2SAMWELI 7 - Bibilia Kui Mdedie fo Kimochi

Ndumi ya Nathani ko Dawidi

¹ Dawidi kakaa mmbenyi yake ya wumangi, na Ruwa kawinza wakituwa walya wake wose sa wawemṟingichie.

² Kyasia, Dawidi kadeda na mwikimbi Nathani kambia, “Ambuya njikeri mbenyi injisungusie nyi mashidi ha wuhuru wung'anyi ha meresi, na isanduku lya Ruwa likiheri ihemenyi.”

³ Nathani kamhaluo kambia, “Kuwutie ikyo uwode ipfo mrimenyi kopfo kipfa Ruwa nyi akeri na iyo.”

⁴ Kyaindi kio kya mfiri fulya, Ruwa kadeda na Nathani, kambia,

⁵ “Henda nowie Dawidi nalawone kechinjisungusia hekalu kundu njikae pfo.”

⁶ Kipfa njilemekae mmbenyi wokia kiheri kilya njilemusamiṟa iwuka Misri.

⁷ Njilemenunuwe ko wasongoru walya wa Israeli, walisi wa wandu wako, ma njilemewawese nkili walalemenjisungusie hekalu licha lisungusie nyi mbao tsa seda, mbao njicha tsa wuhuru wung'anyi pfo.

⁸ Wia Dawidi mṟundi oko ke inyi Ruwa o Ruwehu njilemuuta wulisinyi wo machondi kulya patenyi kundu nawe msongoru o wandu wako wa Israeli.

⁹ Njiwei ichumia na iyo handu hose na mkonu yose njechikuringa na irumatsa wakituwa wapfo wose. Njeching'anyisha rina lyapfo cha halya ha wasongoru wang'anyi kunu wuyanenyi.

¹⁰ Ngamesambuṟa handu wandu wako wa Israeli wechikaa na iwawika ho wakae mlungana. Kuwode wandu wawicho wechiidima iwawonyia sepfo cha kiheri kilya kya wachili waweichilia oruka.

¹¹ Wokia kiheri kilya njilewika wachili huya wandu wako Israeli, njechimuringa na wakituwa wanu wose. Na ngoseṟa ya shose, inyi Mndumii-Ruwa ngakuwikia kyasa ke njechikuwikia mba.

¹² Kiheri ochipfa na iṟiko handu hamu na wa oshari lopfo wasonguo, njechidambikia wumangi wopfo ko mana opfo na njechiinenga wumangi woke pfinya ing'anyi.

¹³ Manacho nyi o echinjiwikia hekalu. Na wumangi woke wochikaa mlungana.

¹⁴ Njechiwa ndeye nao nechiwa mana oko. Kyaindi kanjidekio njechimdedia chandu ndeye o wuyana ekededia mana amkundi.

¹⁵ Kyaindi njechiwuta ikunda lyako na owoko loko kokepfo, chandu njilewuta ko Sauli, ngamsoka wumangi.

¹⁶ Oshari lopfo lochichilia oruka loko mlungana.

¹⁷ Kyasia, Nathani kahendia Dawidi na immbia shose shilya Ruwa ahamba.

Kiterewo kya Dawidi keana Ruwa

¹⁸ Kyasia, Dawidi kahenda ihemenyi lilya leterewia, kadamia oshangunyi lo Ruwa katerewa Ruwa kahamba, “Njiwaṟi ishi onjiwutia inyi na oshari loko pfo.

¹⁹ Ngoseṟa ya shose, wulalu nowika kyasa ke, nochiinenga oshari loko wumangi wo mlungana. Ikunda li lyapfo lying'anyi mnu likaida mahiyo ha wandu wose!

²⁰ Njikuwie se kiki Mndumii? Iyo nonjiichi inyi mṟundi opfo na pata.

²¹ Nowuta shindo shi shing'anyi shidi kipfa kya ikunda lyapfo na kiṟumi kyapfo, na inyi njiiidime manya.

²² Iyo nyi mwitoṟi o shose? Lulemeicho kya Ruwa ungi cha iyo-pfo. Ma kuwode Ruwa ungi cha iyo-pfo.

²³ Nyi oruka luhya iya wuyana lulemeambia mboṟa cha ilu lo Israeli? Nulewaashuo wasambuṟe wapfo wusingenyi kulya Misri na iwawutia ṟiho tsing'anyi, kochiwingia wandu wose na maruwa hawo oshangunyi lowo. Ishi shose nolewuta kundu rina lyapfo liinengo kiṟumi wuyanenyi kose.

²⁴ Iyo Mndumii nulesambuṟa Israeli wawe wandu wapfo mlungana na iyo kowa Ruwa odu.

²⁵ Kyasia, wulalu Mndumii awutsia kyasa kilya uleluwikia inyi na oshari loko.

²⁶ Na rina lyapfo ling'anyisho na wandu wahambe mlungana; Mndumii nyio Ruwa o Israeli. Na iyo nochiringa wumangi woko mlungana.

²⁷ Cha kipfa kya iyo Mndumii-Ruwa, menyi matorito, Ruwa o Israeli, nulenjiloṟa inyi mṟundi opfo, na injiwia oshari loko lochichilia mlungana, ngawona ukari woende kiterewo ki oshangunyi lopfo.

²⁸ Na wulalu Mndumii, iyo nyi Ruwa na madedo hapfo nyi halohi. Nuleluteṟia shindo shi shose,

²⁹ Koikyo Mndumii ngakuterewa noluwikie mboṟa inyi na oshari loko, luidime ichumia na ikunda lyapfo, kipfa iyo Ruwa nyi iyo uleluwikia kyasa kyo.”