2SAMWELI 4 - Bibilia Kui Mdedie fo Kimochi

Iwoho lya Ishboshethi

¹ Kiheri Mangi Ishboshethi mana o Sauli ahende iicho ke, Abneri nambahe kulya Hebroni, wukari woke wukosia na wandu wake wakaowuo mnu.

² Wusongoru wo waskari walya wa shida wa Israeli wukawa wanda ya Baana na Rekabu, wana wa Rimoni, awukie Be-erothi o oshari lo Benyamini.

³ Wandu wa Be-erothi wawaitale cha nyi wandu wa Benyamini, ma chandu waledichia Gitaimu handu wekekaa mṟasa inu.

⁴ Kuwewode mchuku o Mangi Sauli awemlemeri madende, elaho nyi Mefiboshethi mana o Yonathani; mchuku chu nawewode maka itanu kiheri Sauli na Yonathani walewoho kulya Yezreeli. Mbonyi tsilya tsa opfu tsikashika kulya mṟinyi fowo, na meri o mana kammira kadicha nao, na kechikambiṟa mnu kaombotsa mana ulya nao katiliwana mbihu fose.

⁵ Kyasia Rekabu na Baana wakakure wakahenda kanyi ko Ishboshethi na ishika ho kiheri mbaṟi fuwekeri huya mdo; wakamkoya aonyonyie.

⁶ Wakakusoṟowitsia kulya mba walahoṟotso nyi mndu cha kipfa mndu mka ulya moringa mongo nawelee alehelie mnu kechiela Ngano.

⁷ Wahende ishika kiṟihenyi kyake kelaa, wakakoya Ishboshethi nalee mado, wakambaha na idumbuo mdo foke. Wakakudika mdo fulya wakachumia nafo kio taṟaṟaa kulya nuka ya Yordani.

⁸ Kyasia wakahenda mṟasa Hebroni, wakainengia Mangi Dawidi mdo fulya wakambia, “Ambuya ifu nyi mndo fo Ishboshethi, mana o Sauli, mkituwa ulya opfo awekundi ikuwaha. Inu Mndumii nataa, kiṟache kyapfo huya Sauli na mba yake yose.”

⁹ Kyasia, Dawidi kawahaluo kawawia, “Ngalya nyamu ko rina lya Ruwa chu menyi moo, ichu anjikiṟie na wakituwa wako wafoi.

¹⁰ Kiheri kilya mndu umu kulya Ziklag, alenjiendie mbonyi tsa opfu lo Sauli kechichihio ke nanjiendie mbonyi njicha, kyaindi njilembaha, kiwe kiṟimiṟa kyake kya injiendie mbonyi tso.

¹¹ Mbonyi tsechiwa njiwicho mnu ko mndu awahie mndu alawode mti akulee kanyi koke! Kyasia, wulalu njihenda itaa kiṟache huye yanu njechimuwaha.”

¹² Nahong'u Dawidi kawia waskari wake wawahe Rekabu na Baana, nawo wakawawaha na iwadumbuo mawoko na mdende hawo na iwamasa mbai ya nduwa ya Hebroni. Wamma iwuta wado, wakadumbuo mdo fo Ishboshethi na ifuṟika handu Abneri awemṟike ipfo Hebroni.