2WAMANGI 25 - Bibilia Kui Mdedie fo Kimochi

Isaramaya lya Yerusalemu

¹ Mkonu fo ikumi fo meri fo ikumi fo maka fo kenda fo wumangi wo Sedekia, Nebukadneza mangi o Babeli nalecha na wandu wake wa mbahanyi, kakapana na mṟi fo Yerusalemu, kafutengetia, kawika oṟiho kaṟingichia riti.

² Mṟi fukakaa futengetie mṟasa maka fo ikumi na fumu fo wuitoṟi wo Sedekia.

³ Kiidi kya mkonu fo kenda fo meri fo kaana njaa ikawanga mnu mṟinyi, kuwewode se kando kose ka wandu kiidi kyawopfo.

⁴ Kyasia ora lumu lo mawanda ha mṟi lulefunjo, na waaskari wose wakadicha ili kio wechiida kiidi kya kyahu kya mangi kichuminyi makidi hawi ha mawanda hawi, wakahenda ora lo Araba, ma chandu Wababeli waringichie mṟi.

⁵ Indi wandu wa mbahanyi wa Wakalidayo walewikia mteeṟa wechiosha mangi Sedekia itane washika rendewele ya Yeriko wakambada na waaskari wake wose wakarahanyika.

⁶ Kyasia Wakalidayo wakamduo wupfungo ko mangi o Babeli ipfo Ribla, nao kamwanduya.

⁷ Kiidima nalewaha wana wake kechiwaambuya na meso hake, wakamtocha meso hake. Ifurumia ho wakampfunga na mshe wakamduo Babeli.

Hekalu lyarumatso

⁸ Mkonu fo mfungade meri fo katanu fo maka fo ikumi na kenda fo wumangi wo Nebukadneza mangi o Babeli, Nebuzaradani, mnene o waringi wa mangi, naleida Yerusalemu.

⁹ Nalekoṟa mba ya Mndumii-Ruwa, mba ya mangi na mba tsose tsa Yerusalemu, orio mba ing'anyi naleikoṟa modo.

¹⁰ Na Waaskari wose wa Wakalidayo wawei kimu na mnene cho o waringi wa mangi wakawunduo mawanda haweṟingichie mṟi fo Yerusalemu.

¹¹ Nebuzaradani mnene o waringi wa mangi, naleduo osamiṟonyi wandu walya wose wawetsuhee mṟinyi na walya wose walehenda ko mangi o Babeli hamu na wandu wengi wose.

¹² Indi naleda walya wawei wakiwa mnu orukenyi. Nalewada waringe msabibu na idema madema.

¹³ Wakaldayo walefunja shitenoteno ngo tsa aṟeṟa tsiwei mbenyi ya Mndumii-Ruwa hamu na shitima shatso, ihondi ling'anyi lya aṟeṟa njiiwu liweliwike kiidi kya mba ya Mndumii-Ruwa wakaduo aṟeṟa njiiwu mṟasa Babeli.

¹⁴ Wakaweduo shinungu, makumbi, makasi na mdiko na shihia shose sha aṟeṟa shiwekeṟunda shekoṟa ubani na sha aṟeṟa njiiwu shiwekeṟundia hekalu.

¹⁵ Wakaweduo shitela na mapongo, shiwei sha sahabu, na shiwei sha fesa mnene o waringi wa mangi naleshiduo.

¹⁶ Aṟeṟa yose njiiwu iya ilesungusia ngo tsilya tsiwi, na ihondi lilya lying'anyi nashitima shilya shehekia ihondi lyo kipfa kya Mndumii-Ruwa shileidimika ihesha pfo kipfa kya wulemeri wosho.

¹⁷ Orio ngo iwewode wuleshe wo mita (8) na huye kuwewodeho kindo cha mdo fo aṟeṟa njiiwu wuleshe wo orio mdo nyi mita (1:25). Orio mdo fuwemṟingichie na ishelo kui makomamanga, shose sha aṟeṟa njiiwu.

Wandu wa Yuda wadao Babeli

¹⁸ Kiidima Nebuzaradani mnene o waringi wa Mangi kaduo Seraya mkohanyi mnene o wapfungo, Sefania mkohanyi o kawi hamu na wachili weringa kichumi waṟaṟu.

¹⁹ Kaweduo na mnzenge umu ipfo mṟinyi kasongoya mbahanyi ya shida, hamu na wandu watanu masumba ha mangi alewakoya pfo. Ngoseṟa, kaduo mṟehi mosongoya wandu wa mbahanyi awei moringa mboni tsa mbahanyi hamu na wandu makumi haṟandaṟu masumba alewakoya ipfo mṟinyi fo Yerusalemu.

²⁰ Nebuzaradani mnene o waringi wa mangi kaduo wandu wo kawadaya mangi o Babeli ipfo Ribla.

²¹ Mangi Nebukadneza o Babeli kakapa wandu wo kawawahia ipfo kiidi kya oruka lo Hamathi. Ko ikyo wandu wa Yuda waledao wapfungo nja ya oruka lowo.

Gedalia, awa mnene o Yuda

²² Mangi Nebukadneza o Babeli kawika Gedalia mana o Ahikamu mchuku o Shafani, kawa mnene moitoṟia wandu wose wa Yuda walya walaledao Babeli.

²³ Kiidima wanene wasongoru wa shida wa wandu wengi se wekiicho ke mangi o Babeli nawika Gedalia nawe mwitoṟi wakahendia Gedalia ipfo Mispa. Wandu wo nyi we Ishmaeli mana o Nethania, Yohanani mana o Karea, Seraya mana o Tanhumethi Mnetofathi, na Yezania mana o Mmaka.

²⁴ Na Gedalia kawaokia nyama oshangunyi lowo na wandu wawo, kahamba, “Mulaowuo kipfa kya wanene wa Wakaldayo. Kaenyi kunu orukenyi muṟundie mangi o Babeli na shindo shose shechia swai .”

²⁵ Meri fo mfungade, Ishmaeli mana o Nethania, mchuku o Elishama, awei o kishari kya mangi, kashika ko Gedalia aoshanyi na wandu ikumi, kakapa Gedalia kambaha. Nalewewaha Wayuda na Wakaldayo wawei nao.

²⁶ Isho shamewutika Waisraeli wose watutu na wang'anyi hamu na wanene wa wandu wa shida, walekure, wakahenda Misri kipfa waleowuo Wakaldayo.

Yehoyakini apfunguyo

²⁷ Kushikie maka fo makumi haṟaṟu na mfungade (37), Evil-merodaki mangi o Babeli, kiheri alewoka iitoṟia, maka naafo kahoṟia Yehoyakini mangi o Yuda, kambuta mbenyi ya wapfungo. Isho shileṟundika kiidi kya mkonu fo makumi hawi na mfungade fo meri fo ikumi na kawi, maka fo makumi haṟaṟu na mfungade (37) wokia Yehoyakini adao wupfungo.

²⁸ Nalededa nao necha kamnenga kiṟumi kota wamangi wengi wawei kimu nao ipfo Babeli.

²⁹ Nahong'u Yehoyakini kailacha maṟao hake ha wupfungo. Orio mkonu nawelya kelya kya ko mangi.

³⁰ Mangi kamnenga orio kindo awehuṟi orio mkonu, kiheri kya ohendo lo moo foke fose.