2SAMWELI 9 - Bibilia Kui Mdedie fo Kimochi

Dawidi na Mefiboshethi

¹ Mkonu fumu Dawidi kawesa, “Kuwode ma mndu umu atsuheeho o oshari lo Sauli kokoya nyi aiho njiwekundi imbutia mecha kipfa kya Yonathani.”

² Kuwewode mṟundi umu o oshari lo Sauli elaho nyi Siba, alelaho nahende ko Dawidi. Mangi Dawidi kammbesa, “Iyo nyi Siba?” Siba kamhaluo kambia, “Ee nyi inyi Mndumii, mṟundi opfo.”

³ Dawidi kammbesa, “Kuwode ma mndu umu o oshari lo Sauli atsuheeho, kundu njiidime imloṟa ikunda lya Ruwa?” Siba kamhaluo kambia, “Kuwode mana o Yonathani kyaindi o namlemeri madende.”

⁴ Nahong'u Dawidi kammbesa, “Nku akeri?” Siba kamhaluo kambia, “Nyi akeri kulya Lodebari, kiidi kya mba ya Makiri ai mana o Amieli.”

⁵ Kyasia, Dawidi kaduma naendo, nao kaendo awuka kiidi kya mba ya Makiri ipfo Lodebari.

⁶ Mefiboshethi mana o Yonathani na mchuku o Sauli ahende ishika oshangunyi lo Dawidi, kaoloka madendenyi ha Dawidi na impfiria ndi kechimuadapfuma. Dawidi kamlaha, “Mefiboshethi.” Nao kamiidikia kahamba, “Ee Mndumii nyi inyi mbee (mṟundi opfo.)”

⁷ Dawidi kambia, “Ma kulaowuo; njikundi ikuwutia mecha kipfa kya ndeo o Yonathani. Njikudambikia oruka lulya lose luwei lo sahuyo Sauli, na iyo wokia inu na maheri hose nochiwa molya mesenyi na inyi.”

⁸ Kyasia, Mefiboshethi kamolokia se madendenyi hake kambia, “Nkili onjiwutia ṟiho ling'anyi lidi na inyi njii mfafa kota kite kipfie?”

⁹ Kyasia Dawidi kalaha Siba mṟundi o Sauli, kambia, “Nzohoṟa tsilya tsose tsiwei tsa Sauli mnene opfo na oshari loke, njidambikia Mefiboshethi.

¹⁰ Na iyo na wana wapfo na waṟundi wapfo, mochiṟundia madema halya hose ha Sauli na iende kelya kya kanyi ko Mefiboshethi.” Kyaindi Mefiboshethi njeduma nawe mhenu oko na ilya mesenyi koko maheri hose.

¹¹ Nalyo Siba awode wana ikumi na watanu (15) na waṟundi makumi hawi (20), kahaluo Dawidi, kambia, “Njechiwuta shindo shose chandu okundi Mndumii.” Wokia kiheri kyo Mefiboshethi kalya mesenyi imu na Dawidi cha wana wake.

Dawidi na Mefiboshethi

¹² Mefiboshethi nawewode mana umu o kisoṟo elaho Mika. Wandu walya wose wawekekaa kiidi kya mba ya Siba wakawa waṟundi wa Mefiboshethi.

¹³ Kyasia, Mefiboshethi naweimlemeri madende hake hose, kakaa kulya Yerusalemu na ilya mesenyi ya Mangi o oruka lulya kiheri kyose.