.

²⁴ Chi kii ke luapfinye mwidikye fonupfo, kya indi so lui wakyando wa msiha fonu; kyamba mukuwode mwidikye-hu chumu.