2WAMANGI 22 - Bibilia Kui Mdedie fo Kimochi

Mangi Yosia o Yuda

¹ Yosia nawewode maka nyanya awoka wuitoṟi ipfo Yerusalemu. Kaitoṟia maka makumi haṟaṟu na fumu (31). Mae oke nyi Yedida, mana o waka o Adaya, menyi o mṟi fo Boskati.

² Yosia kawuta shicha shichihiṟie Mndumii-Ruwa. Naleosha njotende tsa Dawidi awemsongoe, na iwada wuwawaso wo Mndumii-Ruwa kui osaaṟe.

Kitapu kya wuwawaso kyawoneka

³ Maka fo ikumi na nyanya (18) fo wuitoṟi wo mangi Yosia, mangi kaduma mṟehi Shafani mana o Azalia, mana o Meshulamu, kiidi kya mba ya Mndumii-Ruwa kechihamba,

⁴ “Henda ko mkohanyi ang'anyi Hilkia kundu naitale fesa tsileendo kiidi kya mba ya Mndumii-Ruwa, tsilesanyio na waringi tsiwuka ko wandu.

⁵ Wadambikio walya wawehoṟokia isungusia mba ya Ruwa kundu watae waaria walya wesungusia;

⁶ Waaria wa mashidi, waaria wewika mba kui maho, na ihuṟa mashidi na maho mapaṟe kipfa kesungusia mba.

⁷ Wandu wehoṟokia iṟunda lyi walaweso iwuta itala lya fesa tso wechidambikio, kipfa waṟunda natso kui wuhendeli.”

⁸ Nahong'u mkohanyi mnene Hilkia kawia mṟehi Shafani, “Ngawona kitapu kya mawawaso kiidi kya mba ya Mndumii-Ruwa.” Kiidima Hilkia kainengia Shafani kitapu nao kakisoma.

⁹ Mṟehi Shafani, kahenda ko mangi kamnenga mbonyi kechihamba, “Waṟundi wapfo walewuta fesa tsilewoneka kiidi kya mba, kiidima wakatsidambika ko waaria wo wehoṟokia isungusia mba ya Mndumii-Ruwa.”

¹⁰ Kyasia mṟehi Shafani, kawia Mangi “Mkohanyi Hilkia nanjiinenga kitapu.” Shafani kakisoma oshangunyi lo mangi.

¹¹ Mangi kekiicho madedo ha kitapu kya mawawaso karanduo maṟao hake.

¹² Naalyo kudi kawawasa mkohanyi Hilkia, Ahikamu mana o Shafani na Akbori mana o Mikaya hamu na Shafani na Asaya mṟundi o Mangi, kehamba.

¹³ “Hendenyi msoṟe mbonyi ko Mndumii-Ruwa handu hako na wandu wa Yuda wose kirianyi na madedo ha kitapu ki kilewoneka kipfa kya tuke ya Mndumii-Ruwa yaaka huyadu, kipfa wasahuyadu waleda walaindie madedo ha kitapu ki, na iinutsia shose shiwewaṟi.”

¹⁴ Ko ikyo Hilkia mkohanyi, Ahikamu, Akbori, Shafani na Asaya, wose walehenda ko mndu mka umu mwikimbi rina lyake nyi Hulda awei mka o Shalumu mana o Tikva, mana o Harhasi, moringa nguwo tsa hekalu. Maheri ho Hulda nawekekaa kiidi kya kihongo kya Yerusalemu, nawo wakadeda nao.

¹⁵ Kyasia kawawia, “Nyi wudi Mndumii-Ruwa, Ruwa o Israeli ahamba, wienyi icho amuduma koko.

¹⁶ Mndumii-Ruwa nahamba adi, ‘Njechiende mawicho hache handu ha na huye ya wose wekekaa iya chandu kitapu kilya kilesomo nyi Mangi ya Yuda.

¹⁷ Kipfa walenjida na ipfaamiṟia maruwa hengi ubani kundu wandu wanjipfulutse nyashi kui maṟunda ha mawoko hawo, kyasia, nyashi yako yechiakia Yerusalemu ma yechiwa ihutsopfo.

¹⁸ Kyaindi ko ora lo Mangi o Yuda ichu aleduma na ishiha mbonyi ko Mndumii-Ruwa, mbie kudi: Mndumii-Ruwa, Ruwa o Israeli nahamba adi kya madedo halya ulehaicho.

¹⁹ Kyamba kuletocha wunyamaṟi kowekunyiiṟa oshangunyi loko, mṟasa koranduo maṟao hapfo na ifihiṟa oshangunyi loko, ilyi kuleicho kilya njilehamba kya handu ha na wandu wa iya ke, kochiwa msefu na oseso, na inyi ngawekuicho da.

²⁰ Ko ikyo ambuya, njechikusanyia handu hamu na wa sahu wapfo na iyo nochihenda kipfunyi ko ofoṟo, meso hapfo hechiwona mawicho ha njechiende handu hapfo.’” Nahong'u wandu walya wakashitsia mangi Yosia mbonyi i.