2WAMANGI 24 - Bibilia Kui Mdedie fo Kimochi

¹ Nebukadneza mangi o Babeli nalekapa Yuda. Yehoyakimu kamṟundia maka iṟaṟu kamda nalakimiindie se kamleha.

² Kyasia Mndumii-Ruwa kamdikia makamba ha Wababeli, Waaramu, Wamoabu na Waamoni wakape oruka lo Yuda na ilunyamaṟa sumhana na idedo lya Mndumii-Ruwa alededa kui waṟundi wake waikimbi.

³ Nyi lohi shindo shi shilehoya oruka lo Yuda kui iwawaso lya Mndumii-Ruwa kundu nawasamiṟe, wawuke oshangunyi loke, kipfa kya njonyamaṟo tsa mangi Manase na shose alewuta.

⁴ Na kipfa oshangunyi loke, kipfa kya samu aleipusuo ilawode mti, Mndumii-Ruwa alemhoṟia madeko ho pfo.

⁵ Kyasia mawuto hengi ha Yehoyakimu na hose aleṟunda hamaṟehie kiidi kya kitapu kya mbonyi tsa Maheri ha Wamangi wa Yuda.

⁶ Yehoyakimu kapfa na mana oke Yehoyakini kaitoṟia handu hake.

⁷ Mangi o Misri alekiwukase orukenyi lokepfo, kipfa mangi o Babeli naleduo na iitoṟia oruka lose luwei luitoṟie nyi mangi o Misri ili mbooko - wuka kimeda kya Misri ukoye meda fo Eufrate.

Mangi Yehoyakini o Yuda

⁸ Yehoyakini nawewode maka ikumi na nyanya kawada wumangi, kaitoṟia ipfo Yerusalemu meri iṟaṟu. Mae oke nyi Nehushta mana o waka o Elnathani menyi o Yerusalemu.

⁹ Kawuta mawicho oshangunyi lo Mndumii-Ruwa chandu wandie alewuta.

¹⁰ Mandi ho wandu wa mbahanyi wa Nebukadneza mangi o Babeli, wakakapa mṟi fo Yerusalemu wakafutengetia.

¹¹ Kiheri kyo wandu wa mbahanyi wawetengetia mṟi fo Nebukadneza amonyi kacha Yerusalemu.

¹² Na Yehoyakini mangi o Yuda kakudambika ko mangi o Babeli, o amonyi kimu na mae, waṟundi wake wasongoru na wachili wake. Mangi o Babeli kamduo mfungo kiidi kya maka fo nyanya fo wuitoṟi woke.

¹³ Na wudo da chandu Mndumii-Ruwa awehambie, Nebukadneza naleduo masaa hose hawei mbenyi ii ya Mndumii-Ruwa na mbenyi ya Mangi. Nalemanyamanya shihia shose sha sahabu shilya shilesungusio na Solomoni mangi o Israeli. Shihia sho shiwei mbenyi ya Mndumii-Ruwa.

¹⁴ Naleduo wandu wose wa Yerusalemu, wanene wose, wandu wose wawei ngohoda, wawade wapfungo shiku ikumi (10,000), waaria wose na wanganya. Kuwode aletsuhaa pfo shile walya wawei wakiwa malyoomba wa oruka.

¹⁵ Naleduo Yehoyakini mṟasa Babeli hamu na mae o mangi, waka wa mangi wachili wake na wanene wa oruka, wose iwo alewawuta Yerusalemu kawaduo Babeli.

¹⁶ Nebukadneza kaduo wandu wai ngohoda wa Yuda washikie shiku mfungade (7,000) hamu na waria waṟango na wanganya, kiku kimu (1,000), wose iwa wakawa wawode pfinya wechiidima ikapana shida.

¹⁷ Nebukadneza kashimbuo Matamia washidie o Yehoyakini, nawe mangi handu hake, kailacha rina lyake liwe Sedekia.

Mangi Sedekia o Yuda

¹⁸ Sedekia nawewode maka makumi hawi na fumu lilya alewoka wumangi, kaitoṟia ipfo Yerusalemu maka ikumi na fumu (21). Mae oke nyi awekelaho Hamutali mana o waka o Yeremia o mṟi fo Libna.

¹⁹ Nalewewuta mawicho hasuiṟe Mndumii-Ruwa, “Chandu mangi Yehoyakimu alewuta.”

²⁰ Mndumii-Ruwa kasukio kya wandu wa Israeli na Yuda, itane awafuna wahende kuleshe nao. Sedekia kaleha mangi o Babeli.