2TIMOTEO 4 - Bibilia Kui Mdedie fo Kimochi

¹ Ngakuwawasa oshangunyi lo Ruwa na lo Kristo Yesu moanduya walya wai na moo na walya wapfie, ngaṟingishia ishi shiwi ke nyi echikuloṟa amonyi ai na Mangi.

² Onguo idedo-lyo, kuilikye-ho (kui-ho mwaanya mcha ang'u kulai-ho) Dedya, ikimba, isima wandu kui wuleeli wuhoṟotsu na wuloshi wucha wose.

³ Kyamba kochicha kiheri welechiidimana na kiloshyo kya lohi kyechiṟa mrima, kya indi wechikufeṟya wawenyi walosha waidikyanyi na lango tsawo tsiinjenyi, chando madu hawo hakundi.

⁴ Wechihutsa macha heicho kiilohi kilya, indi waadanye mhambo ya wongo.

⁵ Kakye iyo ukae na osaaṟe kya orio kindo, kukarishie mawinenyi, ṟunda iṟunda icha lya mwongoyi o Ndumi ya Sia ya okiio, ochiawutsia necha wupfuṟukanyi wopfo.

⁶ Kyamba inyi njikuṟeheṟie iwiko kidaso, kiheri kya iinuka lyako kyamafukya.

⁷ Ngammaa ikapana ngapano iya ncha, ngamaa iinutsya ohendo lulya, ngameringa wuidiki wulya.

⁸ Kitsuhae nyi iṟiko oṟo ya wuchopi wo wuwinzi wuhoṟotsu wo moo njimsuṟumye. Nyiyo Mndumii mletsi mhoṟotsu echinjiimaya nayo mkonu fulya. Indi echinjiimanya nayo inyi njimonyi tupupfo, indi na walya wose wawodo nyi macha ha ikuloṟa lyake.

Shitutumo

⁹ Iitika icha na koko owinyi.

¹⁰ Kyamba Demasi alenjida amhenda ikunda wuyana wu wo kiwulalu kahenda Tesalonyikye. Kiresike alehenda Galatia. Tito kawehenda Dalmatia.

¹¹ Ichu ai na inyi nyi Luka amonyi. Ira Mariko muche nao kipfa echiidima injitarama mnu iṟunda-li lyako.

¹² Tikiko njilemduma Efeso.

¹³ Ili ochicha unjiendie ikoti lilya njileda ipfo Troa ko Karipo keweende na shitapu shilya na masaṟa halya heṟehya, nyiho njilangie mnu.

¹⁴ Aleksandria mpfuru ulya alenjiwutia mawicho hafoi Mndumii echimtaa kisumhanye mawuto hake.

¹⁵ Ukuṟise na iyo kyake, kyamba alelemana mnu na madedo hadu.

¹⁶ Ipfo mwanduyenyi fo kuwoka fo mondu foko kuwei-pfo ma umu alenjihoṟokyapfo kya indi walenjida wose. Ruwa nalawaitalie ideko-lyo.

¹⁷ Indi Mndumii alenjikaya-ho kanjikapya owanzo. Iki kileenenga ngaidima ionguo mwongoye fuhende imariso necha wamkambo wakafuicho wose, na inyi ngaashuka ianduyo lya opfu.

¹⁸ Mndumii nechinletsa echinjiwuta mawuto mawicho hose, nenjikiṟa enjiduo kipuo Wumanginyi woke wo ipfo ruwehu. Nyio ai mokaa echiichiko maheri hose halunganyi. Amenyi.

Shiiṟikiṟo shefurumia

¹⁹ Iṟikiṟa Pirisika na Akila, hamu na wa mba ya Onesiforo.

²⁰ Erasto alekaa ipfo Korinto, indi Tirofimo njilemda ipfo Mileto aluo.

²¹ Kambiṟa icha kisie kilamaasa. Eubulo wakauiṟikiṟa na Pudensi na Lino na Klaudio na wanawawama wose.

²² Mndumii nakae mrimenyi fopfo. Wutonga wukae nanyo.