2WAMANGI 7 - Bibilia Kui Mdedie fo Kimochi

¹ Elisha kahamba, “Adanyienyi idedo lya Mndumii, Mndumii nahamba adi, ‘Ngama kiheri cha iki, kiheo kya mso mcha kechikumbo ko shekeli, na shiheo shiwi sha shayiri ko shekeli, mongonyi fo Samaria.’”

² Kyasia mchili ulya aweketarama mangi kahaluo mndu ulya o Ruwa kahamba, “Ambuya kokoya Mndumii awechiwika matiṟisha ruwehu, ngesa kindo ki kiwechiidimika?” Kambia, “Ambuya iyo nochiwona na meso hapfo kyaindi ochikilya pfo.”

Mbahanyi ya Waaramu yahenda

³ Kyasia kuwewode wandu wana wawewodo nyi saka, wawei o kichuminyi kya mṟi wakawiana, “Kitewe nyi kiki lokaa iya mṟasa lupfe?

⁴ Lukaahamba, luide na mṟinyi, mṟinyi kuwode njaa naso lochipfiiaho lukakaa iya, lochipfa da. Kyasia luhende isahiya wandu wa mbahanyi wa Washami, wakalusaṟia lukie moo, wakaluwaha lochipfa tupu.”

⁵ Kyasia wakakure kilawo kuwode kimbulyimbulyi, kundu washike handu ha mawokioonyi ha Washami wekekaa, ate kuwode pfo mndu ma umu pfo.

⁶ Kipfa Mndumii alewatewa wakaicho mtiṟi cha fo magari, na mtiṟi fo frasi cha mtiṟi fo mamiingi fo wandu wa mbahanyi wa shida; wakawiana, “Ambuya mangi o Israeli neletaa wamangi wa Wahiti na wamangi wa Misri wache wakapane naso.”

⁷ Ko ikyo wakakure, wakadicha kui mema, wakada mahema hawo na frasi tsawo, na nzoi tsawo, na orio kindo kyawo kikadeo chandu kiwei, wakadicha wechiletsa moo yawo.

⁸ Kyasia wandu walya wa saka wekishika mṟasenyi ora lo kawi, wakaida na ihemenyi limu, wakalya, wakanyo, wakaduo fesa, na sahabu, na maṟao wakahenda ishiṟika wakawuya, wakaida ihemenyi lya kawi, napfo wakaweduo shindo, wakahenda ishiṟika.

⁹ Kiidima wakawiana, “Mbonyi tsi luiṟunda tsitsichapfo, inu nyi mkonu fo mbonyi njicha, na-so lukatsia mṟasa kuke, lochihoyo nyi shindo shiwicho luhende iongoya wandu wa mba ya mangi.”

¹⁰ Kyasia wakahenda, wakalaha waringi wa mṟi wakawawia, “Luleshika handu Washami wekekaa, kuwewode mndu osepfo, ma ṟu lya mndu liichio-pfo, sile frasi tsitsipfunge, na nzoi, tsiwetsipfunge na mahema hawo chando wawehadeye.”

¹¹ Waringi walya wakalaha wandu wa mba ya mangi wakawaongoya ikyo.

¹² Mangi kakure kio, kawia waṟundi wake, wulalu njechimuloṟa chandu Washamu waluwutia. Waichi ke luwode njaa, ko ikyo wakawuka handu wekekaa, wakahenda iowa mademenyi, wehamba, wakacha wawuka mṟinyi kowo lochiwawada wai na moo, naso luwade mṟi.

¹³ Umu o waṟundi wa mangi, kahaluo, kahamba, “Njihoṟia kitutu, wandu maata waduo frasi tsitanu itso tsiletsuhaa mṟinyi (ambuya tsing'anyi na wandu wose wa Israeli waletsuhaa-pfo na wudo waṟinganyi na wandu wo wa Israeli walearisika), luwadume wahende iwona.”

¹⁴ Kyasia wakaduo magari hawi na frasi tsaho, mangi kawaduma wahende ilatia Washamu, kahamba, “Hendenyi muambuye.”

¹⁵ Wakawalatia mṟasa Yordani, ate njia yose iweichuo maṟao na shihia, shilekumbo ipfo na ipfo kipfa Washamu wa waleowuo na iwona ke wakahenda nasho wechikoyo kipfa shiwe chiwalemia. Wandu walya waledumo nyi mangi wakawuya wakawia Mangi chandu walekoya.

¹⁶ Wandu wakacha wakawada shilya shiledeo nyi Washamu; mahema hawo. Kikawa kiheo kya mso mcha kikakumbo ko shekeli, shiheo shiwi sha shayiri ko shekeli, kirianyi na idedo lilya lya Mndumii.

¹⁷ Mangi kawika mchili ulya awekemtarama, ke nahoṟokie wandu o mongonyi na wandu wakamchumachuma itane apfa o mongonyi, chandu mndu ulya o Ruwa alehamba, kiheri kilya aledumo na Mangi namcheye.

¹⁸ Kikawewa chandu mndu ulya o Ruwa alewewia mangi, “Shiheo shiwi sha shayiri ko shekeli, na kiheo kya mso mcha ko shekeli, nyi wudo kechiwa ngama kiheri na iki tichi o mongonyi ko Samaria.”

¹⁹ Na mchili ulya kahaluo mndu o Ruwa kahamba, “Wulalu ambuya kokoya Mndumii awechiwika matiṟisha ruwehu, ngesa kindo-ki kiwechiidimika?” Kambia, “Ambuya iyo nochiwona na meso kyaindi ochilya-pfo.”

²⁰ Kikamhoya kudo, cha kipfa wandu walemchumachuma alya mongonyi kapfa.