2WAMANGI 6 - Bibilia Kui Mdedie fo Kimochi

Soka lyawono

¹ Kyasia wana wa Waikimbi wakawia Elisha, “Ambuya wulalu handu ha lokekaa halushikiepfo, hahatutu mnu kodu.

² Kyasia loterewa luhende mṟasa Yordani, orio mndu naende ikidi limu, luteseheṟe handu hekaa.” Elisha kahaluo “Hendenyi.”

³ Umu owo kahamba, “Lokuterewa, uhende kimu na waṟundi wapfo.” Kahaluo, “Njechihenda.”

⁴ Kyasia kahendesana nawo. Wekishika Yordani wakamanya mashidi.

⁵ Kyaindi umu owo kiheri awemanya ikidi lying'anyi soka lilya lyikasoṟomoka munyihu lyikaoloka mṟingenyi, kafihiṟa, kahamba, “Ochia loko mndumii oko kipfa soka lyo njileterewa.”

⁶ Mndu o Ruwa kahamba, “Hanga lyaolokia.?” Kamloṟa handu halya. Kamanya kidi kitutu kakikumba alya alya, kudi soka lilya lyikadoya huye.

⁷ Kambia, “Liduo.” Kyasia kalesha owoko kaliduo.

Mamiingi fo Waaramu wawingo

⁸ Nahong'u mangi o Shamu nawekeira shida ikapana na Israeli. Kawada chila na waṟundi wake, kahamba, “Handu hako hechiwa handu haliwe.”

⁹ Mndu o Ruwa kaduo mbonyi ko mangi o Israeli, kehamba, “Kuṟise kulaide handu haliwe, kipfa nyipfo kundu Washamu wakuṟeheṟie ikuchea.”

¹⁰ Mangi o Israeli kaduo wandu mṟasa alya handu alewio na mndu ulya o Ruwa, na ikuṟisa mnu, kakiṟa moo foke, chi limu ma chi kawi pfo.

¹¹ Kyasia Mangi o Shamu mrima foke fukatewa kaeṟewe mnu kipfa kya mbonyi ii kalaha waṟundi wake, kawawia, “Ale, mochinjiloṟa nyi mndu uhya kiidi kyanu akeri ora lo mangi o Israeli?”

¹² Umu o waṟundi wake kambia, “Ote mndumii oko, mangi, indi Elisha ulya akeri mwikimbi kiidi kya Israeli, nekewia mangi o Israeli madedo hose okededia kiidi kya kiṟiha kyapfo kelaa.”

¹³ Kyasia Mangi kahamba, “Hendenyi muambuye handu akeri, kundu njidume wandu wahende imeende.” Kawio ke, “Ambuya nai Dothani.”

¹⁴ Ko ikyo kaduma frasi, na magari na ichekeṟo lying'anyi wakashika kui kio, wakatengeta mṟi njora tsose.

¹⁵ Ngamenyi kokikya kilawo mṟundi o mndu ulya o Ruwa, kakure ke nahende nja, ate! Kuwode mamiingi fo wandu, na frasi na magari, watengetie mṟi fulya. Mṟundi ulya kambia, “Ochia lodu! Mndumii oko, luwike luda?”

¹⁶ Elisha kamhaluo, “Kulaowuo, kipfa iwa wai ora lodu nyi wafoi kota walya wai nawo.”

¹⁷ Elisha katerewa kahamba, “Hoi Mndumii ngakuterewa pfunguo meso hake naidime iwona.” Mndumii-Ruwa, kapfunguo meso na manake ulya kawona kifumvu kilya kiweichuo frasi na magari ha modo haweṟingichie Elisha njora tsose.

¹⁸ Wekisoka kundu wakoyane na Elisha, Elisha katerewa Ruwa, kahamba, “Kapa wandu wa ngakuterewa wawe shipfupfuṟe.” Ruwa kawakapa, wakawa shipfupfuṟe kirianyi na idedo lya Elisha.

¹⁹ Elisha kawawia, “Njia i murie chiyopfo, na mṟi fu chifopfo, njioshenyi inyi, na inyi njechimduo ko mndu ulya mukeri imshiha.” Kawaduo Samaria.

²⁰ Wekiida na Samaria Elisha kahamba, “Mndumii, watambaṟuo meso wawone.” Mndumii kawatambaṟuo meso ate! Wakeri kiidi kya Wasamaria.

²¹ Mangi o Israeli kekiwona ado, kawia Elisha, “Hoi ndeako njiwawahe? Njiwawahe?”

²² Elisha kamhaluo, “Ulawawahe; ngesa uwekunda iwaha wandu omewaduo wapfungo na oshu lopfo na mfi fopfo? Wainenge kelya na mṟinga, walye na inyo, kiidima wahende ko mndumii owo.”

²³ Wakateseheṟio kelya kishikie, nawo wekimaa ilya na inyo, wakawalekia wakahenda ko mndumii owo. Ma kuwode ichekeṟo ma limu lilechase kiidi kya oruka lo Israeli pfo.

Mṟi fo Samaria fo tengetio

²⁴ Kyamesia ikyo, Ben-hadadi mangi o Shamu kasanyia wandu wa mbahanyi wose, kado kundu nawade Samaria.

²⁵ Njaa ing'anyi ikahoya Samaria, nawo wakatengetia mṟi, itane mdo fo nzoi fukakumbo shipeṟengu makumi nyanya (80) sha fesa, na kitela kya sari ya mbeta ko rupia tsitanu tsa fesa.

²⁶ Kyasia kiheri mangi o Israeli aweida mawandenyi ha omombo, mndu mka umu kamlaha kehamba, “Njitarama mndumii oko mangi.”

²⁷ Mangi kambia, Mndumii-Ruwa alamekutarame, inyi njechikutarama njida; Njiwode Ngano ang'u mvinyo?

²⁸ Mangi kambia, “Kiki ukundi?” Mndu mka ulya kamhaluo, “Mndu mka chu nalenjiwia, wuta mana opfo lumlye inu, na mana oko lumlye ngama.

²⁹ Lukaakoṟa mana ulya oko, lukamlya, ngambia ili lya ngama ende mana opfo lumlye nao kaṟika mana ulya oke.”

³⁰ Mangi ekiicho madedo ha mndu mka chu, karanduo maṟao hake (nao naweida huya omombo lo mṟi) wandu wakambona, ate naweṟee makunyia mbihunyi foke.

³¹ Naalyo mangi kahamba, “So Ruwa ai na moo mdo fo Elisha mana o Shafati fochideo fuladumbuyo kushike kiukanyi-pfo.”

³² Kyaindi Elisha nawekukerie kanyi koke na wameku wawei nao; mangi kaduma mndu namsongoye nahende koke, kyaindi mndu ulya alemduma alameshika, Elisha kawia wameku walya, “Muwonyi chandu mana o mbaahi aleduma nanjidumbuo mdo foko? Ambuyenyi, icho amdume, kacha shingenyi mongo, mumtirimishe o mongonyi. Ngesa ṟu lya mtiṟi fo mndumii oke lii nduma yake?”

³³ Kededa adi ulya aledumo kamchea, nao kahamba, “Ambuya mawicho ha hose hawukie ko Mndumii; nyi ki kitewe inyi njiwedie Mndumii se?”