2WAMANGI 21 - Bibilia Kui Mdedie fo Kimochi

Mangi Manase o Yuda

¹ Manase nawewode maka ikumi na iwi awooka iwada wumangi wo Yuda, kaitoṟia ipfo Yerusalemu ko maka makumi hatanu na itanu (55) na rina lya mae nyi Hefziba.

² Nalewuta shiwicho oshangunyi lo Mndumii-Ruwa kechiosha njotende njiwicho tsa wandu wa mkambo iya Mndumii-Ruwa aleifuna oshangunyi loke, kiheri Waisraeli waweida kiidi kya oruka lo kyasa.

³ Kipfa nalesaya handu heleṟia maruwa hengi alya handu Hezekia alewunduo ai ndee. Kawika rasio na shitaṟa shedasia Baali, kasungusia sanamu ya Ashera, chandu Ahabu alewuta mangi o Israeli. Kilashike, Manase katerewa na iindia shindo shose sha nginehu.

⁴ Kawika rasio kiidi kya mba ya Mndumii-Ruwa handu halya Mndumii-Ruwa alehambia, “Rina lyako lyechiindio kiidi kya Yerusalemu.”

⁵ Kiidi kya njosa tsiwi tsa mba ya Ruwa kawika rasio lyeindia nyenyeri.

⁶ Kawewuta mana oke nawe kidaso kemaya modonyi. Nalelasha, kawewesa mbonyi, kawadana na wahanga wa waṟumu na wasawi. Nalewewuta mawicho hafoi mnu oshangunyi lo Mndumii-Ruwa kamsuiṟa.

⁷ Sanamu iya ya Ashera aleisungusia kaiwika kiidi kya mba iya iya Mndumii-Ruwa alededa kyayo na Dawidi na mana oke Solomoni. “Kiidima kya mba i na mṟi fu fo Yerusalemu, njilefusambuṟa inyi handu njechiindio na iterewo mlungana.

⁸ Na kokoya Waisraeli wechiindia na iwuta shose njilewawasa na iosha mawawaso hose ha mṟundi oko Mose alewainengia, kyasiang'u njechilekia wafuno kiidi kya oruka wawuke oruka lu njileinengia wasahuyawo-pfo.”

⁹ Kyaindi wandu wa Yuda waleichopfo, Manase kawainenga iwuta wunyamaṟi ngoseṟa kota tsilya tsilewuto nyi mkambo iya ya wandu walenyamaṟo nyi Mndumii-Ruwa oshangunyi lo Waisraeli.

¹⁰ Naalyo Mndumii-Ruwa kadeda kui dumbu lya waṟundi wake wai waikimbi,

¹¹ “Kyamba mangi Manase o Yuda awuta mbonyi tsiterefutsie na iwichuṟa, mbonyi njiwicho kota tsilya tsilewuto nyi Waamori wawemsongoye, katewa wandu wa Yuda nawo wawute wunyamaṟi wechiṟunda na sanamu tsake.

¹² Kyasiang'u wulalu, inyi Mndumii-Ruwa, Ruwa o Israeli, ambuya njechiende kiwi kiwicho mnu huye ya Yerusalemu na Yuda na orio mndu mokiicho nechikangaṟika.

¹³ Njechihoṟuo Yerusalemu chandu njilewutia Samaria, na mangi Ahabu na oshari loke. Njechiangatsa Yerusalemu cha mndu aiangatsa kitela kisaye na ihongomitso.

¹⁴ Njiweleka iwo wawei wandu wa kyoṟa kyako wechitsuhaa na iwadambika ko wakituwa wawo, wawe cha nyama njilase na wawade shidenyi ko wakituwa wawo.

¹⁵ Njechiwawutia isho kipfa kya injinyamaṟia na injisuiṟa wokia wandee wawo wawuka Misri mṟasa inu.”

¹⁶ Ngoseṟa ya isho, da kya wunyamaṟi wotewa wandu wa Yuda inyamaṟa na iwuta mawicho oshangunyi lo Mndumii-Ruwa, Manase nalewaha wandu wafoi walawode mti, itane samu yaichuo ora lumu lo Yerusalemu ikahaukia ora lungi.

¹⁷ Mawuto hengi ha Manase na shose alewuta, hamu na manyamaṟo hake, haimaṟehie kiidi kya kitapu kya Maheri kya Wamangi wa Yuda.

¹⁸ Manase kapfa kaṟiko demenyi lyake amonyi, kiidi kya njauha ya Uza. Amoni mana oke kaitoṟia handu hake.

Mangi Amoni o Yuda

¹⁹ Amoni nyi awemaie maka makumi hawi na iwi (22) awooka wumangi, kawada wumangi ipfo Yerusalemu maka iwi. Rina lya mae nyi Mushulemethi, mana o waka o Haruzi o Yothba.

²⁰ Kawuta mawicho hesuiṟa Mndumii-Ruwa chandu ndee Manase alewuta.

²¹ Naleosha njotende tsose tsa ndee tseindia sanamu tsilya ndee aweketsiṟundia na itsihoneria.

²² Kaleha Mndumii-Ruwa, Ruwa o wasahuye wake, nalawadane na chile tsa Mndumii-Ruwa.

²³ Numa waṟundi wa Amoni wakaṟiinga wakambaha ai mbenyi yake amonyi.

²⁴ Kyaindi wandu wa Yuda wakawaha wose walewaha Amoni. Kiidima wandu wo wa Yuda wakashimbuo Yosia mana oke nawade handu ha wandie.

²⁵ Mawuto hose hengi ha Amoni haimaṟehie kitapu nyi kya Wamangi wa Yuda.

²⁶ Amoni kaṟiko kiidi kya shipfu shii demenyi lya Uza. Yosia mana oke kawada wumangi handu hake.