2WAMANGI 1 - Bibilia Kui Mdedie fo Kimochi

Elia na mangi Ahazia

¹ Kikashika Ahabu amepfa, wandu wa Moabu wakaleha Waisraeli.

² Ahazia kaoloka kiidi kya itiṟisha lya kiṟiha kya koṟofeni, kiidi kya Samaria, kafaṟika mnu. Kyasia Ahazia kaduma ndumi, “Hendenyi muwese ko Baal-zebubu, Ruwa o Ekroni, ke, ‘Njechia ndaaṟe ii?’”

³ Kyaindi malaika o Mndumii kawia Elia Mtishbi, “Kure uhende uwonane na wandu wa Mangi o Samaria, uwawie, ‘Ngesa nyi kipfa kulawode Ruwa kiidi kya Israeli, mtano mohenda iwesa ko Baal-zebubu ruwa o Ekroni?’

⁴ Kyasia wulalu Mndumii nahamba adi, ‘Ochisoka o kitaṟenyi pfo nyi kya lohi nochipfa.’” “Kyasia, Elia kahenda kawia wandu walya chandu alewio nyi Ruwa.”

⁵ Wandu walya wakawuya, na Mangi kawawesa, “Nkili mowuya?”

⁶ Wakambia, “Mndu aluchea, kawonana naso kaluwia, hendenyi wuyenyi ko Mangi ulya amuduma mummbie, Mndumii nahamba adi, ‘Ngesa nyi kipfa kulawode Ruwa kiidi kya Israeli mtano mohenda iwesa ko Baal-Zebubu, ruwa o Ekroni? Kyasia, ko kipfa kya ikyo ochisoka o kitaṟenyi ulekidooya-pfo kya indi nochipfa.’”

⁷ Kawawia, “Ngesa mndu cho alemchea, kawonana nanyo, kamuwia madedo ho nawei mndu o mbaṟi njiki?”

⁸ Wakambia, “Naweṟee ikonya lya mafufuta, kakupfunga nguo yekushikia ya njonyi kitsinyi kyake.” Nao kahamba, “Nyi Elia ulya Mtishbi.”

⁹ Naalyo Mangi kaduma mnene umu na wandu makumi hatanu wahende ko Elia. Wakahenda wakakoya adamie huya fumvuhu. Kammbia, “Iyo mndu o Ruwa, Mangi nakuwia soka.”

¹⁰ Elia kahaluo kawia mnene ulya o wandu makumi hatanu, “Kokoya inyi nyi mndu o Ruwa, kuoloke modo fuwuka ruwehu, fukurumatse iyo na wandu wapfo makumi hatanu (50).” Modo fukaoloka, fukarumatsa mnene ulya na makumi hatanu wake.

¹¹ Kaduma se mnene ungi na wandu makumi hatanu (50) wamhendie, kambia, “Iyo mndu o Ruwa, Mangi nahamba, soka owinyi!”.

¹² Elia kahaluo kambia, “Kokoya inyi nyi mndu o Ruwa, kuoloke modo fuwuka ruwehu, fukurumatse hamu na walya makumi hatanu (50) wapfo!”

¹³ Kaduma mnene o kaṟaṟu na wandu makumi hatanu. Mnene ulya o wandu makumi hatanu (50) o kaṟaṟu kahenda kapfira ndi oshangunyi lo Elia, kamterewa mnu kechihamba, “Iyo mndu o Ruwa, ngakuterewa kipfa kya moo foko, na moo fo wandu wakeri waṟundi wapfo iwa makumi hatanu (50) ulalurumatse!”

¹⁴ Ambuya modo fukaoloka fuwuka ruwehu, fukarumatsa wanene walya wawi na wandu wawo makumi hatanu, “Wulalu ngaterewa nosaṟie moo foko.”

¹⁵ Malaika o Mndumii kawia Elia, “Soka kimu nao ma kulaowuo.” Kasoka kimu nao mṟasa ko Mangi.

¹⁶ Kammbia Mndumii nahamba adi, “Kipfa uleduma wandu wahende iwesa ko Baal-zebubu, ruwa o Ekroni, ngesa nyi kipfa kulawode Ruwa kiidi kya Israeli uwese koke? Ko ikyo ochisoka o kitaṟenyi pfo nochipfa?”

¹⁷ Kyasia kapfa, chandu idedo lya Mndumii lilecha kui dumbu lya Elia. Yoramu kawoka iitoṟia maka fo kawi fo Yehoramu mana o Yehoshafati Mangi o Yuda; kipfa Mangi Ahazia alawewode mana o kisoṟo.

¹⁸ Mbonyi tsose tsilewuto na maṟunda haleṟundo nyi Ahazia, haleṟehio kiidi kya kitapu kya Maheri ha wamangi wa Israeli.