2WAMANGI 3 - Bibilia Kui Mdedie fo Kimochi

Shida kiidi kya Israeli na Moabu

¹ Kiidi kya maka fo ikumi na nyanya fo wuitoṟi wo Yehoshafati Mangi o Yuda, Yoramu mana o Ahabu kawa Mangi ya Israeli kulya Samaria, kaitoṟia maka ikumi na iwi (12).

² Kawuta shiwichuṟie oshangunyi lo Mndumii kyaindi chi cha wandie ma mae pfo, kipfa nalewunduo ngo iya ya Baali ilewiko nyi ndee.

³ Kimu na isho kawadana na njonyamaṟo tsa Yeroboamu mana o Nebati, sa aledekesha natso Israeli; ma alakunde ilekana natso.

⁴ Kyasia Mesha Mangi o Moabu, nawekewikia machondi orio maka naweketaa mangi o Israeli mafufuta ha machondi (100,000) ha kika na masuwa (100,000).

⁵ Kyaindi kiheri elepfa Mangi o Moabu kaleha Mangi o Israeli.

⁶ Mandi naho Mangi Yoramu kiidi kya Samaria kakure kaitala Waisraeli wose.

⁷ Kakure kaduma ndumi ko Yehoshafati Mangi o Yuda, kahamba, “Mangi o Moabu nanjisuo. Ngesa ochikunda ioshana na inyi lukapane na Moabu?” Mangi Yehoshafati kamhaluo kambia, “Njechihenda inyi na iyo, wandu wako nyi wapfo, frasi tsako na tsapfo.”

⁸ Kammbesa, “Lochiwapufukia njia iha?” Kamhaluo “Njia ya nuka ya msanga ya Edomu.”

⁹ Kyasia Mangi o Israeli kahenda, na Mangi o Yuda, na Mangi o Edomu, wakatengeta ohendo lo mfiri mfungade mṟinga fukasia. Kuwewode mṟinga kipfa kya wandu wa mbahanyi pfo, ma shuma shilya warianyi nashopfo.

¹⁰ Mangi o Israeli kahamba, “Ochia lodu, kipfa Mndumii nakoyanyisha wamangi wa waṟaṟu nawadambike owokonyi lo Moabu.”

¹¹ Kyaindi Yehoshafati kahamba, “Ngesa iya kuwode mwikimbi o Mndumii, kundu luwese Mndumii kui dumbu lyake?” Mṟundi umu o Mangi o Israeli kahaluo, “Iya kuwode Elisha mana o Shafati, awekeletsia mawoko ha Elia mṟinga.”

¹² Yehoshafati kahamba, “Ichu nawode idedo lya Mndumii.” Kyasia Mangi o Israeli na Yehoshafati, na Mangi o Edomu, wakasoka na koke.

¹³ Elisha kawia Mangi o Israeli, “Nkiki kyapfo na inyi? Henda ushihe wulaanyi ko waikimbi wa ndeo na waikimbi wa mayo.” Mangi o Israeli kambia, “Ote chi wudo pfo!, Nyi kipfa Mndumii-Ruwa nyio akoyanyisha wamangi wa waṟaṟu nawadambike mawokonyi ha Moabu.”

¹⁴ Elisha kahamba, “So Mndumii menyi matorito ai na moo, ichu njikemṟundia, ko sile ili njiwode wuindi ko mbuya yapfo Yehoshafati Mangi o Yuda, njiwekusaṟa kya iyo ma ukuambuyapfo.

¹⁵ Kyaindi henda njiendie mokapa kinanda.” Kyasia wakamendie mokapa kinanda kiheri alekikapa, owoko lo Mndumii lukacha huye ya Elisha.

¹⁶ Kahamba, Mndumii nahamba adi, “Ichuṟenyi pichi li marina.”

¹⁷ Kipfa Mndumii nahamba adi, “Mochiwona otanu, ma mochiwona mvuo pfo, indi pichi lyo lyechiichuo mṟinga, nanyo mochinyo, na mbe tsanu, na shuma shanu.

¹⁸ Kindo ki kikiangu oshangunyi lo Mndumii, lya woeṟa nechidambika Wamoabu mawokonyi hanu.”

Shichano sha Elisha

¹⁹ “Nanyo mochikapa orio mṟi fuwode omombo, na orio mṟi mcha na orio ikidi lyicha mochilimanya, na soka tsose mochitsishinga, na orio handu hecha kose mochihanyamaṟa ko maho.”

²⁰ Kukawa ngamenyi, kiheri kewuta mwano fo mso, na ambuya, mṟinga fukacha ko njia ya Edomu, oruka lukaichuo mṟinga.

²¹ Kyasia Wamoabu wose wekiicho ke wamangi wo wado wache ikapana nawo, wakasanza handu hamu wose weidima iṟaa shisha, na watikirie maka ifoi, wakahoṟoka mṟasenyi.

²² Wakakure ngamenyi kilawo, na mnengeṟi fukalimika mṟinga fulya, na Wamoabu wakawona mṟinga fulya fuwahalukie fukafana kimande cha samu.

²³ Wakahamba, “Ii nyi samu, kofia wamangi wo wanyamaṟikie wakapanyie orio mndu na odoe, kyasia wulalu nyo Wamoabu, wadenyi isho shishide nyiwo.”

²⁴ Wekicha kundu Waisraeli wai, Waisraeli wakakure wakakapa Wamoabu, mṟasa wakadicha oshangunyi lowo. Wakaengeṟa, ikapa Wamoabu wechiwawingia na iwawaha mṟasa orukenyi lowo.

²⁵ Wakawunduo mṟi iya yawo wakakumba maho mademenyi hawo, hakaichuo maho, wakashinga soka tsose tsa mṟinga, wakamanya orio ikidi lyicha. Lyefurumia mṟi mnene fo Kir-haresethi fukatsuhaa fumenyi. Kyaindi wandu walya weṟukucha maho, wakatengeta wakakapa mṟi fulya, na ifuwada wupfungo.

²⁶ Naalyo mangi o Moabu kekiwona ke nalemo shidenyi, kaduo kimu nao wandu (700) mahana mfungade wawode njoshu kundu waide mṟasa ko Mangi o Edomu, kyaindi walaidime

²⁷ Naalyo kawuta mana oke o kuwoka ichu aweitoṟia handu hake kambuta nawe kiano kemaya modonyi, huya omombo. Waisraeli wakaduiko nyashi, wakakuwuya orukenyi lowo.