2WAMANGI 12 - Bibilia Kui Mdedie fo Kimochi

Mangi Yoashi o Yuda

¹ Kiidi kya maka fo mfungade fo wuitoṟi wo mangi Yehu o Israeli Yoashi nalewoka wuitoṟi na iitoṟia Yuda ai mangi owo ipfo Yerusalemu, nao kawada wumangi handu ha maka makumi haana (40) ipfo Yerusalemu. Mae oke nyi awekelaho Sibia, awukie Beer-sheba.

² Kiidi kya ohendo loke lo moo nawekewuta shisumuhanyi oshangunyi lo Mndumii-Ruwa, kipfa mkohanyi Yehoyada nawekeri imlosha.

³ Manya kudo handu heterewia maruwa hengi ipfo mafumvuhu halenyamaṟopfo, na wandu wakaengeṟa ihaindia, idasa na ipfaamiṟapfo uvumba.

⁴ Yoashi kalaha wakohanyi, kawawasa kechihamba, “Fesa yose ileendo kiidi kya mba ya Ruwa ilewoneka ipfo wuhenunyi wo shilya shilekumbo shii shiele fesa ya orio mndu chandu aleṟehiyo, na fesa ilewuto chando mndu alewuta kui ikunda lyake kipfa kya mba ya Mndumii-Ruwa.

⁵ Wakohanyi watsiambie wuka ko orio mndu, nawo waṟunde natso wasaye mba i orio handu hawaṟi isaya.” Kipfa mba ya Mndumii-Ruwa iwemewoka iwunduka.

⁶ Kukaida maka makumi hawi na iṟaṟu (23) ya wumangi wo Yoashi, wakohanyi wawemewoke ma ikusaṟa kya isungusia mba ya iwewundukie-pfo.

⁷ Kyasia mangi Yoashi kalaha mkohanyi Yehoyada na wakohanyi wengi kawawesa, “Kitewe mulakundi sungusia mba, ii nyiki? Kyasia muladuo fesa ko wandu mokewaṟundia, indi inyi mochinjiendie, kundu mba ii isungusio.”

⁸ Wekiicho wado wakaidikia waladuo fesa ko wandu, wakaweteṟia ke wechisungusia mba i ya Mndumii-Ruwapfo.

⁹ Yehoyada kaduo isanduku, katocha ṟoche o kipfinyikonyi kyalyo, kiidima kalileṟia ora lo kulyo ko kitaṟa kedasia, handu mndu ekeida na mbenyi ya Mndumii-Ruwa. Na wakohanyi walya wawei kambenyi kichuminyi wakawika fesa yose ileendo mbenyi ya Mndumii-Ruwa.

¹⁰ Wekiwona fesa chando tsifoi kiidi kya isanduku, kaṟanyi o mangi kado na mkohanyi ang'anyi wakapfunga mkunjenyi, ii kulya isandukunyi, wakatala fesa tsilewoneka kiidi kya mba ya Mndumii-Ruwa.

¹¹ Na fesa tsekiambiyo, wakataa walya waleṟunda na walya walehoṟokia mba iya ya Mndumii-Ruwa, wakataa walya wepacha mashidi, na walya wewika waleṟundia mba iya ya Mndumii-Ruwa.

¹² Na wewika na ipaṟa maho, ihuṟa mashidi na maho matsane kundu hasungusie handu halya halewunduka, na wuhuru wo iṟunda lyose lyikatao.

¹³ Ma kudo shihia shose sha fesa shileṟundika ko itaopfo; shihia cha mapongo hamasungusie kui fesa, makasi hedumbuo ndusu tsa mchumaa, mboṟiko, taṟumbeta, shihia shingi sha fesa ang'u sahabu.

¹⁴ Fesa tsose tsiletaa walya waleṟundia mba iya ya Mndumii-Ruwa.

¹⁵ Walya walehoṟokia wawei wahendeli mnu nakamu, ko ikyo kuwewode kitewe kyawo iwuta itala lya fesa tsiletao na maṟunda hatso-pfo.

¹⁶ Fesa tsilewuto tsiwei ndalai kui shiano, na fesa tsewuta wunyamaṟi tsilesanzo na tsilya tsa mba ya Mndumii-Ruwa pfo; itso wakohanyi waleinengo cha wueri wowo.

¹⁷ Mandi naaho Hazaeli mangi o Aramu kakapa mṟi fo Gathi kafuduo. Hazaeli akundi ikapa Yerusalemu nafuduo,

¹⁸ Yoashi mangi o Yuda kaduo shiano shose shiweishiwikie ona nyi wasahuye wake wamangi wa Yuda: wai Yehoshafati, Yehoramu na Ahazia, kaengeṟa na iya yake, hamu na sahabu yose iwei kisenyi kya mba ya Mndumii-Ruwa na kanyi ko mangi, kadika ko Hazaeli, mangi o Aramu. Hazaeli kawuka Yerusalemu.

¹⁹ Mawuto hengi hose ha mangi Yoashi hamaṟehie kiidi kya mbonyi tsa Maheri tsa wamangi wa Yuda.

²⁰ Waṟundi wake wakamṟiingia wakambahia kiidi kya mba ya Milo njienyi ihendie Sila.

²¹ Walya walembaha nyi Yozakari mana o Shiweathi na Yehozabadi mana o Shomeri. Waṟundi wake wakamṟika kiidi kya makapuṟinyi ha kimangi ipfo mṟinyi fo Dawidi; Amazia mana oke kaitoṟia handu hake.