2WAMANGI 4 - Bibilia Kui Mdedie fo Kimochi

Elisha atarama mkusu mkiwa

¹ Kyasia mndu mka umu kiidi kya waka wa wana wa Waikimbi kacha ifihiṟia Elisha kahamba, “Mṟundi opfo mii oko nalepfa, na iyo noweichi ke mṟundi opfo naweindie Mndumii, mosile oke nacha naduo wana wako wawi masinga kipfa ndawode ketaa sile iya.”

² Elisha kambia, “Njikuwutie kuda? Njiwia nkiki uwode kulya kanyi kopfo?” Kahamba, “Inyi kisinga kyapfo njiwode kindo kanyi kokopfo, shile nyi chupa ya mafuda.”

³ Kahamba, “Henda ushihe shihiya shewika kindo cha chupa, mboṟiko ipfo mṟasenyi shifoi chandu ochiidima iwona.

⁴ Kiidima uide na mba iyo na wana wapfo mukushingie pfo, uletsie mafudaho ipfo shihiyenyi shose, shikaichuo nowike mbai.”

⁵ Kamda, kakushingia mba o na wana wake, wakamuendie shihia shilya, nao kaletsiapfo mafuda.

⁶ Kiheri shileichuo shose, kawia mana oke, “Njiendie se kihiya kingi.” Kambia, kuwode se kihia pfo mafuda hakatsitsa.

⁷ Kacha kawia mndu o Ruwa. Nao kambia, “Henda nokumbe mafudaho, notae sile yo, na mafuda ho haletsuhaa mukoṟe naho iyo na wana wapfo.”

Elisha na mndu mka msuṟi Mshunami

⁸ Kiidima mkonu fumu, Elisha kahenda Shunami, na ipfo kuwewode mndu mka umu msuṟi, kamuitika nache nalye kelya. Kikawa orio mandi ameida alya, nekeida na mba kalya kelya.

⁹ Mndu mka ulya kawia mii oke, “Ambuya njiwonyi mndu chu ekewa mocha na iya kodu orio kiheri nyi mndu mwele o Ruwa.

¹⁰ Ngakuterewa lumsungusie kiṟiha kitutu iya mawandenyi ha mba, luwikepfo kitaṟa, na mesa na loṟika, na handu hehekia taa kamecha nakuidie na ipfo kiṟihenyi kyake.”

¹¹ Kikashika mkonu fumu kacha kaida na kulya kiṟihenyi kalaa.

¹² Kawia Gehazi mṟundi oke, “Laha Mshunami cho.” Nao amelaho kacha kahoṟoka oshangunyi loke.

¹³ Kambia “Deda nao wulalu, ambuya iyo omeluhidia kudi necha uwutio ki? Ngesa uterewio idedo lyiha ko Mangi, ang'u ko mnene o waaskari?” Mndu mka ulya kahaluo, “Inyi njikeri kiidi kya wandu wako njimonyi.”

¹⁴ Elisha kawesa Gehazi, “wulalu nowutio kiki?” Gehazi kahaluo, “Kya lohi awode mana pfo, na mii oke namku.”

¹⁵ Kambia, “Henda mlahe.” Nao amelaho kahoṟoka oo mongonyi.

¹⁶ Kahamba, “Kukashika kiheri cha iki maka fuicha, nochichunguṟia mana.” Kahamba, “Ote, Mndumii oko, iyo nyi mndu o Ruwa ulanjiwie wongo inyi kisinga kyapfo.”

¹⁷ Mndu mka ulya kakapika, kafee mana o kisoṟo kiheri kilya kilya kya maka, chandu Elisha alembia.

¹⁸ Mana ulya keking'ana, mkonu fumu kiheri kyesambuo kahenda demenyi handu hamu na ndee warianyi na wesambuo.

¹⁹ Kawia ndee, “Mdo foko fuilya! Mdo foko fuilya!” Na ndee kawia mṟundi oke umu, “Mduo ko mae.”

²⁰ Kamduo ko mae, kakaa ndenyi tsake itane mfiri, kalekia moo.

²¹ Mae kado kiṟihenyi kya huye kilya kya mndu o Ruwa, kamlaṟa kitaṟenyi kamshingia kulya mba kawukapfo.

²² Kiidima kalaha mii, kambia, “Kenjienenga umu o waṟundi na nzoi imu kundu njihendie mndu ulya o Ruwa oweṟe njiwuye.”

²³ Kambia, “Nki ili ukundi ihenda inu? Chi iwoneka lya meripfo, ma chi Sabatopfo.” Na mka kamhaluo, “Makulakusaṟe.”

²⁴ Kaṟeheṟa nzoi, kawia mṟundi oke, “Duo nzoi luhende. Kulaleheṟe ohendo sile ngakuwia.”

²⁵ Kyasia kahenda, kashika ko mndu ulya o Ruwa kiidi kya fumvu lya Karmeli. Mndu ulya o Ruwa kambona ai haleshe, kawia Gehazi mṟundi oke, “Ambuya Mshunami ulya kulya.”

²⁶ Wikia mteeṟa uhende imwambia, “Mbese ui na oru? Mii opfo ai na oru? Mana ai na oru. Kahaluo wai na oru.”

²⁷ Kiheri aleshika alya ko mndu o Ruwa kifumvuhu, kambada madende. Gehazi katikiria nambuteho, kyaindi mndu ulya o Ruwa kambia, “Mleke tupu, kipfa mrima foke fuichuo wukiwa na mawawio hang'anyi na Mndumii nanjiṟika anjiwiapfo.”

²⁸ Mka ulya kahamba, “Ngesa njileterewa mana ko Mndumii oko? Inyi njilehamba kulanjilembe?”

²⁹ Nalyo Elisha kawia Gehazi, “Kuwanze tse, uduo ndichi ii kuwokonyi kopfo, uhende, kokumbuhana na mndu, kakuiṟikiṟa kulaidikie, uhende iwika ndichi ii huya kyamu kya mana.”

³⁰ Mae o mana ulya kahamba, “So Ruwa ai na moo, na moo fopfo da, njechikulekia pfo.” Kyasia kakure kamwosha.

³¹ Gehazi kawasongoya, kawika ndichi iya huya kyamu kya mana, kyaindi kuwewode ma ṟu, ma mhaluye na ikununuopfo. Kyasia kawuya kundu namwambie, kambia, “Mana akurepfo.”

³² Elisha keshika kanyi kakoya mana napfie, namlaṟe kitaṟenyi kyake.

³³ Kyasia kaida na mba, kakushingia na mongo o na mana ulya wa wawi tupu, katerewa Mndumii.

³⁴ Kadoya huya kitaṟa huya mana, kawika dumbu lyake sumuhana na dumbu lya mana, na meso hake sumuhana na meso ha mana ulya, na mawoko, hake sumuhana na mawoko ha mana, kakuhoṟoya se huyake, mbihu fo mana ulya fukawoka iwada mrike.

³⁵ Kiidima kawuya katengeta kulya mba ipfo na ipfo limu, kado, kakuhoṟoya huyake, na mana ulya kaitsamuo ka mfungade, na mana katamparuo meso hake.

³⁶ Kyasia Elisha kalaha Gehazi kambia, “Laha Mshunami cho.” Kyasia kamlaha. Ameshika, Elisha kambia, “Duo mana opfo.”

³⁷ Naalyo kaida kamwolokia madende kahongoma mṟasa wanda, kiidima kaduo mana oke, kawukaho.

Maṟiho hengi hawi ha Elisha

³⁸ Elisha kashikase Gilgali, kuwewode njaa orukenyi, na wanawo wa waikimbi wawekekaa mbele yake. Kawia mṟundi oke, “Demekia safuria ing'anyi ukoṟie wana wa Waikimbi kelya.”

³⁹ Na umu owo kahenda ndeminyi ichona mboha, kawona itango lya ngeṟenyi alaweliichi kalichona itane nguwo yake ikaichuo pacha, kahapaṟia safurienyi.

⁴⁰ Kyasia, wakawikia wandu wo kundu walye. Warie ilya wakakalahatsa wehamba, “Opfu lui sufurienyi, iyo mndu o Ruwa!” Ma waleidima ilya pfo.

⁴¹ Kyaindi Elisha kahamba, “Endenyi mso.” Kaendio mso, kafukumba kulya sufurienyi, kahamba, “Wulalu wikia wandu kelya walye.” Kuwewode kindo kiwicho safurienyi pfo.

⁴² Ngoseṟa kukacha mndu umu awuka Baal-shalisha, kaendie mndu o Ruwa kelya kya kuwoka, mkate makumi hawi ya “Shayiri” na mahaa ha Ngano njiwishi ikunyia pacha, Elisha kawawasa, “Inenga wandu walye.”

⁴³ Mṟundi ulya oke kawesa, “Ngesa njiinenge wandu ihana kelya ki?” Kyaindi Elisha kahamba, “Inenga wandu walye, kipfa Mndumii nahamba wechilya watsuhaṟe.”

⁴⁴ Kyasia kawawikia, wakalya wakatsuhaṟa kirianyi na idedo lya Mndumii.