2YOHANE 1 - Bibilia Kui Mdedie fo Kimochi

¹ Inyi mmeku ngakuiṟikiṟa iyo Mai msambuṟe handu hamu na wana wapfo njiwakundi njikukerye na kilya kii-lohi. Ma chi inyi njimonyi tupu njiwakundipfo indi na iwa wose wammanya kiilya kii-lohi.

² Wawakundi kimaduma kya kii-lohi kii naso na ikaa kyechika naso mlungana.

³ Wutonga na osaṟio na ofoṟo shiwukye ko Ruwa Wande shikae naso ipfo kundo kii-lohi na kikunda shikeri.

Wukiilohi na ikunda

⁴ Ngamechihio munu ili wana wapfo maata wechumia mhendekye fohendekya kundo kilya kii-lohi kikeri-ho fusumhanye iwawaso luleliambya lichee ko Wande.

⁵ Na wulalu ngakuterewa lingi, Mai, ke lukundane. Ngakuṟehya iki cha ili nyi iwawaso lihyapfo kyaindi nyi lilya luweliwode wokia mawokyonyi.

⁶ Na mkundye-fu fukeri fuile, luchumie mhendekye fuidikyanyi na mawawaso ha Ruwa. Iwawaso lilya mlelyiicho wokia kacha lii-le, ke luhendeke lui-waitike nyi ikunda.

⁷ Kyamba walembi wafoi waipfo; walechikunda ihamba Yesu Kristo amecha kui nyama. Nyipfo kundo mdetsi aipfo iimakristo.

⁸ Kuṟisenyi-ng'u-wo muwenyi mulawone mohenda idetsa shilya muleshiwinya, kya indi mushike yambya kya wuṟundi wonu welu.

⁹ Orio mndu ailosha wandu nao alawa mokaaa opfundo lo Kristo o awode Ruwapfo. Ichu awa mokaaa opfundo-lu, nyio awode Wande awewode na Mana.

¹⁰ Kokoya mndu echicha konu alarie opfundo-lu mulamwambye kanyi konu, mulambie ma idedo lyemwiṟikiṟa.

¹¹ Kipfa ichu ekyeiṟikiṟa mndu-cho nyi aisangana nao shiṟundyo shilya shake shiwicho.

Lyefurumia

¹² Njiwode shemṟehya shifoi indi njiwekundi ishiende karitasihu kui winopfo, kya indi njikusirye njishike konu ludede dumbu ku dumbu, kundu sia yadu iwelukye welu.

¹³ Wana wa manomayo mshiki opfo msambuṟe wakuiṟikiṟa.