2WAMANGI 5 - Bibilia Kui Mdedie fo Kimochi

Naamani achiṟo

¹ Nahong'u Naamani mnene o ichekeṟo lya mbahanyi lya mangi o Shamu, nawei mndu mnene oshangunyi lo mndumii oke, na nyakeindio, kipfa kui owoko lo Mndumii. Washami walewinza shida, ngoseṟa nawei mndu ngarama o shida, indi nawewodo nyi saka.

² Washami wawehendie shideni, wakaduo mpfungo mana o waka awuka kiidi kya Israeli, nao kahidia mka o Naamani.

³ Kawia kekuye, “Kima mndumii oko nawei kimu na mwikimbi ai Samaria. Kipfa nawemchiṟa saka i yake.”

⁴ Mndu umu kaida, kawia mndumii kechihamba, “Mana ulya o waka aleendo awuto Israeli nahamba wuliwe na wuliwe.”

⁵ Mangi o Shamu kahamba, “Kyasia wulalu, inyi njechidika paruo ko Mangi o Israeli.” Kyasia kahenda kadika talanta ikumi (10) tsa fesa, na shipeṟengu sha sahabu shiku shiṟandaṟu (6,000), na maṟao ikumi.

⁶ Kadikia Mangi o Israeli paruo iya, kechihamba. “Baruo ii ikakushikia, ambuya ngaduma mṟundi oko Naamani kopfo, kundu numchiṟe, saka yake.”

⁷ Mangi o Israeli kekisoma paruo iya, karanduo maṟao hake kahamba, “Ngesa inyi nyi Ruwa, njiwahe na iṟutsa, itane mndu chu nanjidikie mndu njimchiṟe saka yake? Manyenyi ng'u muwone mnduchu nakundi iloyana na inyi.”

⁸ Elisha kekiicho ke mangi ya Israeli, naranduo maṟao hake, naalyo kaduma mndu ko Mangi, kechihamba, “Kitewe uranduo maṟao hapfo nki? Nache na koko nao nechimanya ke kuwode mwikimbi kiidi kya Israeli.”

⁹ Kyasia Naamani kacha na magari hake, kahoṟoka mongonyi fo mba ya Elisha.

¹⁰ Elisha kamdumia mndu nambie ke, “Henda usambe kiidi kya meda fo Yordani kamfungade, na nyama ya mbihu fopfo yechikuwuuya, uheṟemke.”

¹¹ Kyaindi Naamani kasuo, kakure, kahenda kekunyasha kahamba, “Ambuya, mbekusaṟie ke nawecha, nahoṟoke oshangunyi loko naterewe ko rina lya Mndumii-Ruwa oke, nawade iya handu kuluo, nanjichiṟe inyi njiwodo nyi saka.

¹² Ngesa Abana na Farpati, meda ya Dameski, chi iwode kiṟumi kota mṟinga yose ya Israeli? Ngesa njeidima isamba kiidi kyayo njiheṟemke?” Kahaluka kahenda aichuo nyashi.

¹³ Waṟundi wake wakamsembelia, wakambia, wechihamba, “Ndeako, kokoya mwikimbi ulya awechikuwia uwute kindo king'anyi uwechiwuta?” Ngesa chi ngoseṟa kechikuwia, “Henda samba uheṟemke?”

¹⁴ Naalyo kasoka, kaarama mṟingenyi kakusoṟowitsia kamfungade kiidi kya Yordani, kirianyi na idedo lya mndu ulya o Ruwa, nayo nyama ya mbihu foke ikawa cha ya mkoku, kaheṟemka.

¹⁵ Kawuuya mndu ulya o Ruwa o na walya wawehendasanyi nao kacha, kahoṟoka oshangunyi loke kahamba, “Wulalu ambuya, ngamanya ke kuwode Ruwa wuyanenyi kose shile kiidi kya Israeli pfo. Wulalu ngakuterewa uambie shiinengo sha isinga lyapfo.”

¹⁶ Kyaindi Elisha kahamba, “So Ruwa ai na moo, ichu njekemṟundia, njechiambia kindopfo.” Kamtikiria naambie, kyaindi kaleha.

¹⁷ Naamani kahamba, “Kyaindi isinga lyapfo liinengo teri ya kiheo kya mapung'a hawi, kipfa isinga lyapfo lyechiwutase kidaso kemaya modonyi ko maruwa hengipfo, shile ko Mndumii.

¹⁸ Kindo ki Mndumii nakiitse kuleshe. Mndumii oko kahenda mbenyi ko Rimoni kundu naindie nao kechikusiria owoko loko, na inyi ngahongoma mbenyi ya Rimoni, Mndumii na njideye kindo ki.”

¹⁹ Elisha kambia, “Kuhendie na oforo.” Kyasia Naamani kakure kahenda haleshe da.

²⁰ Kyaindi Gehazi, mṟundi o Elisha mndu o Ruwa kahamba, “Ambuya mndumii oko naleha shindo shilya Naamani alemeendie so Mndumii ai na moo, inyi njechimwosha, njewikia mteeṟa, njiambie kindo koke.”

²¹ Kyasia Gehazi kaosha Naamani. Naamani, kekiwona mndu awikia mteeṟa numa yake katirimisha igari lyake kasoka ho kamwambia, kambesa, “Ngesa nyi ofoṟo?.”

²² Kahamba, “Nyi ofoṟo, ‘Mndumii oko anjiduma, kechihamba, ambuya wandu wacha wawuka mafumvuhu ha Efraimu wanake wawi wa wana wa waikimbi, uwainenge ngaterewa talanta ya fesa, na maṟao hawi.’”

²³ Naamani kahamba, “Haika ambilia talanta tsiwi kamtikiria kaambia, kapfunga talanta tsiwi kawika mfukoni iwi, na maṟao hawi, kadika waṟundi wake wawi, nawo wakaduo kusonguo.

²⁴ Kekishika handu hawode kifumvu, kaambilia awuta mawokonyi hawo, kashiduo kanyi koke, kasama wandu walya wakakure, wakawuya.”

²⁵ Kyaindi o kaida na mba kahoṟoka oshangunyi lo mndumii oke. Elisha kambesa, “Gehazi oko nyiku owuka?” Kahamba, “Isinga lyapfo lyamhenda handu pfo.”

²⁶ Elisha kambia, “Ngesa mrima foko fohenda na iyo, kiheri kilya, mndu alesoka igarinyi nakuambie? Iki nyi kiheri kyapfo keambiliya fesa, na maṟao na madema ha mashidi na msabibu, na machondi, na mbe na masinga na shisinga?

²⁷ Kyasia saka iya ya Naamani yechikuwada iyo na oshari lopfo mlungana.” Nao kawuka oshangunyi loke awodo nyi saka kawa cha kuṟeṟa ya mtsudu.