2WAMANGI 13 - Bibilia Kui Mdedie fo Kimochi

Mangi Yehoahazi o Israeli

¹ Maka fo makumi hawi na kaṟaṟu (23) fo wumangi wo Yoashi o Yuda, Yehoahazi mana o Yehu nalewoka wumangi. Kaitoṟia Israeli, ipfo Samaria, ko maka ikumi na mfungade.

² Kawuta shiwichuṟie Mndumii, kawuta mawicho kechiosha mawicho ha Yeroboamu mana o Nebati, mawicho ho hakatewa Israeli wakadekio Ruwa. Yehoahazi aleda mawuto ho mawichopfo.

³ Mndumii-Ruwa kasuo katewa wana wa Israeli wawingo shidenyi orio kiheri mangi Hazaeli o Aramu na mana oke Ben-hedadi.

⁴ Na Yehoahazi katerewa Mndumii, Mndumii kamwadanyia, kipfa nalewona matuuro ha Israeli, chandu mangi o Shami awewatuura.

⁵ (Mndumii kaendie Israeli mkiṟa, wakawuka mawokonyi ha Washami. Wana wa Israeli wakakukaya mahemenyi hawo cha kuwoka;

⁶ indi waleda mawicho halya ha mba ya Yeroboamu hedekesha Israeli pfo, indi wakahendesana nawo; handu ha huye ha Ashera kukawekaapfo kudo kiidi kya Samaria).

⁷ Kipfa waledea Yehoahazi maaskari wa shida pfo shile wedoya frasi makumi hatanu (50) na frasi, na magari ikumi, na waaskari wechumia shiku ikumi (10,000), kipfa mangi o Shamu nalewarumatsa wakafanana na kiluli kichumechume.

⁸ Kyasia mbonyi tsose tsa Yehoahazi tsiletsuhaa na shose alewuta, na wukahari woke, shileṟehio kiidi kya kitapu kya Maheri kya wamangi wa Israeli.

⁹ Yehoahazi kapfa, wakamṟika kiidi kya Samaria, na Yehoashi mana oke kawada wumangi handu hake.

Mangi Yehoashi o Israeli

¹⁰ Maka fo makumi haṟaṟu na mfungade (37) fo Yoashi Mangi o Yuda, Yehoahazi mana o Yohoashi nalewoka iitoṟia Israeli kiidi kya Samaria, kaitoṟia maka ikumi na iṟandaṟu.

¹¹ Kawuta mawicho oshangunyi lo Mndumii. Aleda madeko halya ha Yeroboamu mana o Nebati hedekesha Israeli pfo, indi nalewewuta mawuto mawicho.

¹² Kyasia mbonyi tsose tsa Yehoashi tsiletsuhaa na shose alewuta, na wukahari woke wokapana na Amazia, mangi o Yuda, shileṟehio kiidi kya kitapu kya Maheri kya wamangi wa Israeli.

¹³ Yehoashi kapfa na Yeroboamu o kawi kadamia loṟikehu lo wuitoṟi na Yehoashi kaṟiko ipfo Samaria, kimu na wamangi wa Israeli.

Opfu lo Elisha

¹⁴ Kyasia Elisha kaluo ndaṟe ilembaha, na Yehoashi mangi o Israeli kasoka namsengude, kafihiṟa oshangunyi loke kahamba, “Ndeako! Ndeako! Magari ha Israeli na wedo frasi wake!”

¹⁵ Elisha kambia, “Ende wuda na mfi!” Nao kaira wuda na mfi.

¹⁶ Kawia mangi o Israeli. “Wika owoko lopfo wudenyi!” Nao kawika owoko loke wudenyi! Elisha kawika mawoko hake huye ya mawoko ha mangi.

¹⁷ Kahamba, “Ṟuhuo itiṟisha lya ora lo ngamenyi!” Kaliṟuhuo, Elisha kahamba “Kumba mfi,” nao kakumba mfi. Kahamba iyo nyi mfi. “Mfi fo Mndumii Mwikimbi Elisha fowinga, ee da mfi fowinga Shamu. Kipfa nochikapa Washami kiidi kya Afeki itane owarumatsa.”

¹⁸ Kahamba, “Ira mfi ifoi,” kaiira. Kawia mangi o Israeli, “Kapa wanda,” Kakapa kaṟaṟu kada.

¹⁹ Mndu ulya o Ruwa kasuo kahamba, “Kiwekuwaṟi nokape katanu, kaṟandaṟu naalyo uwechikapa Shamu na iirumatsa, indi wulalu nochikapa Shamu kaṟaṟu tupu.”

²⁰ Elisha kapfa, nawo wakamṟika. Kyasia matorito ha Wamoabu wakacha isaṟikia oruka orio maka.

²¹ Ambuya kiheri kyo waweṟika mndu, wekiwona itoṟito lya wandu wawerie mnying'a wakakumba mnying'a fulya nafo fulekuwasha na mafuo ha Elisha kaṟuka kahoṟoka na madende hake.

Shida sha Israeli na Aramu

²² Hazaeli mangi o Shamu kawonyia Israeli mkonu yose ya Yehoahazi.

²³ Mndumii-Ruwa, kawasaṟia kawaichio wukiwa, kawaambuya, kipfa kya mkundano foke na Abrahamu na Isaka, na Yakobo, ma nalakunde iwarumatsa, ma nalawakumbe kuleshe na kyamu kyake.

²⁴ Kiidima Hazaeli mangi o Shamu kapfa, na Ben-hadadi mana oke kawada wumangi handu hake.

²⁵ Na Yehoashi mana o Yehoahazi, kasoka Ben-hadadi mana o Hazaeli mṟi iya aleduo owokonyi lo Yehoahazi ndee oke shidenyi. Kaṟaṟu kambinga, kawihiṟa mṟi iya ya Israeli.