2WAMANGI 17 - Bibilia Kui Mdedie fo Kimochi

Mangi Hoshea o Israeli

¹ Kiidi kya maka fo ikumi na kawi fo wumangi wo Ahazi o Yuda, Hoshea mana o Ela nalewoka ichilia Israeli; kachilia ipfo Samaria ko maka kenda.

² Nalewuta wunyamaṟi ko Mndumii-Ruwa kyaindi chi cha wamangi wa Israeli wawemsongoe pfo.

³ Mangi Shalmanesa o Ashuru nalekapana nao na Hoshea kawa mṟundi oke kawa momtaa okamba.

⁴ Kyaindi kiheri kimu Hoshea kadika ndumi ko mangi o Misri yeterewa ndarama, naalyo kada alatae okamba ko Mangi Shalmanesa o Ashuru chandu aweichiwie iwuta orio maka. Shalmanesa kekiwona ado nalepfunga Hoshea ko mshe kamkumba kipfungonyi.

Ilemo lya Samaria

⁵ Kiidima Mangi o Ashuru kawada oruka lose ko pfinya itane mṟi fo Samaria. Kafutengetia handu ha maka iṟaṟu.

⁶ Kiidi kya maka fo kenda fo wumangi wo Hoshea, mangi o Ashuru kaduo Samaria, kaduo wandu wa Israeli wapfungo mṟasa Ashuru, wandu maata kawawika mṟinyi fo Hala, na wengi afui na meda Habori, meda Gozani na wengi mṟi ya Media.

⁷ Ishi shose shilewutika kipfa wandu wa Israeli waledekio Ruwa Mndumii owo, ichu alewawuta Misri owokonyi lo Mangi, o Misri, wakaindia maruwa hengi

⁸ na iosha mawuto na njia tsa wandu wa mkambo iwo Ruwa alewafuna oshangunyi lowo, wakawewuta mawuto ha wamangi wa Israeli walehaende orukenyi lowo.

⁹ Wandu wa Israeli wakawuta mawuto mawicho ko kiṟika oshangunyi lo Mndumii-Ruwa, Ruwa owo. Walewika handu heterewia maruwa ha wongo kiidi kya orio mṟi, wokia mnaṟa fo waringi itane mṟi fuwode otiṟiwa.

¹⁰ Huye ya orio kifumvu na wanda ya orio ikidi liwode maṟa mawishi, wakawika ngo tsa maho na sanamu tsa ruwa o kika elaho nyi Ashera.

¹¹ Na ipfaamiṟa ubani ipfo rasionyi tsose tsa maruwa ha wongo na iosha kido kya wandu wa mkambo iwo Ruwa alewafuna. Wakasuiṟa Mndumii kui mawuto hawo mawicho.

¹² Wakaindia sanamu tso Mndumii-Ruwa awewaimie kechihamba, “Mulawute mudo.”

¹³ Mndumii-Ruwa kaduma waikimbi na walya wewona kechitutuma Israeli na Yuda kechihamba, “Lekanenyi na njia tsanu njiwicho, muindie mawawaso hako chandu njilewia wandeanu ngawaikimba kui madumbu ha waṟundi wako wai waikimbi.”

¹⁴ Kyaindi walakunde iicho, wakaumiṟa mrima yawo cha wasahuyawo walawekundi iidikia Mndumii-Ruwa, Ruwa owo.

¹⁵ Wakaleha iwada wuwawaso woke, walawade mkundana fulya alewutia wasahuyawo hamu na wapiṟi wopiṟa itutumo, waleindia sanamu tsilawode kiira nawo wakaosha wandu wa mkambo walya wawewatengetie; walepiṟa piu mawawaso ha Mndumii-Ruwa, ma waleambuya pfopfo.

¹⁶ Walaindie mawawaso hose ha Mndumii-Ruwa, Ruwa owo, wakasungusia sanamu tsa maruwa ha mahache hawi hesalaṟa, wakawesungusia sanamu tsa ruwa o kika Ashera wakaindia shindo shose sha nginehu na iṟundia Baali.

¹⁷ Waledasa wana wawo wa kisoṟo na wa kika ko maruwa ha wongo, wakadumbuo iosha wehamba shisuku na wasawi wakakuwika pfinya yewuta mawicho oshangunyi lo Mndumii-Ruwa, wakamsuiṟa mnu nakamu.

¹⁸ Kyasia Mndumii-Ruwa kapfuluko nyashi kipfa kya wandu wa Israeli, kawafuna kuchu wawuke oshangunyi loke, nalade mndu ma umu sile oshari lo Yuda luwenyi.

¹⁹ Kyaindi ma kudo wandu wa Yuda waleindia mawawaso ha Mndumii-Ruwa, Ruwa owo pfo, indi waleosha mbuka tsilya tsileendo na wandu wa Israeli.

²⁰ Mndumii-Ruwa naleleha Waisraeli wose. Kawada mawokonyi ha wakituwa walang'a, kiidima kawafuna wawuke koke.

²¹ Mndumii-Ruwa kekimaa iletsana wandu wa Israeli iwuka kishari kya Dawidi le, waleshimbuo Yeroboamu mana o Nebati iwa Mangi. Nao Yeroboamu katewa Waisraeli ileha Mndumii-Ruwa wechiwuta wunyamaṟi wung'anyi mnu.

²² Waisraeli walewuta wunyamaṟi Yeroboamu alewuuta, waleidima ida pfo.

²³ Ifurumiaho Mndumii-Ruwa kawafuna wawuke oshangunyi loke chandu awehambie kui dumbu lya waṟundi wake wai waikimbi. Ko ikyo wandu wa Israeli wakadao wapfungo wawuto orukenyi lowo mṟasa Ashuru napfo wakakaapfo mṟasa inu.

Waashuru wasamia Israeli

²⁴ Kiidima Mangi o Ashuru kaduo wandu wuka Babuloni, Kutha, Ava, Hamathi na Sefarvaimu kawawika kiidi kya mṟi ya Samaria handu wandu wa Israeli waledao wusamiṟonyi, wakawada mṟi yo wakakaapfo.

²⁵ Kikawa kiheri kilya walewooka ikaapfo waleindia ma Mndumii-Ruwa pfo, ko ikyo Mndumii-Ruwa kadika mwiso, fukawaha ho wandu maata.

²⁶ Nduma wandu wakawia mangi o Ashuru, “Wandu walya wa mkambo kulewaduo kowawika kiidi kya mṟi ya Samaria walemanya mwanduye ya Ruwa o Oruka lu pfo, ko ikyo Ruwa cho naledika mwiso fuiwaaha wandu.”

²⁷ Naalyo Mangi o Ashuru kawawasa, “Wihiṟenyi mkohanyi umu kiidi kya walya lulewaduo wapfungo, mbihiṟenyi nahende ikaapfo kundu naloshe wandu mawawaso na chile tsa Ruwa o oruka lo.”

²⁸ Ko ikyo umu o wakohanyi alewado mpfungo wuka Samaria kahenda kakaa Betheli, na ipfo kalosha wandu chandu kiwaṟi Mndumii-Ruwa.

²⁹ Indi wandu wa mkambo yose kiidi kya mṟi iya walekaa wakasungusia maruwa hawo na ihawika handu ha huye handu Wasamaria waweteseheṟie.

³⁰ Wandu wa Babuloni wawesungusie shisanamu sha Sukoth-benothi. Wakuti shisanamu sha Nergali; Wahamathi shisanamu sha Ashima;

³¹ Waiva shisanamu sha Nibhazi na Tartaki, na Wasefarvaimu wakawuta wana wawo wawe mwano yemayo modonyi ko maruwa hawo Adrameleki na Anameleki.

³² Wandu-wa wakaweindia Mndumii-Ruwa da. Wakasambuṟa wandu kiidi kyawo wa orio mbaṟi na iwahaluo wakohanyi waṟunde kiidi kya handu ha huye na iwuta mwano handu hawo.

³³ Ko ikyo wawekeindia Mndumii-Ruwa, kiheri na ikyo wakaindia maruwa hawo waleduo wawuka orukenyi lowo.

³⁴ Mṟasa wulalu waiwuta chandu walewuta ili kuwoka. Wakeindia Mndumii-Ruwa pfo, ma wekeosha wuwawaso, ma miindie ma halya Mndumii-Ruwa alewia wana wa Yakobo, alelaho nyi Israeli pfo.

³⁵ Mndumii-Ruwa nawewikie nawo mkundana na iwawia, “Mulawikie wuindi maruwa hengi shile na inyi, mulaipfirie ndi ma mulaiṟundie ma mulaidasie.

³⁶ Mochinjiindia inyi Mndumii-Ruwa onu, njilemuwuta ipfo Misri kui wuindi na pfinya ing'anyi. Mochinjipfiria ndi na injiwutia mwano.

³⁷ Kiheri kyose mochiidikia shilya njechimuwia, chile tsako na mawawaso ho njileṟehia kipfa kyanu, mandi hose muwe warahari ihaosha. Mulaindie maruwa hengi.

³⁸ Mulahadime mkundano foko inyi nanyo, mulaindie maruwa hengi, sile

³⁹ inyi tupu Mndumii-Ruwa, Ruwa onu, na inyi njechimletsa mawokonyi ha wakituwa wanu.”

⁴⁰ Kyaindi wandu wo waleadanyia pfo, wakaengeṟa iwuta chando walewuta o mbooko.

⁴¹ Kyasia wandu wa wamkambo ii waleweindia Mndumii-Ruwa, kyaindi wakaweindia sanamu tsawo tsesalaṟa mṟasa inu, oshari lowo na wudo waiwuta, cha wasahuyawo.