2WAMANGI 20 - Bibilia Kui Mdedie fo Kimochi

Iluo na ichia lya mangi Hezekia

¹ Mandi ho Hezekia kaluo kashika kufui na ipfa. Naalyo mwikimbi Yesaya mana o Amosi kamhendia kambia, “Mndumii-Ruwa nahamba adi, ‘Achikia mbonyi tsa mba yapfo necha kipfa na kikaki nochipfa ukiapfo.’”

² Hezekia kahalukia omombo katerewa Ruwa kechihamba,

³ “Hoi Mndumii-Ruwa ngakuterewa ukumbuo chandu njilekuṟundia kui wuhendeli wose na kui mrima foko fose na iwuta chandu uwekundi sumuhana na iyo.” Hezekia kafihiṟa amsokie nyi fowa.

⁴ Kyaindi Yesaya alamemarise osa lo makidihawi, idedo lya Mndumii-Ruwa likamchea lyehamba,

⁵ “Wulalu wuya uwie Hezekia mnene o wandu wa Mndumii-Ruwa; Inyi Mndumii-Ruwa, Ruwa o sahuyapfo Dawidi, ngaicho kiterewo kyapfo ngawewona na mchenyeṟe yapfo. Njechikuchiṟa na numa ya mfiri iṟaṟu nochihenda mbenyi ya Mndumii-Ruwa.

⁶ Njechikuengeṟia maka ikumi na itanu (15) yekaa na moo. Njechikukiṟa iyo hamu na mṟi fu mawokonyi ha mangi o Ashuru. Nechiringia mṟi fu kipfa kya wuitoṟi woko inyi na kipfa kya mṟundi oko Dawidi.”

⁷ Kyasia Yesaya kahamba, “Endenyi indasi lya ndunda tsa tini mliwike handu ho hawode ode kundu nachie.”

⁸ Hezekia kawesa Yesaya, “Nyi kichano kida kenjiloṟa ke lohi Mndumii-Ruwa nyechinjichiṟa na mfiri fo kaṟaṟu njechiidima ihenda mbenyi ya Mndumii-Ruwa?”

⁹ Yesaya kamhaluo, “Iki nyikyo kichano kyapfo kiwukie ko Mndumii-Ruwa, ke Mndumii-Ruwa nyi echiwuta chandu awikie kyasa: Ngesa, kiṟinje kihende ndifo ikumi kusonguo ang'u numa?”

¹⁰ Hezekia kamhaluo, “Kikiangu ngoseṟa itana kiṟinje kihende kusonguo ndifo ikumi! Wulalu kikewuya nduma ndifo ikumi.”

¹¹ Yesaya katerewa Mndumii-Ruwa, nao Mndumii-Ruwa katana kiṟinje kiwuye nduma ndifo ikumi kiidi kya ngasi iwenjiwike nyi Ahazi.

Wadume wawuka Babuloni

¹² Kiheri naakyo, Mangi Merodak-baladani mana o Baladani mangi o Babuloni naleicho ke Hezekia naweluo na wulalu nalechia, kamdikia ndumi na shindo sa shing'anyi.

¹³ Kyasia, Hezekia kawaambia kawaloṟa masaa hake: mba yake ya kisa, fesa, sahabu, shindo shewika shelyenyi shichie, mafuda ha wuhuru na mba ya shihia shose na shisha sha wekapana shida na shindo shose shiwei kiidi kya shikumbi shake shing'anyi. Kuwewode kindo kyose kiidi kya mba ang'u orukenyi alalewaloṟapfo.

¹⁴ Naalyo lyienyi Yesaya kahendia Mangi Hezekia kambesa, “Wandu wa wahamba ki? Wacha wawuka ku?” Na Hezekia kamhaluo, “Wanjichea wawuka oruka lo kuleshe.”

¹⁵ Kiidima kambesa, “Nyi kiki wawona kiidi kya mba i yapfo ya wumangi?” Hezekia kamhaluo, “Wawona shose shii kiidi kya mba yako ya wumangi. Ma kuwode kindo kyose kii kiidi kya shikumbi shako shing'anyi njilawaloṟapfo.”

¹⁶ Naalyo Yesaya kawia Hezekia, “Adanyia idedo lya Mndumii-Ruwa.

¹⁷ Ambuya mkonu ikeri icha na shindo shose shii kanyi kopfo na shindo shose shilesanyio nyi wandee wapfo mṟasa Maheri ha ha wulalu shechidao mṟasa Babuloni. Kuwode kindo kechitsuhaa pfo; nyi wudo Mndumii-Ruwa ahamba.

¹⁸ Ngoseṟa kiidi kya wana wapfo wa kisoṟo maata wedao wapfungo, nawo wechiwa wanzenge kiidi kya mba ya mangi o Babuloni.”

¹⁹ Na Hezekia kawia Yesaya, “Idedo lya Mndumii-Ruwa chando ahamba nyi necha.” Nalehamba ado kipfa nalekusaṟa, “Kitewe kilechiwa kido nyi kiki, kokoya kochiwada ofoṟo na kiringo kiidi kya mafiri ha wumangi woko.”

Mtsitsionyi fo wuitoṟi wo Hezekia

²⁰ Mawuto hengi ha Hezekia, wukahari woke na mbonyi tsingi chandu alewika nduwa na isuma mfongo yeende mṟinga mṟinyi, shiṟehie kiidi kya kitapu kya mbonyi tsa Ngumbuo tsa Wamangi wa Yuda.

²¹ Hezekia nalepfa, na Manase mana oke kaitoṟia handu hake.