2SAMWELI 5 - Bibilia Kui Mdedie fo Kimochi

Dawidi awa Mangi ya Israeli yose

¹ Kyasia, shishari shose sha Israeli yose wakachea Dawidi kulya Hebroni na immbia, “So nyi wana wa wama wapfo wa samu.

² Kiheri kilya Sauli awei Mangi yadu, na iyo kowa msongoru odu shidenyi, Ruwa nalekuwikia kyasa ke nechikuwika nowe msongoru na Mangi o Israeli yose.”

³ Kyasia, wameku wose wasongoru wa Israeli wakahendia Mangi Dawidi kulya Hebroni. Wakawika kyasa nao kulya Hebroni oshangunyi lo Mndumii-Ruwa, na imshimbuo ko imshia mafuda kawa Mangi ya Israeli.

⁴ Kiheri Dawidi aleinengo wumangi nawewode maka makumi haṟaṟu (30) nao kawa msongoru owo ko maka makumi hana (40).

⁵ Dawidi nalechilia Yuda ko maka mfungade na kyenga akeri Hebroni, na ichilia Israeli na Yuda ko maka makumi haṟaṟu na kaṟaṟu akeri Yerusalemu.

Dawidi awada Yerusalemu

⁶ Kyasia kiheri kikacha Dawidi kahenda Yerusalemu na waskari wake isaṟikia wandu wekekaapfo na oshari lo Wayebusi. Wandu walya wakatengelukia Dawidi na immbia, “Iyo ochiidima iluwingapfo, ma wandu walawode meso na watiliwanyie shiwungo wechiidima ikutirimisha.”

⁷ Kyaindi Dawidi kakapa na iwada mṟi fulya fo Sioni, na ifulaha ni mṟi fo Dawidi.

⁸ Kyasia mkonu fulya Dawidi kawia wandu wake, “Kuwode mndu ose iya asuo Wayebusi chandu njiwasuo inyi pfo. Kurenyi hendenyi mdoye kulya maṟungunyi ha mṟinga ha mṟi fo Sioni, muwahe mapfupfuṟe hose na walya watiliwanyi shiungo wose.”

⁹ Kyasia, Dawidi amewada mṟi fulya fumṟingichie omombo fo Sioni, kakaapfo, kafulaha nyi “Mṟi fo Dawidi.” Dawidi kawika mṟi fulya kafuṟingichia omombo kechiwokia Millo na ihendia kiidi kya mṟi fulya.

¹⁰ Kyasia, wunene wo Dawidi wukaengeṟeka ing'ana kipfa ili Mndumii awekeri nao.

¹¹ Mangi Hiramu o Tiro kadumia Dawidi waṟundi wake; na mashidi ha meresi, waaria wepacha mashidi, na waria wewika mba, kundu wawikie Dawidi mba.

¹² Kyasia, Dawidi kamanya ke, nyi Ruwa ambikie ke nawe mangi o Israeli, na wulalu Mndumii nakeri ioṟa oruka lu kipfa kya wandu wake wa Israeli.

¹³ Dawidi amsamia Yerusalemu awuka Hebroni, kaalika waka wengi na masuria; nawo wakafee wana wafoi wakisoṟo na wa kika.

¹⁴ Iwa nyiwo wana wa Dawidi walefeo kulya Yerusalemu: Shamua, Shobabu, Nathani, Solomoni,

¹⁵ Ibhari, Elishua, Nefegi, Yafia,

¹⁶ Elishama, Eliada, na Elifeleti.

Dawidi awinga Wafilisti

¹⁷ Kyasia, Wafilisti wahendeiicho ke Dawidi naleshimbuyo nawe Mangi ya Israeli, wakahenda imbalia wambade. Dawidi ahende iicho ke wambalia, kahenda ikuṟika omombonyi koke.

¹⁸ Wafilisti walya wakashika mfonyi fo Refaimu na ikuṟaṟanja kose.

¹⁹ Kyasia Dawidi kadeda na Mndumii kammbesa, “Ngahenda ikapana na Wafilisti wa? Ngesa ochinjitarama njiwawinge?” Ruwa kamhaluo, “Ee, henda kapana nawo. Njechikukapanyia nowawinge.”

²⁰ Nahong'u Dawidi kahenda ikapana na Wafilisti walya kulya Baal-perasimu, na iwawinza, Dawidi kechiṟihiyo kahamba, “Nyi Mndumii awuta iki. Nacheya wakituwa wako ko pfinya tsing'anyi cha tsilya tsa mṟinga fo ipalyipalyi kiheri lyiwuya na kundu kuhadutsu.” Kyasia, Dawidi kalaha handu halya Baal-perasimu.

²¹ Nahong'u Dawidi na waskari wake wakasanyia na ikudika masanamu ha maruwa ha Wafilisti, na nzohoṟa tsifoi tsiledeo nyi Wafilisti kiheri wawedicha.

²² Kyasia, Wafilisti walya wakawuyase lyakawi na ikuṟaṟanja kulya rendewelenyi fo msaṟi fo Refaimu.

²³ Nahong'u Dawidi kahenda iwesa se Mndumii nambie chandu echihendia Wafilisti walya, na Ruwa kamhaluo na immbia, “Makulawahendie ko kusonguo kowo, henda nduma yawo nowaṟingichie na iwakapa iwuka ora lulya lo kawi handu mashidi halya ha miforosadi hakeri.

²⁴ Koicho mtiṟi ya madende iwuka huya mashidi halya ha miforosadi, woka ikapana nawo, kipfa mtiṟi fomuwia Mndumii nakeri oshangunyi lonu echimukapanyia na iwinza Wafilisti walya.”

²⁵ Kyasia, Dawidi kawuta chandu awawaso nyi Mndumii, kakapa na iwingia Wafilisti walya wokia Geba mṟasa wakashika Gezeri.