2WAMANGI 8 - Bibilia Kui Mdedie fo Kimochi

Mndu mka Mshunami awuya

¹ Kyasia Elisha nawewie mndu mka ulya alemṟutsia mana oke, kehamba, “Kure, nohende iyo na mba yapfo uhende ukae handu ha wuhenu chandu ochikuidimia ikaa kipfa Mndumii naende njaa, nayo yechikaa kiidi kya oruka maka mfungade.”

² Mndu mka ulya kakure; kawuta chandu mndu ulya o Ruwa alemmbia, kahenda o na wa mba yake kakaa kiidi kya oruka lo Wafilisti maka mfungade.

³ Maka mfungade yekisia mndu mka ulya, kawuya awuka orukenyi lo Wafilisti, kacha ifihiṟia, mangi kipfa kya mba yake na dema lyake.

⁴ Kyasia mangi kadeda na Gehazi mṟundi o mndu o Ruwa kechihamba, “Ngaterewa unjiwie, mbonyi njinene tsose tsilewuto nyi Elisha.”

⁵ Kikawa, kiheri aweongoya mangi chandu aleṟutsa mndu awepfiie, kudi mndu mka ulya aleṟutsio mana, nalefihiṟia mangi kya mba yake na dema lyake. Gehazi kahamba, “Mndumii oko mangi, ichu nyio mndu mka ulya, na ichu nyi mana oke ulya Elisha alemṟutsa.”

⁶ Mangi kawesa mndu mka ulya nao kamwongoya. Kiidima mangi kawawasa mchili kechimbia, “Wihiṟia mka-chu shose awewode, na shilya shilewoneka demehu lyake, wokiya kiheri kilya alehenda kyaṟo itane mkonu fo inu.”

Elisha na mangi Ben-hadadi o Aramu

⁷ Elisha kahenda Dameski, na mangi Ben-hadadi o Shamu naweluo, kawio ke, “Mndu ulya o Ruwa nashika iya.”

⁸ Mangi kawia Hazaeli, “Duo shindo sha nga owokonyi lopfo, uhende iambia mndu ulya o Ruwa uwese Mndumii kui dumbu lyake kochihamba, ‘Ngesa njechichia ndaṟe ii?’”

⁹ Kyasia Hazaeli kahenda imwambia, kaduo shindo sha nga owokonyi loke, sha orio kindo kicha kekewoneka Dameski, shiweshikie mhanda ya ngamia makumi haana (40), kahenda kahoṟoka oshangunyi loke kahamba, “Mana opfo Ben-Hadadi Mangi o Shami, nanjiduma kopfo kehamba, ‘Ngesa njechichia ndaṟe ii?’”

¹⁰ Elisha kambia, “Henda ummbie ke nechichia, kyaindi Mndumii nanjiloṟa ke na napfe kulawode kindo keima.”

¹¹ Kamtuluya meso mṟasa kaṟeenze, na mndu ulya o Ruwa kafihiṟa mchenyeṟe.

¹² Hazaeli kahamba, “Mndumii oko nkili ufihiṟa?” Kahaluo, “Kipfa njiichi mawicho ochiwutia wana wa Israeli, nochikoṟa modo njotiṟiwa tsawo, nochiwaha wanake wawo na oshu, nochipoṟipotsa wana wawo, shikoku na waka wanene nochiwamanyamanya.”

¹³ Hazaeli kahamba, “Kyaindi inyi nyi njii isinga lyapfo, inyi nyiu, njii kite tupu, itane ngawuta kindo king'anyi kido?” Elisha kahaluo, “Mndumii nanjiloṟa ke iyo nochiwa Mangi o Washami.”

¹⁴ Naalyo, “Kanjiwia ke nochichia tupu.”

¹⁵ Mkonu fo kawi kaira isulia lyake kalichoweṟa mṟingenyi, kashikia nalyo mangi kyamu mṟasa kapfa. Kyasia Hazaeli kaitoṟia handu hake.

Mangi Yehoramu o Yuda

¹⁶ Kiidi kya maka fo katanu fo wuitoṟi wo Yoramu mana o Ahabu o Israeli. Yehoshafati ai mangi o Yuda, Yehoramu mana o Yehoshafati mangi o Yuda nalewoka iitoṟia.

¹⁷ Nawewode maka makumi haṟaru na iwi (32) awooka iwada wumangi, kaitoṟia maka nyanya ipfo Yerusalemu.

¹⁸ Kaosha njia tsa wamangi wa Israeli chandu Ahabu alewuta na mba yake, kipfa nawealikie mana o Ahabu, kawuta shiwichuṟie Mndumii.

¹⁹ Kyaindi Mndumii alekunda inyamaṟa Yuda pfo, kipfa kya Dawidi mṟundi oke, chandu awembikie kyasa kechihamba, ke nechimnenga taa, o na oshari loke mkonu yose.

²⁰ Kiheri kya Yehoramu wandu wa Edomu wakalehana na wuitoṟi wo Yuda, wakashimbuo mangi owo.

²¹ Kyasia Yehoramu kahenda mṟasa Zairi na magari hake hose kimu naho. Kakure kio, kakapa Waedomu wawemtengetie o na wachili wa magari, na wandu wakadichilia mahemenyi kowo.

²² Ko ikyo Edomu wakalekana na Yuda mṟasa inu. Maheri naho wandu wa Libna wakawelekana na Yuda.

²³ Mbonyi tsose tsa Yehoramu tsiletsuhaa na shose alewuta, shileṟehiyo kiidi kya kitapu kya Maheri kya wamangi wa Yuda.

²⁴ Yehoramu kakulaya na wandee wake, kaṟiko kimu na wandee wake mṟinyi fo Dawidi na Ahazia mana oke kaitoṟia handu hake.

Mangi Ahazia o Yuda

²⁵ Kiidi kya maka fo ikumi na kawi fo wuitoṟi wo Yoramu mana o Ahabu mangi o Isreli, Ahazia mana o Yehoramu mangi o Yuda nalewoka iitoṟia.

²⁶ Ahazia nawewode maka makumi hawi na iwi awoka iitoṟia, kaitoṟia maka fumu ipfo Yerusalemu. Rina lya mae nyi Athalia mana o waka o Omri mangi o Israeli.

²⁷ Kaweosha njayo tsa mba ya Ahabu, kawuta mawicho oshangunyi lo Mndumii chandu mba ya Ahabu walewuta, kipfa nawei mii o mana o mba ya Ahabu.

²⁸ Wakahendesana kimu na Yoramu mana o Ahabu kundu nakapane na Hazaeli mangi o Shamu, ipfo Ramoth-Gileadi, Washami wakawika Yoramu kifaṟe.

²⁹ Mangi Yoramu kawuya, nainduṟiyo kiidi kya Yezreeli shifaṟe shilewiko nyi Washami ipfo Rama echikapana na Hazaeli Mangi o Washami. Ahazia mana o Yehoramu mangi o Yuda kasoka naambuye Yoramu mana o Ahabu ipfo Yezreeli kipfa naweluo.