2TIMOTEO 2 - Bibilia Kui Mdedie fo Kimochi

¹ Na wudo iyo, manoko, ukuwangie wutongenyi iwu wui Kristo-hu Yesu.

² Ambia kiloshio kilya uleicho koko oshangunyi lo wangochi wafoi sho ualie wandu waidikye iwa wasumuhanyi sa wechiidima ilosha wengi.

³ Kusanze na inyi ikukarishya mawawyonyi cha mbahanyi mcha o Kristo Yesu.

⁴ Mohenda shidenyi nekekuṟisa na mbonyi tseluya moo, kundu nachihiane na msongoru o shida.

⁵ Manya mndu oose mokapa mamtangi echiidama iwinga na iinengo kiṟumi kya wowinza ya mafuo apfungyo oṟo ya shila eheshana nawo kui sungusihupfo.

⁶ Mdemi aleṟunda iṟunda liumu nawaṟi o nasonguo ihawyo kya masambuo.

⁷ Adanya iki ngakuwia. Na Mndumii nakuenenge mtichie foitichia na imanya shindo shose.

⁸ Kumbuo Yesu Kristo ichu aleṟutso wapfunyi apaṟikye kisharinyi kya Dawidi kui mwongoye foko fo Sia ya okiio.

⁹ Mfo fonnenga njiwawiṟo itane ngapfungo na mshe cha mndu mbafu, indi dedo lya Ruwa lyewa ipfungapfo.

¹⁰ Nkyo kitewe ngakutirisia njekaa shi ya shose kimaduma kya wasambuṟe walya wa Ruwa, kundu nawo wakuwonye okiio lo Kristo-hu Yesu hamu na wuitoṟi wo mlungana.

¹¹ Mhambie fu fo lohi: “Kyamba kokoya lulepfa hamu nao, na itsinda na moo lochitsinda lui nao.”

¹² “Kokoya lokutirisia hamu nao, na itoṟya lochiitoṟia da kimu nao. Kokoya so lomkana nao echilukana so da.”

¹³ “Kokoya so loda lulakae wahendeli, o ekaa ai mhendeli mlungana, kipfa alaidima ikukana amonyi.”

Mṟundi sa amsange nyi Ruwa

¹⁴ Uwakumbuṟye ishi ochiwaikimba wuikimbi wu oshangunyi lo Ruwa ke walaire shida ya njolimi kui madedo ilaende kindo shila nyi ipfuluo walya weadanya.

¹⁵ Itika ikumanyishya Ruwa mṟundi mtsane alawode ipfia sonu iṟunda lyake echilosha idedo lya ki-wulohi kui wuhoṟotsu.

¹⁶ Indi mawesano ha kiwuyana na madedo ha ho uhadiche; kipfa hekeengeṟa iletsana wandu na Ruwa melemele lyo, kipfa tso tsechilandaṟisha wumbafu kya ngoseṟa.

¹⁷ Na idedo lyawo lya mbari ii lyechilya cha ode liwicho lilechiwa ikapo.

¹⁸ Kiidi kyawo kwifo Himenayo na Fileto, nyiwo waleasha ki-wulohi kilya ili wehamba ke iṟuka lyadu lilembutika wai, wakafurunjia maata mwidikye fowo.

¹⁹ Kya indi kiwanja kitumhari kya Ruwa kiikiwanzi kihoṟoki nakyo kii-kiṟehie mṟeho fui mṟehie fuhambie, “Mndumii aichi wai wake,” na lingi, “Orio mndu ekesenda rina lya Mndumii nalekane na wumbafu.”

²⁰ Indi kiidi mba ing'anyi kuwode nzohoṟa tsa orio mbari. Tsingi nyi tsa sahabu na pesa tupu tsingi tsa mbau ang'u tsa teri. Na kyatso kwipfo tsiwode iṟunda lya kyaanya na tsingi iṟunda lyingi.

²¹ Wulalu-le kokoya mndu akuhaṟamisha amonyi kalekana na shindo sho shose shiteṟefutsie mrima o echiwa kichoṟe kya ichopa kii kiilishe kyeṟundya orio iṟunda icha lyose.

²² Dicha malang'a halya ha ki-wanake, indi uwingye wuhoṟotsu na wuidiki na makundano na ofoṟo urianyi na wandu walya waiterewa Mndumii wawode ngoo tsiharami.

²³ Indi mawesoweso halya ha wutondo halawode wuṟango ulekane naho kipfa uichi ke ho hekeende shiloyo.

²⁴ Indi mṟundi o Mndumii nalawe moloya. Kya indi kimbaṟi naololye wandu wose nawe mlosha mcha akutirisie shiwicho shilya aiwutio.

²⁵ Echidedya kiomboho walya walehanyi nao kulako Ruwa echiwailachia mhie nawaenenge idumbuya na imanya kii-wulohi wawuye isanjika mdo.

²⁶ Mhie yawo mcha iwawuuye-se; waturuchuke ipfo mshihodinyi fulya fo Satana wai wapfunge nyio kyewatana iindia shilya akundi.