2WAMANGI 18 - Bibilia Kui Mdedie fo Kimochi

Mangi Hezekia o Yuda

¹ Kiidi kya maka fo kaṟaṟu fo wuitoṟi wo Hoshea mana o Ela mangi o Israeli, Hezekia mana o Ahazi mangi o Yuda nalewoka wuchili.

² Nawewode maka makumi hawi na itanu (25) awoka wumangi. Kachilya maka makumi hawi na kenda (29) ipfo Yerusalemu. Rina lya mae nyi Abi, mana o waka o Zekaria.

³ Kawuta mecha oshangunyi lo Mndumii-Ruwa cha sahuye oke Dawidi.

⁴ Nalenyamaṟa handu hose heindia maruwa ha wongo na ifunja ngo tsa ichangala lya Ashera. Kafunjafunja sanamu ya njoka iya ya aṟeṟa Mose aleisungusia yelaho nyi Nehushtani. Mṟasa kiheri kyo, wandu wa Israeli wawekeidasia.

⁵ Hezekia nawekusirie Mndumii-Ruwa, Ruwa o Israeli; kuwewode mangi awei chao kiidi kya wamangi wa. Yuda wawesongoye ang'u numa yake pfo.

⁶ O aledekio Mndumii-Ruwa ma aleda alamwosha pfo, nalewada mawawaso ha Mndumii-Ruwa awewawasie Mose.

⁷ Kyasia Mndumii-Ruwa kawa hamu nao, kamtarama orio kindo alewuta. Kalekana na mangi o Ashuru kaleha imṟundia.

⁸ Nalekapa Wafilisti mṟasa mṟi fo Gaza na oruka luwetengetie wokia mnaṟa fo waringi mṟasa mṟi fuwode otiṟiwa.

⁹ Kiidi kya maka fo kana fo wuitoṟi wo Hezekia, nafo fuwei maka fo mfungade fo wuitoṟi wo Hoshea mana o Ela mangi o Israeli; Shalmanesa mangi o Ashuru kakapa mṟi fo Samaria na ifuṟingicha.

¹⁰ Mtsitsionyi fo maka fo kaṟaṟu, Waashuru wakaduo mṟi fo Samaria. Kiwekeri kiidi kya maka fo kaṟandaṟu fo wuitoṟi wo Hezekia na maka fo kenda fo wuitoṟi wo Hoshea mangi o Israeli, nalyo mandi Samaria fuledao wupfungo.

¹¹ Mangi o Ashuru kaduo wandu wa Israeli wupfungo mṟasa Ashuru kawewika wengi kiidi kya mṟi fo Hala, na kufui na Habori, mṟi fo Gozani, na wengi kiidi kya mṟi ya Media.

¹² Kipfa Waisraeli walekunda iindia ṟu lya Mndumii-Ruwa, Ruwa owo pfo, walefunja mkundana foke, walakunde iicho ma india shilya Mose, mṟundi o Mndumii-Ruwa alewawasa.

Waashuru waowesha Yerusalemu

¹³ Kiidi kya maka fo ikumi na kana fo wumangi wo Hezekia, mangi Senakeribu o Ashuru nalekapa mṟi yose iwode otiṟiwa ya Yuda na iiduo.

¹⁴ Hezekia kadika ndumi ko Senakaribu ipfo Lakishi kembia, “Ngadeko ulakuso keda ngapano yapfo na inyi, njechikutaa kyose ukundi.” Mangi o Ashuru kawawasa Hezekia nameendie fesa ishikie tani ikumi na sahabu tani imu.

¹⁵ Hezekia kamdikia fesa yose mbenyi ya Mndumii-Ruwa na kiidi kya kisa kya mba ya Mangi.

¹⁶ Ngoseṟa, kakuṟuo sahabu iwei kiidi kya mongo ya hekalu lya Mndumii-Ruwa na sahabu iya o amonyi aweiwikie ichopa nayo mongo yose kadaaya Senakeribu.

¹⁷ Mangi o Ashuru naalyo kaduma mnene o shida ang'anyi na mnene o wanzenge hamu na wandu wafoi wa shida wawuke Lakishi ihenda ko mangi Hezekia ipfo Yerusalemu. Wakawada kyaṟo wakashika Yerusalemu. Wekiafukia, wakaida napfo wakahoṟoka hafui na mfongo fo nduwa fuwei ora lo huye kiidi kya njia ing'anyi ihendie kundu ko laho “Uwanda wo Dobi.”

¹⁸ Wekilaha Mangi Hezekia wakaambio nyi Eliakimu mana o Hilkia, awei mohoṟokia mba ya mangi, Shebna awei moitala na Yoa mana o Asafu mṟehi o Maheri.

¹⁹ Naalyo mnene o Wanzenge kawawia, “Wienyi Hezekia kudi, ‘Mangi ang'anyi o Ashuru nahamba adi, Nyi kikusirio kida akusirie ho?’

²⁰ Ngesa nyi ukusirie madedo ha wulya nyi ho wuṟango na pfinya kiidi kya shida? Nyi ukusirie nau itane onjimina?

²¹ Ambuya wulalu nyi ukusirie Misri, olio lufunjikie lochitocha owoko lo oose molukusiria. Nyi wudo Farao mangi o Misri ai ko walya wose wakusirie koke.

²² Kyaindi ma kokoya monjiwia lukusirie Mndumii-Ruwa, Ruwa odu? Manyenyi ke nyi Ruwa chu Hezekia alenyamaṟa handu ha huye na rasio lyake na iwia wandu wa Yuda na wandu wa Yerusalemu waterewe na iindia oshangu lo rasio lya Yerusalemu.”

²³ Kyasia, wadanenyi na Mndumii oko mangi o Ashuru, inyi njechimuinenga frasi shiku shiwi kokoya mochiidima iwona weduo frasi.

²⁴ Nyo muwode ma pfinya yekapana ma na msongoru umu mtutu o Waaramu pfo, nyi wuda mukeri iwedia Wamisri wawadikie magari ha shida na wedoya frasi!

²⁵ Ngoseṟa, mukusaṟie ke ngacha njilawode wuwawaso wo Mndumii-Ruwa kundu njikape na irumatsa oruka lu? Mndumii-Ruwa nyio alenjiwia, ‘Kapa oruka-lu nolurumatse.’”

²⁶ Kyasia, Eliakimu mana o Helkia, Shebna na Yoa wakawia wadi mnene o wanzenge, “Kededa naso kui mdedie fo Kiaramu, kipfa lufuichi, uladede naso Kiebrania kipfa wose wai mawandenyi weicho.”

²⁷ Mnene ulya o wanzenge kawawia, “Ngesa mndumii oko nanjiduma njihambe mbonyi ii ko mndumii onu na konu tupu? Ngesa anjidumie na ko wandu wekekaa mawandenyi wai waanduye hamu nanyo ilya madifi hawo wawenyi na inyo mahuamo hawo wawenyi?”

²⁸ Kiidima mnene cho o wanzenge kapoṟohoṟa na ṟu ling'anyi kadeda kui kishomo kya Kiebrania, “Adanyienyi madedo ha mangi mnene, Mangi o Ashuru!

²⁹ Mangi nahamba adi, mulaidikie ilembo nyi Hezekia, kipfa alechiidima imuwuta mawokonyi ha mangi.

³⁰ Mulaidikie namulembe kundu mukusirie Mndumii-Ruwa, kechihamba, ‘Mndumii-Ruwa nechilukiṟa na mṟi fu fochiwado nyi mangi o Ashuru pfo.’

³¹ Mulaadanyie Hezekia, kipfa o mangi o Ashuru nahamba, ‘Muwade ofoṟo na inyi, kudambikienyi koko. Mukawuta mudo orio umu onu nechiidima ilya ndunda tsa msabibu foke na ndunda tsa mashidi ha mkuyu foke amonyi na mṟinga fo ṟungu lyake amonyi,

³² mṟasa ili njechicha na iwaduo kuleshe orukenyi lungi cha ilu, oruka luwode kilimu na mvinyo, oruka luwode mkate na madema ha msabibu; oruka lo msinepfu na wuki, kundu mukae na moo mulashike ipfa.’ Mulaadanyie Hezekia kemulemba na madedo ha wongo kechihamba, ‘Mndumii-Ruwa nechiluringa.

³³ Ngesa, kuwode oose kiidi kya maruwa ha mkambo halemeidima ikira oruka owokonyi lo mangi o Ashuru?

³⁴ Maruwa halya ha Hamathi na Arpadi heeku? Maruwa ha Sefarvaimu, Hena na Iva heeku? Ngesa halekiṟa Samaria na owoko loko?

³⁵ Nyiu kiidi kya maruwa ha njoruka tsi alekiṟa njoruka tsawo kiidi kya owoko loko kitewe Mndumii-Ruwa naidime ikiṟa mṟi fu fo Yerusalemu?’”

³⁶ Kyaindi wandu wose waletsia do! Walamhaluo ma idedo limu chandu walewawaso nyi mangi Hezekia, kechihamba, “Mulamhaluo.”

³⁷ Kyasia Eliakimu mana o Hilkia, Shebna mṟehi na Yoa mana o Asafu mṟehi wakahendia Hezekia waṟee nguwo tsirandukie, wakamwongoya madedo hose ha mnene ang'anyi o mbahanyi.