2WAMANGI 23 - Bibilia Kui Mdedie fo Kimochi

Mangi Yosia aleha wuindi wo maruwa ha wongo

¹ Nahong'u mangi kaduma wandu wahende isanyia wasongoru wose wa Yuda na Yerusalemu wamchee.

² Mangi kahenda kiidi kya mba ya Mndumii-Ruwa kechioshana na wandu wose wa Yuda na wekekaa Yerusalemu, na wakohanyi hamu na waikimbi, wandu wose watutu na wang'anyi. Kyasia, kawasomia madedo ha kitapu kya mkundana kilewono kiidi kya mba ya Mndumii-Ruwa.

³ Kiidima mangi kahoṟoka kufui na ngo kawika mkundana oshangunyi lo Mndumii-Ruwa, imwosha, iwada mawawaso hake, na chile tsake na mdumbuye yake kui mrima foke fose na ngoo yake yose, iwuta madedo hose ha mkundana chando haimaṟehie kiidi kya kitapu kyo kya mkundana. Wandu wose wakapfungana kiidi kya iwuta na iinutsia mkundano.

⁴ Yosia kawawasa mkohanyi ang'anyi Hilkia na wakohanyi watarami wake na wehoṟokia wawute shindo shiwei shiwike kiidi kya hekalu lya Mndumii-Ruwa shiwei shisungusie kipfa kya Baali, Ashera na kipfa kya nyenyeri, kashirumatsa kui ishikoṟa nja ya Yerusalemu kiidi kya pichi lya Kidroni, kaduo ifu lyasho mṟasa Betheli.

⁵ Kawuta wakohanyi wose wawei washimbuo nyi wamangi wa Yuda kundu wapfaamiṟe ubani kiidi kya handu heterewia mṟinyi fo Yuda na itengetia Yerusalemu, na walya wepfamiṟia ubani ko Baali, mnengeṟi, meri, nyenyeri tsa kufui na nyenyeri tsa kuleshe tsii kiidi kya mba ya Mndumii-Ruwa.

⁶ Nalewuta Ashera iwuke kiidi kya mba ya Mndumii-Ruwa, nja ya Yerusalemu kaiduo mṟasa kimeda kya Kidroni. Kaikoṟa kaisa mṟasa ikawa kiluli, na kiluli kilya kakinanatsa huya shipfu sha wandu.

⁷ Kawunduo mba tsa wasoṟo wameluki wa Hekalu. Mba tsi tsiwei kiidi kya mba ya Mndumii-Ruwa handu kuwei waka waweipfuma nguwo tsemasa tsa Ashera.

⁸ Kasanyia wakohanyi wose wawukie mṟinyi ya Yuda kahaluo ngafu handu ha huye wakohanyi wawekepfaamiṟa ubani kuwuka Geba mṟasa Beer-Sheba. Kawunduo handu ha huye ora lo kumoso lo kichumi kya mṟi handu kuwode shichumi shiwei njienyi yeida kichumi kya Yoshua mwitoṟi o mṟi.

⁹ Wakohanyi wo wawewainenge momu foshika rasio lya Mndumii-Ruwa kiidi kya Yerusalemu pfo kyaindi walelya mkate ilanjitarang'ashe waleinengo nyi wana wa mayawo.

¹⁰ Mangi Yosia kawefanyitsa ngafu handu heindia maruwa ha wongo hawehalahe Tofethi pichinyi lya wana wa Hinomu, kundu mndu oose alawone kechikoṟa mana oke o kisoṟo ang'u o kika kechimaya modonyi cha kiano kyake ko Moleki.

¹¹ Kaira frasi tsilya Mangi o Yuda awetsiwutie na isambuṟa tsiwe kidaso ko mnengeṟi kichuminyi kya mba ya Mndumii-Ruwa, kufui na kiṟiha kya Nathan-meleki kiwei kyahunyi, karumatsa na modo magari hose hawei pfo kipfa kya mnengeṟi.

¹² Rasio tsilya wamangi wa Yuda walewika mhambenyi fo kiṟiha kya huye kya Ahazi, hamu na rasio iya Manase alewika kiidi kya njosa tsiwi tsa mba ya Mndumii-Ruwa naletsiwunduo na itsipoṟipotsa, kiidima kakumba ifu lilya kiidi kya kimeda kya Kidroni.

¹³ Mangi kawefanyitsa ngafu handu heterewa hawei ora lo ngamenyi lo Yerusalemu kuhendesanyi na ora lo fumvu lya njonyamaṟo, handu mangi o Israeli awewikie kui kipfa kya Ashtarothi, kirumo kya Wasidoni, Kemoshi kiṟumo kya Moabu na ngoseṟa Milkomu kiṟumo kya Waamoni.

¹⁴ Kafunja ngo shitenoteno, kamanyamanya sanamu tsa Ashera, na handu halya tsiweinjihoṟotse kaichuṟa ho mafuo ha wandu.

¹⁵ Na ngoseṟa, kanyamaṟa, ipfo Betheli handu heterewia handu mangi Yeroboamu awewikie mana o Nebati ulya aletewa wandu wa Israeli wawute wunyamaṟi; kanyamaṟa rasio tso kawepaṟapaṟa maho hatso shipeṟengu peṟengu, kashisa mṟasa shikawa kiluli, kiidima kakoṟa sanamu ya Ashera.

¹⁶ Yosia kekihaluka kawona shipfu shiwei huya kifumvu, kaduma wandu wakaende mafuo hawei shipfunyi, kahakoṟia huya kitaṟa kedasia maruwa ha wongo hakasenekia, kafanyitsa ngafu rasio yo, kihianyi na idedo lya Mndumii-Ruwa alededa kui dumbu lya mwikimbi oke.

¹⁷ Mangi kawesa-se, “Mnaṟa fulya njifuwonyi kulya nyi fo wu?” Wandu wa mṟi wakamhaluo, “Nyi kipfu kya mndu o Ruwa acheye awuka Yuda na ihamba mbonyi tsi owuta iyo tsa rasio lya Betheli.”

¹⁸ Nao kawawasa, “Mlekenyi nakae o kulakoye mndu ose echiira mafuo hake.” Ko ikyo wakada ho mafuo hake, hamu na mafuo ha mwikimbi alecha awuka Samaria.

¹⁹ Kiidi kya orio mṟi fo Samaria mangi Yosia nalenyamaṟa handu heterewia maruwa ha wongo halewiko nyi wamangi wa Israeli, kundu wataluo na iruma Mndumii-Ruwa kawenyamaṟa rasio tso tsose chandu alewuta ipfo Betheli.

²⁰ Kawaha wakohanyi wose wa maruwa ha wongo huya shitaṟa shedasia handu waleṟundia kakoṟa mafuo hawo huya shitaṟasho. Kiidima kawuya na Yerusalemu.

Yosia alya Pasaka

²¹ Naaho mangi kawawasa wandu wose kehamba, “Wikienyi Mndumii-Ruwa, Ruwa onu, Pasaka, chandu kikiṟehie kitapunyi kya mkundana.”

²² Kuwode Pasaka ilemeindio na iliyo cha ii wokia kiheri kya wachili walechilia Waisraeli ma kiheri kya wumangi wo Israeli ma wo Yuda pfo.

²³ Kyaindi, kiidi kya maka fo ikumi na nyanya fo wuitoṟi wo Yosia, Pasaka ileliyo ko wuindi wo Mndumii-Ruwa kiidi kya Yerusalemu.

Mbonyi tsingi tsilewuto nyi Yosia

²⁴ Mangi Yosia kundu naidime iwuta wuwawaso wulya wuwei wuiṟehie kiidi kya kitapu kilya kilewono nyi mkohanyi menene Hilkia kiidi kya mba ya Mndumii-Ruwa le, nalefuna orukenyi lo Yuda na Yerusalemu, wasawi, waikimbi wa wongo, sanamu tsa maruwa ha wongo, na sanamu tsingi hamu na shindo shose shesuiṟa.

²⁵ Wokia Yosia alamewada wumangi na numa yake kuwode mangi awei chao, aleṟundia Mndumii-Ruwa ko mrima foke fose, na ngoo yake yose na pfinya tsake tsose kihendesanyi na wuwawaso wo Mose pfo.

²⁶ Ma kudo Mndumii-Ruwa aleda wuwawaso wo nyashi yake ing'anyi pfo, kipfa nyashi yake ilaaka kipfa kya Yuda ko mawuto hake hesuiṟa halewuto nyi Manase kipfa kya Ruwa.

²⁷ Na Mndumii-Ruwa kahamba, “Njechifuna wandu wa Yuda wawuke oshangunyi loko chandu njilewutia Waisraeli, njechileha mṟi fo Yerusalemu njiwefusambuṟie njechihamba, rina lyako lyechikaapfo.”

Mtsitsionyi fo wuitoṟi wo Yosia

²⁸ Mawuto hengi ha Yosia na shilya shose alewuta shishiṟehie kiidi kya kitapu kya mbonyi tsa Maheri ha Wamangi wa Yuda.

²⁹ Kiheri kya wumangi woke, Farao Neko o Misri kahenda mṟasa meda fo Eufrate kundu nakumbuhanane na Mangi o Ashuru. Nao mangi Yosia kakure kundu walimbane nao. Kyaindi Farao Neko kekimbona kambahia kulya Megido.

³⁰ Waṟundi wake wakaduo mnying'a foke kiidi kya igari wakambihiṟa Yerusalemu wakamṟika kipfunyi kyake amonyi. Wandu wa Yuda wakaduo Yehoahazi mana o Yosia wakamshia mafuda wakamshimbuo nawe mangi handu ha ndee.

Mangi Yehoahazi o Yuda

³¹ Yehoahazi nawemaiye maka makumi hawi na iṟaṟu (23) kawada wumangi, kaitoṟia meri iṟaṟu ipfo Yerusalemu. Mae nyiwe Hamutali mana o waka o Yeremia o Libna.

³² Yehoahazi kawuta mawicho oshangunyi lo Mndumii-Ruwa chandu wasahuye wake walewuta.

³³ Kundu nalaengeṟe iwada wumangi ipfo Yerusalemu, Farao Neko kampfunga ipfo Ribla kiidi kya oruka lo Hamathi, kawesa okamba oruka lo Yerusalemu kilo (3,400) tsa shindo sha fesa na kilo (34) tsa sahabu.

³⁴ Farao Neko kashimbuo Eliakimu mana o Mangi Yosia handu ha ndee Yosia, kailacha rina lyake kikawa Yehoyakimu. Kyaindi waleduo Yehoahazi kuleshe mṟasa Misri nyipfo alepfia.

Mangi Yehoyakimu o Yuda

³⁵ Mangi Yehoyakimu kainenga Farao fesa na sahabu, kyaindi kawesa oruka okamba kundu nainutsie kilya Farao akundi kya iinengo fesa. Nalewesa wandu wake fesa na sahabu. Orio umu nalewuta kiheo kilya kikiteṟie nyi mangi, nao kainengia farao Neko.

³⁶ Yehoyakimu nawewode maka makumi hawi na itanu (25) nyi lyo alewoka iwada wumangi, kaitoṟia ipfo Yerusalemu maka ikumi na fumu. Rina lya mae nyiwe Zebida mana o waka o Pedaya o Ruma.

³⁷ Yehoyakimu nalewuta mawicho oshangunyi lo Mndumii-Ruwa chandu wasahuye walewuta wose.