2WAMANGI 11 - Bibilia Kui Mdedie fo Kimochi

Mkamangi Athalia o Yuda

¹ Naalyo Athalia mae o mangi Ahazia, kekiwona mana oke nawoho, kakure karumatsa mbaṟi yose ya kimangi.

² Indi Yehosheba mana o waka o Mangi Yoramu, mshiki o Ahazi, kaduo Yoashi kui kiṟika ai mana o Ahazia, kambuta kiidi kya wana wa mangi wawei kufui iwoho. Kamwowisha kimu na meri oke kiidi kya kiṟiha kelaa. Nalemṟika kudo Athalia nalambone nambaahe.

³ Yoashi kakaa nao handu ha meri iṟandaṟu amṟike mbenyi ya Mndumii-Ruwa, kiheri Athalia aweitoṟie oruka.

⁴ Kyaindi kiidi kya maka fo mfungade Yehoyadi kadika ndumi kasanyia wanene wa mahana wa magari na waringi, kawawasa ke wamcheye ipfo mba ya Mndumii-Ruwa, wakaidikiyana na iliana nyamu ipfo mbenyi ya Mndumii-Ruwa. Kiidima kawaloṟa Yoashi mana o Mangi Ahazia.

⁵ Kawawasa adi, “Mochiwuta mudi ili moshika iwada makamba mfiri ya Sabato, mohawa ngamba tsiṟaṟu, imu yeringa mba ya wuitoṟi ya Mangi.

⁶ Ya kawi yechikaa kichuminyi kya Suri na ya kaṟaṟu yechikaa kichuminyi kya nduma ya waringi. Nyi wudo mochiringa mba ya wuitoṟi ya mangi ilafunjo.

⁷ Makamba halya hawi hakamaa kamba lyawo mfiri fo Sabato hechiwada kamba kiidi kya mba ya Mndumii-Ruwa iringa mangi.

⁸ Mochiṟingichia mangi, orio mndu na kisha kyake owokonyi na mndu ose echikaria isembelia nawoho. Nyi kiwaṟi mkae na mangi kiwe nakure nahende ang'u handu akukerie.”

⁹ Wanene wa wandu ihana (100) waleindia mawawaso hose halewuto nyi mkohanyi Yehoyada. Orio mnene umu kaduo wandu wake wose, walya wawememarisa kamba lyawo na walya wawekuteseheṟie iwada kamba mfiri fo Sabato naho wakahenda ko mkohanyi Yehoyada.

¹⁰ Mkohanyi kainengia wanene wa wandu ihana mapfumu na ngawo shiwei sha Mangi Dawidi, shiwei shiwike mbenyi ya Mndumii-Ruwa.

¹¹ Na waringi wawehoṟoki wokia ora lo nuka lo mba mṟasa ora lo mtsudu lo mba na itengeta rasio na mba yose kundu waṟingichie mangi, orio umu awode pfumu lyake owokonyi loke.

¹² Kiidima kasomotsa mana o mangi, na nja, kamṟika oro ya wumangi mdohu, kawemneenga mapfundo, wakamshimbuo wakamshia mafuda, wakakapakapa mawoko ha sia na ihamba, “Mangi nakae na moo.”

¹³ Nahong'u Athalia kekiicho maṟu ha waringi hamu na ha wandu wengi wafoi kahendia wandu wawei kiidi kya mba ya Mndumii-Ruwa.

¹⁴ Kekiimehia kawona mangi ulya ahoṟoki kufui na ngo ikeri kichuminyi kya hekalu chandu kiwei mwichiwie, wanene wa ihana na wekapa taṟumbeta wai mba ya mangi; na wandu wose wai wachihie na ikapa taṟumbeta, naalyo karanduo nguwo tsake kadeda na ṟu lying'anyi, “Wuṟingi! Wuṟingi!”

¹⁵ Mkohanyi Yehoyada kawawasa wanene wa ihana wa shida kehamba, “Mbutenyi kiidi kya wasikari, na kokoya kuwode mndu momwosha mbahenyi.” Kipfa mkohanyi nalehamba, “Nalawohiyo mbenyi ya Mndumii-Ruwa.”

¹⁶ Kyasia wakambada wakamwihetsa mongonyi fo frasi fuambuyanyi na mba ya wuitoṟi ya mangi kawohiopfo.

Mailachiko haleendo nyi Yehoyada

¹⁷ Ikyo kyamiida Yehodaya kawika mkundana kiidi kya Mndumii-Ruwa na mangi na wandu ke wechiwa wandu wa Mndumii-Ruwa, hamu na mkundana kiidi kya mangi na wandu.

¹⁸ Kyasia wandu wose wa oruka wakahendia mba ya Baali wakaiwunduo, wakafunja kitaṟa kedasia na sanamu tsa Baali wakawaha Matani, mkohanyi o Baali kufui na kitaṟa kedasia. Mkohanyi Yehodaya kawika waringi wa mba ya Mndumii-Ruwa.

¹⁹ Kaduo wanene wa ihana, wakari na wenyi oruka wose, wakaimia mangi iwuka mba ya Mndumii-Ruwa wakaida kichumi kya waringi itane mba ya wuitoṟi kanyi ko mangi. Nao kadamia loṟikehu lo wuitoṟi.

²⁰ Kikaendie sia wenyi oruka wose, mṟi fukaololia, Athalia amewoho na oshu kiidi kya mba ya wuitoṟi.

²¹ Yoashi nalewada wumangi kiidi kya Yuda awode maka mfungade.