2SAMWELI 6 - Bibilia Kui Mdedie fo Kimochi

Dawidi aende Isanduku lya mkundana Yerusalemu

¹ Kyasia, Dawidi kasanyia waskari ngohoda wa Israeli (30,000).

² Kawaduo mṟasa Baal-Yuda ihenda ionduo isanduku lya Mndumii, Mangi ya Ruwehu adamie huye ya malaika wose waringi.

³ Wakawuta isanduku lilya kulya kanyi ko Abinadabu na ilidosa kulya msaṟihu likyeri huye ya ikari lilya lyechirendesho nyi wana wawi wa Abinadabu welaho nyi Uza na Ahio.

⁴ Ahio nawelisongoe kechichumia ko madende.

⁵ Dawidi na Waisraeli walya wakacha nduma yawo wawachihie mnu, wechishina na iimba shiimbo na pfinya tsawo tsose wechiana Mndumii na ikapa zeze, puṟupu, mtingo, shichengeṟe na matoasi.

⁶ Kyasia, kiheri waleshika handu wekehuya Ngano kolaho Nakoni; mapung'a halya hawekuruo ikari lilya lirie isanduku lilya lya Ruwa, hakateṟeshuka, na Uza kaleshia owoko loke iṟihika isanduku lilya lya Mndumii lilaomboke.

⁷ Ruwa kasuo na iwaha Uza kipfa kya ili alewada isanduku lilya liweliteṟie liwado nyi Walewi tupu; kapfia handu halya isanduku lilya liwei.

⁸ Dawidi kasuo kipfa kya kilya Ruwa awutia Uza, kalaha handu halya Peres-uza. (Handu ha nyashi ya Ruwa huya Uza). Handu halya kukelaho Peres-uza mṟasa inu.

⁹ Dawidi amewona kudo kaowuo Ruwa, na immbesa, “Njiduo njida isanduku li kanyi?”

¹⁰ Dawidi kaowuo iduo isanduku lilya lya Mndumii Yerusalemu, indi kaliduo kanyi ko mndu elaho Obedi-edomu Mgiti, awukie mṟi fo Giti.

¹¹ Isanduku lilya likakaa kulya kanyi ko Obedi-edomu ko meri iṟaṟu. Ruwa kawikia Obedi-edomu mboṟa na walya wa mba yake wose.

¹² Dawidi ahende iicho ke Obedi-edomu na mba yake wawikio mboṟa kipfa kya isanduku lilya; kahenda ira kaliduo Yerusalemu kechishina;

¹³ Dawidi katirimisha waskari walya wawerie isanduku lya Mndumii wamemarisa ichumia madende haṟandaṟu kusonguo koke; kawikia Ruwa kidaso kya ipung'a na ihache limu linoru.

¹⁴ Dawidi kaichika Ruwa kechimshinyia ko pfinya tsake tsose na sia ing'anyi akupfungie okowa lo kikohanyi kitsinyi.

¹⁵ Dawidi na Waisraeli walya wakaduo isanduku lilya lya Ruwa Yerusalemu wechiimba na sia ing'anyi na ṟu lya membe.

¹⁶ Kiheri waleshika mṟinyi fo Yerusalemu, Michali ai mana o Mangi Sauli na mka o Dawidi, kaimehia itiṟishenyi, kasuo mnu mrimenyi lilya alewona Dawidi kechitoolatola na ishina osehu lo Ruwa.

¹⁷ Wandu walya wakawika isandukuu lilya ihemenyi lilya Dawidi aweliteseheṟie; kyasia, Dawidi kawuta shidaso shechihiṟa Ruwa na ioloṟa mondu na Ruwa.

¹⁸ Kyasia Dawidi amemarisa iwuta shidaso shilya, kawikia wandu walya mboṟa kui rina lya Mndumii-Ruwa.

¹⁹ Dawidi kahawia Waisraeli walya wose kelya. Kainenga orio mndu msoṟo na mndu mka mkate fumu, nyama injioke na mkate fumsungusie na ndunda tsa msabibu, na orio mndu kahenda kanyi.

²⁰ Kyasia, Dawidi kahenda kanyi iiṟikiṟa, kaambilio nyi Mikali mka oke, na mka ulya kambia, “Inu mangi o Israeli nakunyiṟa ko ikutandaluo kitaṟe cha tondo oshangunyi lo waṟundi wa kika na wakisoṟo.”

²¹ Nahong'u Dawidi kamhaluo kambia, “Njiwekeri ishina njechiana Ruwa chu alenjisambuṟa huye ya ndeo na kishari kyake, na injiwika njiwe mnene o Israeli. Njechiengeṟa ikunyiṟa ko Ruwa.

²² Iyo noidima iwona ke inyi nyi tondo kyaindi waṟundi walya wa kika na wakisoṟo wechinjiindia.”

²³ Mikali mana o Sauli kakaa mhumba mṟasa ipfa lyake.