2WAMANGI 16 - Bibilia Kui Mdedie fo Kimochi

Mangi Ahazi o Yuda

¹ Maka fo ikumi na mfungade fo wuitoṟi wo Peka mana o Remalia mangi o Israeli, Ahazi mana o Yothamu mangi o Yuda nalewoka iitoṟia.

² Nawewode maka makumi hawi (20) kiheri alewoka wuchili. Nalewada wumangi maka ikumi na iṟandaṟu ipfo Yerusalemu. Alewuta shisumhanyi oshangunyi lo Mndumii-Ruwa chandu sahuye oke Dawidi alewuta pfo.

³ Naleosha ohendo lo wamangi wa Israeli. Lya wueṟa naleitsa mana oke modonyi nawe kidaso, kechiosha mbuka mbicho tsa wahenu walewingio nyi Mndumii-Ruwa kiheri Waisraeli waweida orukenyi lo kyasa.

⁴ Ahazi kawika mwano na ipfamiṟa ubani handu ha huye, shifumvuhu na wanda ya orio ikidi liwishi.

⁵ Nahong'u Reseni mangi o Aramu na Peka mana o Remalia Mangi o Israeli wakacha kundu wakapane shida na Yerusalemu, nawo waletengetia Ahazi kyaindi walamwidime.

⁶ (Mandi ho, mangi o Edomu nalewada Elathi, kawihiṟia Waedomu mṟi fo mṟasa wulalu).

⁷ Kyasia Ahazi kaduma wandu ko Mangi Tiglath - Pileseri o Ashuru warie ndumi i, “Nyi inyi mṟundi opfo mhendeli. Ncho unjiletse njiwuke ko wamangi wa Aramu na Israeli wanjikapa.”

⁸ Ahazia kaduo fesa na sahabu iwei mbenyi ya Mndumii-Ruwa na kisa kiwei kiidi kya mba ya mangi na iiduo cha kindo kya nnga ko mangi o Ashuru.

⁹ Tiglath-pileseri kaidikia kiterewo kya Ahazi, kakapa mṟi fo Dameski na ifuwada. Kawaha mangi Resini kaduo wapfungo mṟasa Kiri.

¹⁰ Mangi Ahazi kekihenda Dameski ikumbuhana na Mangi Tiglath - Pileseri, kawona pfo rasio. Kyasia kadumia mkohanyi Uria ofano lose na mtariche fo rasio lyo.

¹¹ Uria kawika rasio yo ifananyi na ofano lulya alewio kamarisa Ahazi alamewuya na kanyi.

¹² Kiheri Ahazi alewuya Dameski, nalewona rasio lyo, kalitikiria kawutia ho mwano.

¹³ Nalewuta mwano fomaya modonyi, na kilimu na mvinyo, kaola samu iwei mwano fo ofoṟo.

¹⁴ Kitaṟa kya aṟeṟa kiwei kishimbuo nyi Mndumii-Ruwa, nalewuta osehu lo mba handu hawei makidi hawi ha rasio lyake na mba ya Mndumii-Ruwa, kaiwika handu kuwewode mwaanya ora lo mtsudu lo rasio lyake.

¹⁵ Kiidima kawawasa Uria, “Ambuya rasio li lyako ling'anyi nyiho handu ochiwutia ho mwano fomaya modonyi ngamenyi na fo kilimu kiukanyi, mwano yemaya modonyi, na mwano ya kilimu ya mangi na ya wandu wose na mwano ya mvinyo ya wandu. Uweola samu ya shuma shose shemaya modonyi shishiwute mwano. Kyaindi iya ya Aṟeṟa nyi yako inyi yewesa mbonyi ko Ruwa.”

¹⁶ Na Uria kaosha iwawaso lilya lya Mangi.

¹⁷ Mangi Ahazi kawunduo papi tsiwei tsihoṟotsepfo, kawuta pfo na ipongo liwei huya mapung'a halya ikumi na hawi ha aṟeṟa, kaliwika huya otende lo maho.

¹⁸ Na handu halya hakuirie kuwekeṟundio mkonu ya Sabato kuwei kuwike kiidi kya mba, hamu na kindo kekuruo kya nja, mangi naleshisamiṟa wuka mba ya Mndumii-Ruwa kipfa kya mangi o Ashuru.

¹⁹ Mawuto hengi ha mangi Ahazi haimaṟehie kiidi kya kitapu kya mbonyi tsa Maheri tsa Wamangi wa Yuda.

²⁰ Ahazi kapfa kaṟiko shipfunyi sha wumangi kiidi kya mṟi fo Dawidi, na Hezekia mana oke kachilia handu hake.