2TIMOTEO 3 - Bibilia Kui Mdedie fo Kimochi

¹ Kumbuo imanya ke mkonu iya ya mainukyonyi maheri hechiwa herohya.

² Kyamba wandu wechikukunda wawenyii wai wa kiṟaṟi wakuwi wekuwa fesa, waṟahiṟahi, wai na tumbe, weruma Ruwa; wemiina wafee, wala fanyi, wai wambafu.

³ Wa ngarama, walaichi mma, weduo wengi sumu, wapfupfunae mrima, washimbi, wasuo orio kii kicha kyose.

⁴ Waṟingi, wadimidimi, wakutimbishye timbishi, kindo wakundi nyi wuseṟeeṟi na seko tsa nyama kota ikunda Ruwa.

⁵ Kya ora lo nja cha wandu wawode wuindi wakufananyishie wuindi woindya Ruwa indi pfinya ya iwikaho wuindi lohi iipfopfo. Iwo wai wado uwadiche.

⁶ Na kyawo maata waikuṟoṟowya na mba tsa wandu wakaduo mawaka mafafa mapfungo hawo. Naho nyiho hai malamye nyi manyamaṟo hai maṟahisheṟahishe nyi lango tsa orio mbari.

⁷ Mawaka haikupfunda-pfunda halaidime ikoya imanya wurango wo lohi ma indi.

⁸ Chando Yane na Yambire walelemana na Mose na wudo iwa walemanyi na kiwulohi, nyiwo wandu wapfulukio mhie fowo walakia kiheshyonyi kya wuidiki.

⁹ Indi wechishika haleshepfo kyamba wutondo wowo wumanyikie kose na pata chando kiwei na ko Yane na Yambire.

Shitutumo shefurumia

¹⁰ Kya indi iyo omeosha kiloshio kyako, uwerianyi na wupfundi woko na wuteteṟi na wuitiki wo ikuhoṟotsya haa-hateṟye na wuidiki woko, na wuleeli woko; wuhoṟotsu na wukundi woko, na wutirisi woko.

¹¹ Na shiterengyo na mawawyo halenjihoya ipfo Antiokia na ipfo Ikonio na ipfo Lisitra. Shiterengyonyi shilya njileshikarishia-ho na Mndumii alenjiletsa nasho shose.

¹² Na wudo na iwa waitambahanye moo kui wuindi woindia Ruwa wo Kristo-hu Yesu wechiterengyo wose.

¹³ Indi wandu walya wawicho na walembi wo wechiitika ihenda wichuo wechilemba wandu nawo wawenyi wai walembe.

¹⁴ Indi iyo utsinde na shilya sha lohi ulekulosha na ishiidikia nakamu komeshidambikyo; uichi ke nyi waki walekulosha.

¹⁵ Uichi na Maṟehyo halya Maele nyi wokia wututu wopfo, naho heidima ikuwonya wuṟango woimanya okiio luwukye wuidikinyi wukuwode na Kristo Yesu.

¹⁶ Maṟehyo hose Maele hai mahomoye nyi Ruwa hai mecha hepfunda na hededya na heheluo na hetoṟishya wandu wuhorotsunyi.

¹⁷ Kundu mndu o Ruwa nawe mtsane aa mteseheṟye kya iwuta orio wuto icha lyose.