2WAMANGI 10 - Bibilia Kui Mdedie fo Kimochi

Wa oshari lo Ahabu wawoho

¹ Mṟinyi fo Samaria kuwewode makumi mfungade wa oshari lo Ahabu, Yehu kaṟehia paruo katsidika ko wachili wa mṟi na ko wasongoru na ko waringi wa wandu wa luwa lya Ahabu. Baruo yo iwehambie idi:

² “Kipfa kiidi kyanu muwode wana wa mangi, mukawewada frasi na magari, shisha na mṟi injiiṟihe na omombo,

³ sambuṟenyi muweshimbuo mndu mṟamtsu awode wuṟango na pfinya kiidi kya wana wa mangi, naho muamtse shida kipfa kya mba ya mangi.”

⁴ Wachili wa Samaria waleowuo mnu wakahamba, “Na lochiidima ikapa Yehu kokoya Yoramu na Mangi Ahazia walelemo?”

⁵ Ko ikyo ichu awei mnene o mba ya mangi, na mnene o mṟi wechisanza na wasongoru wengi wa waringi, wakadikia Yehu ndumii yehamba, “So lukeri masinga hapfo, na lui iya iṟunda kyose ohamba. Kyaindi lochishimbuo mndu ose nawe mangi pfo, wuta kilya kekuchihia.”

⁶ Yehu kaṟehia paruo ingi kawawia, “Kokoya lohi mochiosha shilya njechiwawasa, njiendienyi iya Yezreeli mdo ya wana wa mndumii onu Mangi Ahabu ngama kiheri cha iki.” Wana makumi mfungade (70) wa mangi Ahabu wawekeri ko wasongoru wa Samaria, sa wawekeri weeri wawo.

⁷ Kyasia paruo ya yekiwashikia, wakawada wana walya wa mangi makumi mfungade wakawadumbuo mdo yawo wakaiwika shikapunyi wakadaya Yehu ipfo Yezreeli.

⁸ Kyasia mṟundi umu kahenda kambia, “Mdo ya wana wa mangi yameendo, naalyo kawawasa, ‘Leṟienyi wanda njohawi tsiwi o kichuminyi kya mṟi itane ngamenyi.’”

⁹ Komkya, kacha kahoṟoka kawia wandu wake, “Nyo nyi wandu wahendeli, ambuyenyi njilewika mtambo ko mndumii oko, ngambaha. Kyaindi nyiu alewaaha wandu wa wose?

¹⁰ Manyenying'u ke madedo hose hamahambe nyi Mndumii-Ruwa kya mba ya Ahabu hainutsio. Nawuta chando awehambie kui dumbu lya mṟundi oke Elia.”

¹¹ Naalyo Yehu kawaha kishari kyose kya Ahabu kiwekeri Yezreeli, hamu na wachili wake na mbuya tsake na wakohanyi wake, nalade manya mndu umu.

Kishari kya Ahazia kyawoho

¹² Kiidima Yehu kakure Yezreeli kahenda Samaria. Akeri njienyi kufui na mba yeodia mberi tsa machondi ha walisi,

¹³ Yehu kakoyana na wana wa mae wa Ahazia mangi o Yuda, kawawesa, “Nyo nyi waki?” Wakamhaluo, “So nyi wana wa wama wa Ahazia, losoka luche iṟikiṟa wana wa mangi, na wana wa mkamangi.”

¹⁴ Kahamba, “Wawadenyi wai na moo.” Wakawawada wai na moo, wakawawahia kufui na nduwa ya mba ya weoda mberi tsa machondi, wandu makumi hana na wawi (42), ma waletsuhaṟa mndu oose owopfo.

¹⁵ Yehu kakurese, kechishika njienyi kakumbuhana na Yehonadabu ai mana o Rekabu, Yehu kamuiṟikiṟa kiidima kambesa, “Ngesa na uwode makusaṟo cha iha hako? Ochihendesana na inyi nowenjitarama?” Yehonadabu kamhaluo, “Ee da, njikulunga na iyo.” Yehu kahamba, “Njinenga owoko lopfo.” Wakawadana mawoko na Yehu kamdosia igarinyi lyake.

¹⁶ Kambia, “Oshana na inyi kundu nowone chandu njii mhendeli, ko Mndumii-Ruwa.” Wakahendesana kimu wai igarinyi lya Yehu.

¹⁷ Wekishika Samaria, Yehu karumatsa wandu wa kishari kya Shamu kyose kuladeo ma umu owo chandu Mndumii-Ruwa alewia Elia chandu kechiwa.

Waoshie Baali wawoho

¹⁸ Yehu kasanyia wandu wa Samaria kawawia, “Mangi Ahabu nalesingia Baali kitutu tupu kyaindi inyi njechimsingia ngoseṟa.

¹⁹ Lahenyi waikimbi wose wa Baali, na walya wekemwosha wose na wakohanyi wawo. Nyi iwawaso ke orio umu nache, kipfa njikundi iwika kidaso king'anyi kemaya modonyi kya Baali, na icho alechishika nechiwoho.” Ikyo nyi kiwei mtambo fo Yehu fo waha wose waweoshie Baali.

²⁰ Yehu kawawasa, “Lahenyi chila ya wuindi woindia Baali!” Mbonyi ikadung'anyitso.

²¹ Na Yehu kadika mbonyi kiidi kya oruka lose lo Israeli, kundu walya waoshie Baali washike orio mndu. Wakacha wose na iichuṟa hekalu lya Baali wokia ora lu mṟasa ora lungi.

²² Kyasia Yehu kawia ulya moambuya maṟao maele kechihamba, “Wuta maṟao ho noinenge wandu wa wacha na wuindinyi.” Ulya mohoṟokia kahawuta kawainengia.

²³ Yehu kaida na hekalunyi echioshana na Yehonadabu kawia walya wawei hekalunyi, “Ṟingishienyi necha muwone ke walya wai ipfo hekalunyi nyi walya weindia Baali tupu, ma kuwodepfo ma umu ekeindia Mndumii-Ruwa-pfo.

²⁴ Kiidima kadeda na Yehonadabu iwuta mwano fo koṟa modonyi ko kipfa kya Baali. Yehu nyi aweteseheṟie wandu washikie makumi nyanya (80) nja ya hekalu kawawikia wuwawaso. ‘Waahenyi wandu wa wose,’ na mndu echida mndu kadicha nechitaa kya moo foke!”

²⁵ Oweṟe cha ili Yehu kekimarisa iwuta kidaso kemaya modonyi kawia waringi na wachili walya, “Idenyi na mba muwawahe wose. Mulade ma umu nadiche!” Wakaida na njoshu tsawo wakuṟeheṟie wakawaha wose piu, kiidima wakawuta mnying'a iya na nja. Wakaida kiidi kya kiṟiha kya kyamba ya hekalu.

²⁶ Wakakuṟuo ho ngo njiele wakairumatsa na modo.

²⁷ Wakawunduo ngo tsose hamu na hekalu, wakahaluo hekalu lya wandu choṟo, nyi wudo lii mṟasa inu.

²⁸ Nyi wudo Yehu alefurunja wuindi wo Baali kiidi kya Israeli.

²⁹ Kyaindi kaweosha wunyamaṟi wo Yeroboamu mana o Nebati wuletewa Waisraeli wawute wunyamaṟi. Nalewika sanamu tsa mahache ha sahabu ipfo Betheli na Dani.

³⁰ Mndumii-Ruwa kawia Yehu, “Nulewutia oshari lo Ahabu shilya shose njiwekundi uwawutie. Ko ikyo ngakuwikia kyasa ke kishari kyapfo kechiitoṟia Israeli itane wachuku na njukuṟi.”

³¹ Kyaindi Yehu alaindie wuwawaso wo Mndumii-Ruwa, Ruwa o Israeli, ko mrima foke fose. Kaosha mawuto ha Yeroboamu aledekesha wandu wa Israeli wakawuta wunyamaṟi.

Opfu lo Yehu

³² Mandi ho Mndumii-Ruwa nalewoka inyiiṟa oruka lo Israeli. Mangi Hazaeli o Aramu alewinga oruka lose lo Israeli,

³³ wokia ora lo ngamenyi lo meda fo Yordani, njoruka tsa Gileadi, Gadi, Reubeni na Manase na kuwokia Aroeri kii kiidi kya pichi lya Arnoni, orukenyi lo Gileadi na Bashani.

³⁴ Mawuto hengi hose ha Yehu na shindo sha ngarama shishiṟehie kitapunyi kya mbonyi tsa Maheri ha wamangi wa Israeli.

³⁵ Yehu kapfa kaṟiko Samaria. Mana oke Yehoahazi kaitoṟia handu hake.

³⁶ Yehu naleitoṟia Israeli kimu na Samaria ko maka makumi hawi na nyanya (28).