2WATESALONYIKYE 2 - Bibilia Kui Mdedie fo Kimochi

¹ Lomterewa nyo, wanawawama, kya icha lya Mndumii odu Yesu Kristo na kyadu so ikuwumbya handu hamu nao.

² Kundu mlauko nyi madima a owinyi, mlahataṟo mrimenyi manya kui mumuyo mliwe manya kui dedo liliwe manya kui paruo cha ili injiṟehie nyiso yehamba ke Mkonu fulya fo Mndumii fomafukya.

³ Kulakaeho echimlemba ma kui njia ii ang'u, ii. Kipfa kwipfo kisonguo nalyo nyi iwuka siṟinyi lilya ling'anyi na ulya mbicho menyi wunyamaṟi nawekuloṟa, nyio mana o orumatso.

⁴ Nao nechikaruo orio kyechiichiko nyi wandu ke nyi Ruwa ang'u wandu wekyekiindia. Katana akudamiṟa amonyi ipfo Hekalunyi lya Ruwa echikumanyisha o amonyi ke akeri Ruwa.

⁵ Mulakikumbuo shilya njilembia shose mandi njiwei-se nanyo?

⁶ Na wulalu mwichi kilya kimtewa mlamanye. Mbicho-chu nechicha kiheri kyake akundi.

⁷ Ma kudo; Mbicho-chu aowie naiṟunda wulalu; indi echiwono-pfo, tane icho ambowishie echiwukaho.

⁸ Maindi naho Mbicho-chu echikuloṟa. Indi nao Mndumii Yesu echimrumatsa kui mrufu fo dumbu lyake na imkombetsa kombi kui ngesa ya ikuloṟa lyake.

⁹ Na ikuloṟa lilya lya Mbicho-chu lii liitikye nyi Satana kui pfinya yose na shichano na maṟiho ha wongo.

¹⁰ Na kui mtambo yose ya ifurunja wuhoṟotsu yechilemba iwa wai-wadetse kipfa walalekunda iambia kiilohi kilya wakiṟo.

¹¹ Nkyo kyatewa Ruwa kawawika pfinyenyi odetso loitika wahende idikya kii-wongo kilya.

¹² Kundu wawonyo owingo wose iwo walaleidikya kii-lohi kilya; kya indi wawechihiana na wunyamari wulya.

Mulesambuṟo kundu mukiṟo

¹³ Indi kyalukoya so iana Ruwa kiheri kyose kimaduma kyanu, nyo wanawawama mui wakunde nyi Mndumii, kyamba Ruwa alemsambuṟa nyo wokia mawokyonyi mukiṟo mochiilisho nyi Mumuyo muwe wandu muidikyo kii-lohi kilya.

¹⁴ Nakyo nyi kyo Ruwa lemulahya kui Ndumi yadu ya Sia ya okiio, kundu muhendeduo wuitoṟi wo Mndumii odu yesu Kristo.

¹⁵ Nakyo kimwenenge, wanawawama, muhoṟoke chimu muwekuwada na kiloshio kilya lulemlosha kui mwongoye na kui paruo tsadu.

¹⁶ Nao Mndumii odu Yesu Kristo amonyi na Ruwa Ndeyadu ichu alelukunda na iluenenga kiwihiṟia moo kitsinde mulangana na owedo sa ucha kui wutonga.

¹⁷ Nyio nakarishe ngoo tsanu nawembanza orio kiṟundionyi na idedonyi lyicha lyose.