2WAMANGI 14 - Bibilia Kui Mdedie fo Kimochi

Mangi Amazia o Yuda

¹ Kiidi kya maka fo kawi fo wuitoṟi wo Yehoashi mana o Yehoahazi ipfo Israeli; Amazia mana o Yoashi mangi o Yuda nalewoka wuchili.

² Nawemarisie maka makumi hawi na itanu (25) awoka iwada wumangi, nao naleitoṟia Yerusalemu handu ha maka makumi hawi na kenda (29). Wamae elaho nyi Yehoadani o Yerusalemu.

³ Nalewuta shichihiṟie Ruwa, indi aleidima ishikia sahuye Dawidi pfo. Indi nalewuta cha wandie Yoashi.

⁴ Manya kudo handu halya ha wuindi kulenyamaṟo pfo na wandu wakawewa modasa na ipfaamiṟa pfo ubani handu ho.

⁵ Kiheri Amozi amekusaya necha na iwanga wuchilinyi, kawaha waṟundi walya walewaha mangi ndee oke.

⁶ Kyaindi manya kudo alewaha wana wa wawahi walya pfo chandu kikiṟehie kiidi kya kitapu kya wuwawaso wo Mose, Mndumii-Ruwa kawawasa kechihamba, “Wafee wechiwoho kipfa kya wana wawo pfo, ma wana wechiwoho kipfa kya wafee wawo pfo, kyaindi orio mndu nechiwoho kipfa kya njonyamaṟo tsake amonyi.”

⁷ Amazia nalewaha Waedomu shiku ikumi (10,000) kiidi kya pichi lya monyo kaduo ko pfinya mṟi fo Sela na ifulaha Yoktheeli; nyi wudi fokelaho itane wulalu.

⁸ Kiidima Amazia kadika ndumi ko Yehoashi mana o Yehoahazi, mana o Yehu mangi o Israeli kehamba, “Ncho lukapane.”

⁹ Kyaindi Yehoashi mangi o Israeli kadika ndumi ko Amazia mangi o Yuda kechihamba, “Mkonu fumu iduo lya Lebanoni lilewia meresi ipfo Lebanoni da! Lekia mana cho opfo o waka naaliko nyi mana oko. Indi kukaidaho indo lya ngeṟenyi likachuma iduo lilya.

¹⁰ Wulalu iyo Amazia nolewinza Waedomu na mrima fopfo fukakudosa na kiṟumi kyo kyapfo nokae kanyi kopfo, nkiki oshiha wukiwa wochikurumatsa iyo na wandu wapfo wa Yuda?”

¹¹ Kyaindi Amazia nalasaṟe ko ikyo. Yehoashi mangi o Israeli kacha wakoyane kyamu ko kyamu na Amazia shidenyi ipfo Beth-shemeshi, orukenyi lo Yuda.

¹² Wandu wa Yuda wakalemo na wandu wa Israeli na orio mndu kawuya na kanyi koke.

¹³ Yehoashi mangi o Israeli kaduo Amazia o Yuda wupfungo, mana o Yehoashi, mana o Ahazia ipfo Beth-shemeshi; kiidima kahendia mṟi fo Yerusalemu kawunduo omombo lofo wokia kichumi kya Efraimu mṟasa kichumi kya mbai, wuleshe wushikie kufui mita mahana hawi (200).

¹⁴ Kaduo sahapu yose na fesa, na shihia shose shiwei mbenyi ya Mndumii-Ruwa na kisenyi kya mba ya mangi, kaweduo wapfungo wa shida kawuya na Samaria.

¹⁵ Mawuto hengi hose ha Yehoashi, wukahari woke wo shida alekapana na Mangi Amazia o Yuda hamaṟehie kiidi kya kitapu kya mbonyi tsa Maheri tsa wamangi wa Israeli.

¹⁶ Yehoashi kapfa, kaṟiko kiidi kya shipfunyi sha wamangi ipfo Samaria. Mana oke Yeroboamu kaitoṟia handu hake.

Opfu lo Mangi Amazia o Yuda

¹⁷ Amazia mana o Yoashi mangi o Yuda nalekaa maka ikumi na itanu mangi Yehoashi o Israeli amepfa.

¹⁸ Mawuto hengi ha Amazia hamaṟehie kiidi kya kitapu kya mbonyi tsa Maheri tsa wamangi wa Yuda.

¹⁹ Chila tsewaha Amazia tsileṟundio Yerusalemu, ko ikyo kadichia Lakishi, indi wakituwa wake wakaduma wandu wembahia pfo.

²⁰ Mnying'a foke fuleendo nyi frasi fukacha iṟiko kiidi kya shipfu sha wamangi kiidi kya Yerusalemu mṟinyi fo Dawidi.

²¹ Kiidima wandu wose wa Yuda wakaduo Azariya awode maka ikumi na iṟandaṟu (60) wakamshimbuo handu ha Amazia ndee.

²² Azariya ndee amepfa kawika wuhya mṟi fo Elathi kafuwihiṟa ko Yuda.

Mangi Yeroboamu o kawi o Israeli

²³ Maka fo ikumi na katanu fo wuchili wo Amazia mana o Yoashi mangi o Yuda, Yeroboamu mana o Yoashi mangi o Israeli nalewoka ichilia ipfo Samaria, kachilia ko maka makumi hana na fumu (41).

²⁴ Kalekana na Ruwa piu kaosha mkao mbicho ya msongoru oke ai mangi Yeroboamu mana o Nebati, aletewa wandu wa Israeli wakanyamaṟia Ruwa.

²⁵ Kawihiṟa oruka lose luwei lo Israeli, kuwuka Pito lya thamathi mṟasa ipalyipalyi lya Araba. Nyi wudi Mndumii-Ruwa awehambie kui mṟundi oke Yona mana o Amitai mwikimbi, wuka Gath-heferi.

²⁶ Kipfa Mndumii-Ruwa nalewona wukiwa wung'anyi walelya Waisraeli kipfa kulawewode mndu oose mowatarama.

²⁷ Kyaindi Mndumii-Ruwa nawehambie ke nechirumatsa Israeli, koikyo kawakiṟa kui meeke fo mangi Yeroboamu mana o Yoashi.

²⁸ Mawuto hengi hose ha Yeroboamu, shida alekapana kui wukahari wose na chandu alewihiṟa Dameski na Hamathi na iihaluo iwe ya Israeli; shose shishiṟehie kiidi kya kitapu kya mbonyi tsa Maheri ha Wamangi wa Israeli.

²⁹ Yeroboamu kapfa kaṟiko shifunyi sha wamangi na Zekaria, kaitoṟia handu hake.