2WATESALONYIKYE 3 - Bibilia Kui Mdedie fo Kimochi

¹ Luterewienyi ko Ruwa Lyefurumia, wanawawama, keluterewyenyi kundu dedo lya Mndumii lidungane na iambio liweindyo cha ipfo konu.

² Terewenyi-da kundu naso Ruwa naluletse na walembi walya wawicho. Kipfa chi wose waidikye Ndumi-pfo.

³ Mmhendeli nyio Mndumii. Nao echimbanza na imringa kipuo na mbicho ulya.

⁴ Indi luikusiria na Mndumii kya mbonyi tsanu nanyo ke mukeri iwuta shilya lulembawasya na ikaa mokaa mochishiwuta.

⁵ Indi nao Mndumii namhoṟotsie ngoo tsanu kikunda kya Ruwa na ikukarishia luiwainenge nyi Kristo.

Chando kiwaṟi iṟunda

⁶ Natso lombawasya nyo wanawawama, kui rina lya Mndumii Yesu Kristo; ke mlekane na orio manowama awuka kambenyi alaichumia kehendelya opfundo lulya lulemdambikya.

⁷ Kipfa mwichi nyo muwenyi chando kimbari ikuwakisha naso, kyamba so lulewuka kambenyi lyanupfo luwei wadoko-pfo.

⁸ Ma luwekekulia mkate ya nga luweinengo nyi mndupfo, kya indi luwekyekuwinyisha na ikurohya lochiṟunda kio na mfiri kundu lularohye manya umu onu.

⁹ Lulewuta ludo chi cha ili lulawaṟi mulutarame-pfo, kya indi kundu luwe kichano mkuloshie kodu.

¹⁰ Kipfa na kiheri luwei konu nyi lulembawasya iki ke “Kokoya kwipfo mndu alakunda iṟunda, manya nalaenengo kelya.”

¹¹ Kipfa lomwicho ke ipfo konu kwipfo wandu wekyeṟahaṟaha welekyeṟunda kindo kya indi wai welembeṟia iṟunda wekyeweṟutsa mbonyi tsa wandu wengi.

¹² Iwo wai wado nyi lowawawasa na iwatutuma kui Mndumii Yesu Kristo ke waṟunde ṟunda wechikutsia walye kelya kyawo wa wenyi.

¹³ Indi nyo, wanawawama, mulalemo iṟunda mecha.

¹⁴ Indi kokoya kwipfo mndu alaicho idedo lyadu lya paruo ii, mumbikie kichano, mulakulonge nao kundu nawado nyi sonu.

¹⁵ Manya mulambade cha ili m mkituwa, kya indi mumkumbuṟe cha manowama.

Madedo hefurumia

¹⁶ Na Mndumii menyi ofoṟo namuenenge ofoṟo mfiri yose ko orio kindo. Mndumii nakae nanyo mose.

¹⁷ Aiki kiṟikiṟo kya owoko loko inyi Paulo. Nyi wudi njekyeṟehia orio paruo yose. Nyi wudo ngaṟehia.

¹⁸ Wutonga wo Mndumii odu Yesu Kristo wukae nanyo mose.