2WAMANGI 9 - Bibilia Kui Mdedie fo Kimochi

Yehu ashimbuyo nawe mangi o Israeli

¹ Elisha kalaha umu o wana wa Waikimbi kambia, “Kuṟeheṟe noduo chupa i ya mafuda owokonyi lopfo nohende Ramoth - Gileadi.

² Koshika pfo oshihe Yehu, mana o Yehoshafati mana o Nimshi, uide napfo nombute kiidi kya wana wa mae umduo mṟasa kiṟihenyi kya kya mba.

³ Kiidima uire chupa iya ya mafuda uiletsie huya mdo foke ochihamba, ‘Mndumii nahamba adi, ngakuletsia mafuda uwe mangi o Israeli. Kiidima uṟuhuo mongo udiche ulatirime.’”

⁴ Kyasia mwikimbi ulya manake kahenda Ramoth-Gileadi.

⁵ Kiheri aleshika, wanene wa shida wawedamie, nao kahamba, “Njimdume idedo kopfo iyo mnene o shida.” Yehu kambesa “Nyiu kiidi kyadu uimbia?” Kahaluo, “Nyi iyo mnene o shida.”

⁶ Kahoṟoka nawo wawawi wakaida na mba, mwikimbi ulya kamletsia mafuda halya mdohu foke, kambia, “Mndumii-Ruwa o Israeli nahamba adi, ‘Ngakuletsia mafuda uwe mangi huya wandu wa Mndumii nawo nyi Israeli.

⁷ Na iyo nochikapa mba ya Ahabu mndumii opfo, kundu njikutaaye kiṟache kya samu ya waṟundi wako wose wa Mndumii, owokonyi lo Yezebeli.

⁸ Kipfa mba yose ya Ahabu yechiarisika, na inyi njiwaha orio msoṟo o mba ya Ahabu, icho mpfunge na alampfunge, kiidi kya Israeli.

⁹ Njechitana mba ya Ahabu, chandu njiletana mba ya Yeroboamu mana o Nebati na mba ya Basha mana o Ahiya.

¹⁰ Na shite shechilya Yezebeli kiwanjenyi kya Yezreeli, ma kochiwoneka momṟika pfo.’” Kaṟuhuo mongo kadicha.

¹¹ Naalyo Yehu kahendia waṟundi wa Mndumii oke. Umu owo kambesa, Ngesa nyi ofoṟo? Nyi kiki kyaende mndu chu nao awodo nyi oṟuṟe? Na mbonyi tsa madedo hake.

¹² Wakahamba, “Nyi wongo, kyasia luwie kilya ahamba.” Kahamba, “Mndumii nahamba adi, Ngakushimbuo na mafuda uwe mangi o Israeli.”

¹³ Wakapfuṟukana owinyi, orio mndu kawuta ṟao lyake, kaṟika huya kitaṟa kya meda, wakakapa iranda wechihamba, “Yehu nyi Mangi.”

Mangi Yoramu o Israeli awoho

¹⁴ Yehu mana o Yehoshafati awei mchuku o Nimshi, kaṟiingia Yoramu. Yoramu na wandu wose wa Israeli wawei Ramothi-Gileadi wechiringa kui makamba kipfa kya Hazaeli Mangi o Shami.

¹⁵ Kyaindi Yoramu amonyi awemewuya kundu nainduṟe matiinga halya alewona kiheri kilya kya shida na Washami kiheri awekapana na Hazaeli mangi o Shami. Yehu kawia wanjama wake, “Kokoya moidikiana na inyi, mndu ose alawuke Ramothi nahende Yezreeli iduo mbonyi tsi.”

¹⁶ Naalyo kadoya igarinyi lyake kahenda Yezreeli. Yoramu awemechiepfo, na Ahazia mangi o Yuda nawehendie imwambuya.

¹⁷ Mringi awei kambenyi lyake huya mnaṟa fo Yezreeli kahamba, “Njiwonyi wandu waicha na igari.” Yoramu kahaluo, “Sambuṟa mndu umu kundu wakarisane nawo, nawawese, kuwode ofoṟo?”

¹⁸ Kyasia ulya kekihenda kakarisana na Yehu kambia, “Mangi nawesa nyi Oforo?” Yehu kahaluo, “Nki ili uiwesa mbonyi tsa ofoṟo? Iyo haluka nooshane na inyi.” Mringi ulya awei huya mnaṟa kahamba, “Mndu ulya nawakoya indi nalawuye.”

¹⁹ Mndu o kawi kadumo, nao nalewewesa Yehu kindo na kilya. Yehu kawemhaluo ado ado, “Nki ili uiwesa mbonyi tsa oforo? Iyo haluka nooshane na inyi.”

²⁰ Na wudo se ulya kahamba, “Mndu ulya nawakooya indi nalawuye.” Kaengeṟa ihamba, “Mrendeshie fu fo igari fui cha nyi Yehu mana o Nimshi kipfa nyi ekerendesha ko iwikia mteeṟa.”

²¹ Kyasia, Yoramu mangi o Israeli kawawasa kechihamba, “Ṟeheṟa Igari.” Nawo wakaṟeheṟa igari lyake. Kiidima mangi o Israeli na Ahazia mangi o Yuda wakahenda orio mndu adoye igari lyake, wakahenda wakakoyana na Yehu. Walemkoya kiidi kya kiwanja kya Nabothi Myezreeli.

²² Kiheri Yoramu alewona Yehu kambesa “Na kya ofoṟo Yehu?” Yehu kamhaluo, “Ofoṟo luhya, kiheri ki kuichuo wameluki, na wasawi wa Yezebeli wafoi.”

²³ Yoramu kahaluo igari lyake kahenda, kunu kechiwia Ahazi, “Iwu nyi wuwaahi Ahazi.”

²⁴ Yehu kaira wuda woke kalasa na mfi alakuruo ko pfinya fukaida makosohu hake fukaṟundukia kya mba fukatocha ngoo nao kapfia ipfo igarinyi lyake mandi naho.

²⁵ Yehu kawia mtarami oke Bidkari, mnying'a fo nufukumbe ipfo mdemenyi fo Nabothi - Myezreeli kipfa kumbuo iyo na inyi lilyandi luwedoye frasi tsadu nduma ya ndee Ahabu, chandu Mndumii-Ruwa alededa madedo harianyi nao.

²⁶ Mndumii-Ruwa nalehamba, “Ko samu yo ya Nabothi na ko samu ya wana wake njileiwona wukowu ngalya nyamu ke njechikutaya kiṟache kiidi kya dema lyo, ko ikyo, duo mnying'a fo Yoramu nofukummbe kiidi kya dema lya Nabothi chandu Mndumii-Ruwa alehamba.”

Mangi Ahazia o Yuda awoho

²⁷ Ahazia mangi o Yuda kekiwona shilya shawutika kadicha wohenda mbenyi ya mdemi, kechiitumo nyi Yehu. Yehu kawawasa wandu wake, “Mbahenyi na icho.” Nawo wakamlasa na mfi akeri igarinyi njia yedo Guri hafui na mṟi fo Ibleamu. Kadichia Megido kapfiapfo.

²⁸ Wanjama wake wakaduo mnying'a foke fui igarinyi lyake na ifuduo Yerusalemu, kaṟiko mṟinyi fo Dawidi kundu wamangi wekeṟiko.

²⁹ Ahazia nalewoka iwada wumangi huya Yuda kiheri kya Yoramu mana o Ahabu maka fo ikumi na limu fo wumangi woke.

Mkamangi Yezebeli awoho

³⁰ Yehu kekishika Yezreeli, Yezebeli awemeshitsio mbonyi ko shilya shiwutikie. Kashia meso hake rangi na njui tsake naawo, kahenda itiṟishenyi kaambuya wandu.

³¹ Kiheri Yehu aweida kichuminyi Yezebeli kahamba, “Nuicha ko ofoṟo iyo Zimri? Iyo okewaha wakung'anyie?”

³² Yehu kaambuya huye kahamba, “Naacho ai ora loko?” Wanjama wawi ang'u waṟaṟu wakaimehya wawuka itiṟishenyi.

³³ Nao Yehu kawawia, “Mkumbenyi wanda.” Wakamkumba wanda samu yake ikatalachikia huya mawanda na frasi. Yehu kaitsa frasi na igari lyake huya mnying'a fulya.

³⁴ Kaida na mba ya wumangi, kalya, kanyo. Kiidima kawawasa ke mnying'a fulya fo mndumka ulya aimsese fuṟiko kipfa nyi mana o waka o Mangi.

³⁵ Naalyo wakahenda kundu wamṟike kyaindi walekoya ho kindo sile nyi kipoṟong'u na mafuo ha mawoko na madende pfo.

³⁶ Kyasia wakacha iwia wadi mangi Yehu mbonyi tsi, nao kahamba, “Nyi wudi Mndumii alededa kui dumbu lya mṟundi oke Elia, Mtishbi, kahamba, ‘Kiidi kya kiwanja kya Yezreeli shite shechilya nyama ya Yezebeli.’

³⁷ Na mnying'a fo Yezebeli fochiwa cha mbosha mademenyi, kiidi kya kiwanja kya Yezreeli, kulechikaapfo mohamba, ‘Ichu nyi Yezebeli.’”