2WAMANGI 15 - Bibilia Kui Mdedie fo Kimochi

Mangi Azariya o Yuda

¹ Maka fo makumi hawi na mfungade (27) fo wuitoṟi wo mangi Yeroboamu o Israeli, Azariya mana o Amazia mangi o Yuda nalewooka wumangi.

² Nawewode maka ikumi na iṟandaṟu awooka wuitoṟi. Kaitoṟia maka makumi hatanu na iwi (52) ipfo Yerusalemu. Mae oke nyi awekelaho nyi Yekolia o Yerusalemu.

³ Kawuta mecha oshangunyi lo Mndumii-Ruwa shifananyi na shilya kya wandie alewuta.

⁴ Manya kudo handu halya ha huye ha wuindi kulenyamaṟo pfo na wandu wakahenda idasa na ipfaamiṟa uvumba handu ho.

⁵ Mndumii-Ruwa kakapa Azariya, kawada saka itane ipfa. Nalekaa handu hake mbenyi amonyi, na wusongoru woke wukatano nyi mana oke Yothamu.

⁶ Mawuto hengi hose ha Azariya hamaṟehie kiidi kya kitapu kya Maheri kya wamangi wa Yuda.

⁷ Azariya kapfa kaṟiko shipfunyi sha wamangi mṟinyi fo Dawidi, na mana oke Yothamu kaitoṟia handu hake.

Mangi Zekaria o Israeli

⁸ Maka fo makumi haṟaṟu na nyanya (38) fo wuitoṟi wo Azariya mangi o Yuda, Zekaria mana o Yeroboamu kawada wumangi Israeli. Naleitoṟia ko meri iṟandaṟu.

⁹ Nao cha walya wawemsongoe kalekana na Mndumii-Ruwa kechiwuta mawicho. Naleosha ofano luwicho lo Mangi Yeroboamu mana o Nebati icho aledekesha wandu wa Israeli wakawuta wunyamaṟi.

¹⁰ Shalumu mana o Yabeshi kaṟiingia mangi Zekaria, kamkapa oshangunyi lo wandu kambaha, kiidima kaitoṟia handu hake.

¹¹ Mawuto hengi hose ha Zekaria hamaṟehie kiidi kya mbonyi tsa Maheri ha wamangi wa Israeli.

¹² Kindo ki kiletano nyi kyasa kya Mndumii-Ruwa ko mangi Yehu kehamba “Oshari lopfo lochiitoṟia itane marika hana (wachuku na njukuṟi).”

Mangi Shalumu o Israeli

¹³ Kiidi kya maka fo makumi haṟaṟu na kenda (39) fo wuitoṟi wo Azariya o Yuda, Shalumu mana o Yebeshi kawoka wumangi ipfo Samaria ko meri fumu.

¹⁴ Menahemu mana o Gadi kawuka Tirza ihenda Samaria na ipfo kawaha Shalumu mana o Yabeshi, kiidima kawada wumangi handu hake.

¹⁵ Mawuto hengi hose ha Shalumu na wuṟiingi woke chandu alewuta haimaṟehie kiidi kya kitapu kya mbonyi tsa Maheri tsa Wamangi wa Israeli.

¹⁶ Menahemu ai njienyi awuka Tirza nalenyamaṟa mṟi fo Tapua kichikichi na irumatsa wandu wose hamu na oruka lose luṟingichie kipfa walalekunda imwindia, kiidima karanduo ndeu tsa waka walemo .

Mangi Menahemu o Israeli

¹⁷ Maka fo makumi haṟaṟu na kenda fo (39) wuitoṟi wo Azariya o Yuda, Menahemu mana o Gadi kawoka iitoṟia Israeli, kaitoṟia ipfo Samaria ko maka ikumi.

¹⁸ Naleleha Mndumii-Ruwa kiheri kyose kya wuitoṟi, nalade wunyamaṟi wo Yeroboamu mana o Nebati ichu aledekesha wandu wa Israeli wakawuta wunyamaṟi.

¹⁹ Kyasia, Pulu mangi o Ashuru kacha, kundu nakape Israeli, na Menahemu kamnenga kiheo kya fesa shilo (34,000) kundu namtarame iwanza wuitoṟi woke huya oruka lo Israeli.

²⁰ Menahemu nalewona fesa yo kiidi kya wusuṟi wo Israeli. Kasanyia shekeli (50) tsa fesa ko orio umu owo. Nduma Pulu alekaa Israeli pfo nalewuya na orukenyi loke.

²¹ Mawuto hengi hose ha Manahemu hamaṟehie kiidi kya kitapu kya Maheri ha Wamangi wa Israeli.

²² Manehemu kapfa, na mana oke Pekahia kaitoṟia handu hake.

Mangi Pekahia o Israeli

²³ Maka fo makumi hatanu ha wuitoṟi wo mangi Azariya o Yuda, Pekahia mana o Menahemu kawooka iitoṟia Israeli; kaitoṟia ipfo Samaria ko maka iwi.

²⁴ Kawelemana na Mndumii-Ruwa na iosha mawicho halya ha Yeroboamu mana o Nebati, ichu aletewa Israeli wakawuta wunyamaṟi.

²⁵ Peka mana o Remalia, awei mndu ang'anyi o wandu wa mbahanyi wa Pekahia, kataramana na wandu wengi makumi hatanu (50) wawukie Gileadi kawaha Pekahia otiṟiwenyi lo kyamba lo mba ya mangi ipfo Samaria, kawada wumangi handu hake.

²⁶ Mawuto hengi ha Pekahia na shose alewuta shishiṟehie kiidi kya kitapu kya Maheri ha wamangi wa Israeli.

Mangi Peka o Israeli

²⁷ Kiidi kya maka fo makumi hatanu na kawi fo wuitoṟi wo Azaria o Yuda, Peka mana o Remalia kawoka wumangi ipfo Samaria; kachilia maka makumi hawi (20).

²⁸ Kawuta shiwichuṟie Ruwa kechiosha ofano lo Mangi Yeroboamu mana o Nebati aletewa Waisraeli wawute wunyamaṟi.

²⁹ Kiheri kya wuitoṟi wo Peka mangi o Israeli, Tiglath-pileseri, mangi o Ashuru, naleduo wapfungo mṟi ya Iyoni, Abel-beth-maka ya Kadeshi na Hazoi na njoruka tsa Gileadi, Galilaya na Naftali na iwaduo wupfungo wandu wawo wose.

³⁰ Kiidi kya maka fo makumi hawi (20) fo wuchili wo Yothamu mana o Azariya mangi o Yuda, Hoshea mana o Ela kaṟiingia Peka mana o Remalia kambaha, kaitoṟia handu hake.

³¹ Mawuto hengi ha Peka hose alehawuta hamaṟehie kiidi kya kitapu kya mbonyi tsa Maheri tsa Wamangi wa Israeli.

Mangi Yothamu o Yuda

³² Maka fo kawi fo wuitoṟi wo Peka mana o Remalia ipfo Israeli, Yothamu mana o Azariya mangi o Yuda nalewoka iwada wumangi ipfo Yuda.

³³ Nawewode maka makumi hawi na itanu (25) lilya alewoka iitoṟia. Naleitoṟia ipfo Yerusalemu maka ikumi na iṟandaṟu (16). Mae oke nawekelaho nyi Yerusha, mana o waka o Sadoki.

³⁴ Chandu ndee Azariya alewuta, Yothamu kawewuta shichihiṟie Ruwa.

³⁵ Ma kiwe kido, handu heindia maruwa ha wongo kulenyamaṟo pfo, wandu wakaweindia maruwa ha wongo, wakadasa na ipfaamiṟa ubani. Yothamu kawika kichumi ora lo mtsudu lo mba ya Mndumii-Ruwa.

³⁶ Mawuto hengi ha Yothamu na shose alewuta shishiṟehie kiidi kya kitapu kya mbonyi tsa Maheri ha Wumangi wo Yuda.

³⁷ Kiheri kya wuitoṟi wo Yothamu Mndumii-Ruwa naleduma mangi Resini o Aramu na mangi Peka o Israeli wakape Yuda.

³⁸ Yothamu kapfa, kaṟiko shipfunyi sha mṟi fo Dawidi. Mana oke Ahazi kawada wumangi handu hake.