2WATESALONYIKYE 1 - Bibilia Kui Mdedie fo Kimochi

¹ So Paulo na Silwano na Timoteo loiṟikiṟa siṟi ya ko Watesalonyikye ii-njiwike nyi Ruwa Ndeyadu na o Mndumii Yesu Kristo.

² Wutonga wukae nanyo na ofoṟo luwukye ko Ruwa Wande odu na ko Mndumii Yesu Kristo.

Mwanduye kiheri Kristo echicha

³ Wanawawama, nyi kiluwaṟi iana Ruwa kiheri kyose kipfa kyanu. Na wudo kisumhanyi kipfa kya wuidiki wu wonu wong'ana mnu na kikunda kilya mukundanyi nakyo kikaingiki mnu kya orio mndu onu mose.

⁴ Nakyo kyaenenga so lokuṟumisha kipfa kyanu ipfo siṟinyi tsa Ruwa kya otirisi lonu na wuidiki wo ipfo shiterengyonyi shanu shose na shiwirenyi shilya mulekukarishia kyasho.

⁵ Isho shose shiṟingishie mdumbuye fo Ruwa fui fo wuhoṟotsu na fo lohi fohamba ke nyo musumhanyi iinengo wumangi wo Ruwa iwu muweiwawiṟo kimaduma kyawo.

⁶ Ruwa nechiwuta kya wusumhanyi, ke nawe motaa matuuro walya walemutuura nyo.

⁷ Nawe momwinenga nyo muhende iwihiṟyo moo handu hamu naso matika halya Mndumii Yesu echikuloṟa asoka ruwehu arianyi na wasu wenyi-pfinya.

⁸ Na olewo lo modo fochiaka pala echidehelya walya walehye Ruwa walaweanguya Ndumi ya Sia ya Mndumii odu Yesu madu.

⁹ Wo wechiwonyo kyewahoṟuo kyewaendie mawawiṟo ha mlungana ipfo oshangunyi Mndumii na ipfo wuitoṟinyi wo pfinya yake.

¹⁰ Mkonu echicha nakuwutie-ho ewikio kiṟumi kiwukie ko wandu wake, nawe echiichiko nyi kya walya wake wamwidikye wose. Nanyo na wudo kipfa muleidikia wungochi wodu. Sho shechiwa mkonu fulya fulya.

¹¹ Nakyo nyikyo kimaduma luimterewya kiheri kyose. Kundu Ruwa odu namsumhantsie ndaho ii naweawutsya chila yose ya wucha na iṟunda lya wuidiki kui pfinya.

¹² Kundu rina lya Mndumii odu Yesu likuwutie konu iichiko, nanyo muweichiko lyiwukie koke kisumhanye wutonga wo Ruwa na wo Mndumii Yesu Kristo.