2WAMANGI 2 - Bibilia Kui Mdedie fo Kimochi

Elia adao Ruwehu

¹ Kikashika kiheri Mndumii awekundi iduo Elia ruwehu kui otanu lo kiwiriwiri, Elia na Elisha wawei njienyi wechiwuka Gilgali.

² Elia kawia Elisha, “Hoi kekaa iya kipfa Mndumii nanjiduma njihende Betheli.” Elisha kahamba, “Chandu Mndumii ai na moo na ngoo yapfo naawo, njekulekapfo.” Kyasia, wakasoka wose mṟasa Betheli.

³ Kyasia, wana wa waikimbi wawei Betheli, wakahenda iwonana na Elisha, wakambia, “Ngesa na uichi, ke Mndumii naduo msoṟo opfo inu, nalawe ang'anyi kopfo?” Kahamba “Ee, njiichi, tsienyi sau.”

⁴ Elia kawia Elisha, “Hoi kaa iya Elisha, kipfa Mndumii nanjiduma njihende mṟasa Yeriko.” Kyaindi Elisha Kahamba, “Chandu Mndumii ai na moo, na ngoo yapfo naawo, njekulekiapfo.” Nawo wakashika Yeriko.

⁵ Kyasia wana wa waikimbi, wawei Yeriko, wakatikiria afui na Elisha wakambia, “Ngesa na uichi ke Mndumii naduo msoṟo opfo inu, nalawe ang'anyi kopfo?” Kyaindi Elisha kahamba, “Ee njiichi, tsienyi sau.”

⁶ Elia kambia, “Hoi kaa iya, kipfa Mndumii nanjiduma njihende Yordani.” Kahamba, “Chandu Mndumii ai na moo na ngoo yapfo njechikulekiapfo.” Wakahendesana wose wawawi.

⁷ Kyasia wandu makumi hatanu na wana walya wa waikimbi wakahenda ihoṟoka, maambatsana ko kuleshe, na iwo wawi wakahoṟoka kufui na Yordani.

⁸ Elia kawuta nguwo yake ya huye, kailema, kalachuo mṟinga, fukahawikana kunu na kunu, na iwo wawi wakaambada ha hadutsu.

⁹ Kikawa wekiidima iambada, Elia kawia Elisha, “Terewa koko kyose ukundi njikuwutie, ili njilamewuto kopfo.” Elisha kahamba, “Ngaterewa keenga kawi kya mumuyo fopfo funjikaye.”

¹⁰ Kyasia Elia Kahamba, “Noterewa kindo kiumu, kyaindi nochiambilia ikyo oterewa konjiwona ili njechiwuto kopfo, kyaindi ulamenjiwona njechiwuto kopfo ochinengo kindo pfo.”

¹¹ Kikawa kiheri wawehendesana wechideda, ambuya: kukacha igari la modo na frasi tsa modo, likawaletsana wa wawi, nao Elia kado ruwehu na otanu lo kiwiriwiri.

¹² Nao Elisha kawona, kafihiṟa, “Ndeako, ndeako, igari lya Israeli na wedo frasi wake.” Alakimbonese piu. Kawada nguwo tsake amonyi karanduo njohawi tsiwi.

¹³ Kiidima kaira ikonya lya Elia lilemwolokia, kawuya kahoṟoka wambaṟa ya Yordani.

¹⁴ Kawada nguwo iya ya Elia ilemwolokia, kalachuo mṟinga kahamba, “Oku Mndumii-Ruwa o Elia.” Nao kiheri alelachuo mṟinga fulya, fukahawikana kunu na kunu, Elisha kaambada.

¹⁵ Na wana walya wa waikimbi wawei Yeriko maambasana, wekimbona walehamba, “Mumuyo fo Elia fui huya Elisha.” Wakacha iwonana nao, wakahongoma mbele yake.

¹⁶ Wakambia, “Ambuya iya kuiho na waṟundi wapfo wandu makumi hatanu wakari, lokuterewa wahende ishiha mndumii opfo, kilawe kofia mumuyo fo Mndumii fomrakuo na imkumba huya fumvu ang'u pichi limuho.” Kahamba, “Mulawadume.”

¹⁷ Wakamiitika mnu mṟasa kaṟeenze, kawawia, “Kyasia wadumenyi.” Nao kaduma wandu makumi hatanu (50), nawo wakamshiha mkonu iṟaṟu, walakimbone.

¹⁸ Wakaambuya, katirima alya Yeriko, kawawia, “Ngesa inyi njilemuwia mulahende?”

Maṟiho ha Elisha

¹⁹ Kyasia wandu wa Yeriko wakahendia Elisha wakambia, “Ambuya, chandu iyo Mndumii odu awonyi, mṟi fu fumcha, kyaindi mṟinga fu fumcha pfo, foketewa mbeu tsa madema hadu tsilado.”

²⁰ Elisha kawawia, “Njiendienyi kitela kihya, muwike ho monyo.” Wakamdaaya.

²¹ Kakure mṟasa kashika sokenyi ya mṟinga fulya, kakumba monyo fulya kulya mṟingenyi kahamba, “Mndumii nahamba adi, ‘Ngachiṟa mṟinga fu; kochiwada opfu ma mashinu se pfo.’”

²² Mṟinga fulya fukachia mṟasa inu, chandu idedo lya Elisha alehamba.

²³ Kawuka pfo kado mṟasa Betheli, nao kiheri aweihenda kukacha wanake wa mṟinyi wakamtaluo, wechihamba, “Kure iya iyo nyi kilohaa! Kure iya iyo nyi kilohaa .”

²⁴ Kaing'uṟu kawawona, kawasesa kui rina lya Mndumii. Oweṟe kukacha ngaṟe tsiwi njika tsiwuka ngeṟenyi, tsikatafuotafuo wanake walya makumi haana na wawi (42) kiidi kyawo.

²⁵ Kakurepfo kahenda fumvuhu lya Karmeli, kawukapfo kawuya mṟasa Samaria.