2WAMANGI 19 - Bibilia Kui Mdedie fo Kimochi

Mangi aterewa oloho ko Yesaya

¹ Kyasia, mangi Hezekia kekiicho mbonyi tso, karanduo nguwo tsake, kaṟaa ikunyia kahenda mba ya Mndumii-Ruwa.

² Kawawasa Eliakimu mnene o mba ya Mangi, Shebna, mṟehi, na wameeku wa wakohanyi, wahende ko mwikimbi Yesaya mana o Amosi, waṟee makunyia.

³ Nawo wakawia Yesaya, “Hezekia nahamba adi, ‘Inu nyi mkonu fo fowa, fo idedio na imino. So nyi lui cha mndu mka akundi iendio mana kyaindi alawode pfinya yefee.

⁴ Kofia kechiidimika ke Mndumii-Ruwa, Ruwa opfo naleicho madedo ha mnene o wanzenge, ichu aledumo nyi mangi o Ashuru, mndumii oke, kundu narume Ruwa menyi moo, na Mndumii-Ruwa, Ruwa opfo nechideda kya madedo ho alehaicho, ko ikyo terewia wandu wa waletsuhaa.’”

⁵ Kyasia waṟundi wo wa Mangi Hezekia wekishika ko Yesaya,

⁶ nalewawia, “Wienyi mndumii onu ke Mndumii-Ruwa nahamba adi, ‘Kulaowuo kya madedo ho ulehaicho ha waṟundi wa mangi o Ashuru walehadeda injitaluo.

⁷ Ambuya njechitewa mangi o Ashuru naicho mtiṟi fo shida, nduma nawuye na orukenyi loke na ipfo njechimbaha kui oshu.’”

Waashuru waoweshase

⁸ Kyasia mnene ulya o wanzenge kekiicho ke mangi o Ashuru nawekurie Lakishi, nalehenda kamkoya kechikapa mṟi fo Libna.

⁹ Kiidima mangi kekiambia mbonyi ke Tirhaka mangi o Ethiopia nakeri icha ikapana nao, naledika ndumi ko Hezekia, kehamba,

¹⁰ “Wienyi Hezekia mangi o Yuda, ‘Ulaidikie Ruwa chu opfo ukumsirie nakulembe kui kyasa ke Yerusalemu yechiwado nyi mangi o Ashurupfo.

¹¹ Iyo kulemeicho chandu wamangi wa Ashuru walewutia njoruka tsingi na itsirumatsa kichikichi. Ngesa, nokusirie iyo nochikia?

¹² Ngesa, maruwa ha mkambo halekiṟa Gozani, Harani, Resefu na Waedeni wawei Talasari, mkambo fo wandu walearisika waariso nyi wasahu wako?

¹³ Weku wamangi wa Hamathi, Arpadi, Sefarvaimu, Hena na wako Iva?’”

¹⁴ Mangi Hezekia naleambia paruo iwuka ko walya wawewadume kaisoma. Nahong'u kahenda mbenyi ya Mndumii-Ruwa, kaileṟia ko Mndumii-Ruwa ipfo mbenyi yake.

¹⁵ Katerewa Mndumii-Ruwa kechihamba, “Hoi Mndumii-Ruwa, Ruwa o Israeli, iyo okekaa kiidi kya loṟika lo wuitoṟi huye ya shiwike shose shiwode makungo, nyi iyo tupu ui Ruwa, uitoṟie mangi tsose tsa wuyana.

¹⁶ Hoi Mndumii-Ruwa, tambaṟuo meso hapfo nowone, deha kudu lyapfo noicho shirumo sha ngafu shose Senakeribu aledika ikuruma iyo Mndumii-Ruwa Menyi Moo.

¹⁷ Hoi Mndumii-Ruwa, na lohi da ke wamangi wa Ashuru walearisia wanda wandu wa mkambo na njoruka tsawo.

¹⁸ Wakaṟukuta maruwa hawo modonyi kipfa halawei maruwa ha lohi, kyaindi nyi mmbe sanamu tsa mashidi na maho hamapache kui mawoko ha wandu.

¹⁹ Na wulalu, hoi Mndumii-Ruwa, Ruwa odu, ngakuterewa nolukiṟe ipfo njaenyi tsa Senakeribu, kundu mangi tsose tsa wuyana tsimanye ke iyo kumonyi tichi nyi iyo ui Mndumii-Ruwa, ui Ruwa.”

Ndumi ya Yesaya ko Mangi

²⁰ Naalyo Yesaya, mana o Amosi kadika ndumi ko Hezekia kehamba, “Nyi wudi Mndumii-Ruwa,” Ruwa o Israeli ahamba, “Ngameicho kiterewo kyapfo koko kirianyi na Senakeribu mangi o Ashuru.

²¹ Ilyi nyilyo idedo lya Mndumii-Ruwa alelideda kya Senakeribu: ‘Manachu o Sioni nakumina na ikutaluo, nadihinyitsa mdo foke numa yapfo.

²² Ngesa, ichu aweikupiṟa na ikutaluo nyiu? Nyiu akeri ikuiria ṟu na ituluya meso ha orikiki? Huye ya mwele o Israeli.

²³ Kipfa keduma ndumi yapfo nopiṟa Mndumii, iyo nohamba, kui magari hako hafoi ha shida, njiledo mṟasa owerihu lo mafumvu, mṟasa owerihu lo Lebanoni. Ngamanya meresi yake njileshe, na maopanyi mecha; ngaida mṟasa kiidi kya ngeṟa yake ing'anyi.

²⁴ Ngasuma maṟungu ha mṟinga nganyo mṟinga mhenu, njileumiṟa meda yose ya Misri, kui njayo tsa madende hako.

²⁵ ‘Ngesa, ulemeicho, ke njileṟeheṟa mbonyi i wokia kuwoka? Kindo njikeri ikiwuta wulalu njilekiṟeheṟa kacha? Njilekuwika nowike mṟi iwode Otiriwa kui mhanda fo Osami.

²⁶ Wenyi wawo waleheli, wakangaṟikie na iiṟewe, wakawa cha maṟa ha mdemenyi, cha maṟa halawode pfinya. Cha maṟa hadoiye mmbehu, hekeuma halameng'ane.

²⁷ Njiichi idamia lyapfo, na ikure lyapfo na iida lyapfo; na chandu ukuṟehiṟie kihadi na inyi.

²⁸ Chandu ukuṟeheṟie kyako, ngaweicho na wupoṟu wo madedo hapfo, njechiwa kimenya kedeha makunga mbuonyi yapfo. Na menya yeduo frasi dumbunyi lyapfo njikuwihiṟe na njia iya iya ulechea.’”

²⁹ Kyasia Yesaya kawia adi mangi Hezekia, “Na kechiwa kichano kyapfo Hezekia maka fu na ifo fuicha, mochilya kilya kechialuka kienyi kilawode kyawayo. Indi maka fo kaṟaṟu mochiwaya na isambuo shilimu, mochiwaya msabibu muwelya ndunda tsayo.

³⁰ Walya wechitsuhaa wa oshari lo Yuda wechipfumbuka na iwa wafoi chandu ikidi lyekewuta mri ifoi terinyi na ikumbia ndunda tsifoi huye.

³¹ Kipfa kuwode wandu wechitsuhaa ipfo Yerusalemu, ee, ipfo fumvuhu lya Sioni kochiwadapfo wandu waangu wechikia, kipfa Mndumii-Ruwa nakusirie iinutsia isho.

³² “Ko ikyo Mndumii-Ruwa nahamba adi kya mangi o Ashuru: ‘Echiidima iida kiidi kya mṟi fu na ifulasa na mfi ma echiida napfo arie ngawo pfo ma echifutengetia pfo.

³³ Nechiwuya na njia iya iya aleichea ma echiida kiidi kya mṟi fu pfo.’ Nyi wudo Mndumii-Ruwa ahamba.

³⁴ ‘Ee kipfa kya wuitoṟi woko inyi na kipfa kya mṟundi oko Dawidi njechiringa na ikiṟa mṟi fu.’”

³⁵ Kyasia, kio naakyo malaika o Mndumii-Ruwa kaida kiidi kya mamiingi fo Waashuru wawekuwumbie kawaha wandu shiku ihana (100,000). Komekya wandu wakakure, iwo wose walewono nyi mnying'a.

³⁶ Kyasia Senakeribu mangi o Ashuru kakure kahenda Niniwe kakaapfo.

³⁷ Mfiri fumu kiheri Senakeribu awekeri iterewa kiidi kya mba ya Nisroki ruwa oke, wanake wake wawi, Adrameleki na Sharezeni walembaaha kui oshu, kiidima wakadichia oruka lo Ararati. Na Esarhadoni, mana oke kawada handu hake.