2SAMWELI 8 - Bibilia Kui Mdedie fo Kimochi

Dawidi awinza njoruka tsimṟingichie

¹ Kiheri kitutu kikaida, na Dawidi kakapanase na Wafilisti kawawinza na iwasoka wuchili wo mṟi.

² Dawidi kakapase na iwinza Wamoabu. Kawia wapfungo walya walae wanda kui otasa , kawaha orio wandu wawi kiidi kya orio wandu waṟaṟu. Walya waledeo wakawa masinga hake na imtaa okamba orio maka.

³ Kyasia, Dawidi kakapa na iwinza Hadadezeri mana o Rehobu, ai mangi ya oruka lo Soba, Hadadezeri kechihenda iwihiṟa wumanginyi woke oruka lo meda fo Efrate.

⁴ Dawidi kaduo masinga waskari wa frasi kiku kimu mahana mfungade (1,700) na waskari wa madende shiku makumi hawi (20,000). Dawidi kafunja madende ha frasi tsekuruo makari ha shida, kakutsuhaṟia frasi tsishikie ikuruo magari ha shida ihana (100) tupu.

⁵ Dawidi kawaha waskari shiku makumi hawi na shiwi (22,000) wawuka Dameski mṟi fo oruka lo Siria, sa walecha itarama Mangi Hadadezeri.

⁶ Dawidi kawika kiṟaṟo ya waskari wake wafoi kiidi kya mṟi fo Aramu fo Dameski. Waaramu walya wakawa masinga hake na imtaa okamba. Ruwa kainenga Dawidi pfinya yekapana na iwinza orio handu ahenda.

⁷ Dawidi kasoka wachili walya wa Hadadezeri ngao tsawo tsiwetsisungusie nyi sahabu na itsiduo Yerusalemu.

⁸ Kaweduo na aṟeṟa ifoi iwuka mṟi fo Beta na Berothai iwekeri wumanginyi wo Hadadezeri.

⁹ Mangi ya oruka lo Hamathi ahende iicho ke Dawidi nakapa na iwinza waskari wose wa Hadadezeri,

¹⁰ kaduma mana oke elaho Joramu ko Dawidi nambie otana, kipfa o alemkapana nawo shiheri shifoi alaidime iwawinza. Joramu kahenda ko Dawidi na imdaya shiṟimiṟa shishisungusie nyi sahabu, menya ya heleri na menya ya aṟeṟa.

¹¹ Dawidi kashisanza na sahabu na heleri alewada shidenyi.

¹² Kuwoka njoruka tsa Edomu, Moabu, Amoni, Filisti, na Amaleki na shingi alesoka Hadadezeri mana o Rehobu kashidambikia mbenyi ya Ruwa.

¹³ Dawidi kechiwuya na kanyi kawaha waskari shiku ikumi na nyanya (18,000) Waedomu kiidi kya mfoo fo monyo, na rina lyake lyikang'ana mnu.

¹⁴ Kyasia, Dawidi kawika kambi tsa waskari wake orukenyi lo Edomu lose, na Wamoabu wose wakawa wumanginyi woke. Na Ruwa kainenga Dawidi pfinya ye winza shidenyi orio handu hose ahenda.

¹⁵ Kyasia, Dawidi kachilia oruka lose lo Israeli na ihoṟokia necha kulawode mndu oose awonyio ang'u asoko shimsumhanyie.

¹⁶ Yoabu mana o Seruya kahoṟokia waskari wa shida; Yehoshafati mana o Ahiludi kahoṟokia iṟunda lya wuheri wowika ngumbuo tsa oruka.

¹⁷ Sadoki mana o Ahitubu, na Ahimeleki mana o Abiathari, wakawa wakohanyi, Seraya kawa mṟehi o menge ya Mangi yeanduo mondu.

¹⁸ Benaya mana o Yehoyada kahoṟokia Wakerethi na Wapelethi, weringa Dawidi, na wana wa Dawidi wakawa wakohanyi.