2SAMWELI 3 - Bibilia Kui Mdedie fo Kimochi

Pfinya tsa Dawidi tsaengeṟeka

¹ Wandu wa mba ya Sauli wakakapana shida shing'anyi na wandu wa mba ya Dawidi ko mfiri ifoi. Dawidi kaengeṟa iwanga, na mba ya Sauli ikaengeṟa ifafaa.

Wana wa kisoṟo wa Dawidi

² Wana wafoi wa Dawidi wakafeo kulya Hebroni; Mana oke o kuwoka nyi Amnoni na mae mbe Ahinoamu awukie Jezreeli,

³ O kawi mbe Kileabu na mae nyi Abigaili, awempfie nyi mii oke o kuwoka eleho Nabali awukie mṟi fo Karmeli; na o kaṟaṟu nyi Absalomu na mae nyi Maka mana o Talmai mangi o Geshuri;

⁴ O kana nyi Adonia na mae nyi Hagithi. O katanu nyi Shefatia na mae nyi Abitali,

⁵ O kaṟandaṟu nyi Ithreamu amfee nyi Egla, mka o Dawidi. Waka wa Dawidi, walefee wana wa wake wose kiheri awekeri kulya Hebroni.

Abneri ahendesana na Dawidi

⁶ Abneri kaengeṟa ikutumuhaṟa kiidi kya wandu wa mba ya Sauli, chando shida shawo na wandu wa Dawidi shiwekeri ing'ana.

⁷ Abneri kalaa na suria limu lya Sauli elaho Rispa mana o Aya. Kiheri kimu Ishboshethi mana o Sauli kawesa Abneri, “Nkili olaa na suria lya ndeye oko?”

⁸ Abneri kasuo mnu kawia Ishboshethi, “Nowona ke inyi nyi mndu o numa kunu Yuda? Chandu ngamemuwutia nyo na ndeyanu Sauli shindo shifoi, na imukapanyia mulawe masinga ha Dawidi, inu mokaria iwona inyi njii mmbicho kipfa kya mndu mka?”

⁹ Mndumii nanjiwahe kokoya njilawuta shose Mndumii-Ruwa aliya Dawidi nyamu.

¹⁰ Mndumii-Ruwa naleliya nyamu Dawidi ke nechisoka Sauli wumangi woke na imnenga o. Nao nechiitoṟia Israeli na Yuda kuwuka Dani mṟasa Beeasheba. Mndumii nanjiwahe njilametarama isho mndumii aleteṟia shiwutike shiwewa.

¹¹ Ishiboshethi katsia alakarie ihaluo Abneri idedo, kipfa kya imowuo mnu.

¹² Kyasia, Abneri kaduma waṟundi wake ko Dawidi akeri kulya Hebroni na immbesa, “Nyiu ahenda ichilia oruka lu? Wika kyasa na inyi njikutarame noidime ichilia oruka lose lo Israeli.”

¹³ Dawidi kamhaluo kambia, “Ikyo ohamba nkikicha, kyaindi njechiwika kyasa na iyo komeidima injiendie mka oko, Mikali mana o Sauli kiheri kyo ocha iwonana na inyi.”

¹⁴ Dawidi kaduma ndumi ya sia ko Ishboshethi mana o Sauli na immbia, “Njiwihiṟia Mikali mka oko, njilemtaya ngosa ya njonyi tsa odino tsa wasoṟo ihana wa Wafilisti.”

¹⁵ Kyasia, Ishboshethi kaonduo Mikali iwuka ko mii oke Paltieli mana o Laishi.

¹⁶ Paltieli kaosha nduma yawo kechifihiṟa mṟasa mṟi fo Bahurimu. Abneri ekimmbona kambia, “Wuya na kanyi ulalu kudi, ‘Palteli kahaluka kawuya na kanyi.’”

¹⁷ Abneri kadeda na wanene wa Israeli kawawia, “Ko kiheri kileshe muwelangie Dawidi nawe Mangi yanu;

¹⁸ Kiheri kyamshika kewuta kudo Ruwa nawehambie, ‘Ko owoko lo Dawidi, njechikiṟa wandu wako Israeli iwuka wusingenyi wo Wafilisti na iwuka mawokonyi ha wakituwa wawo wose.’”

¹⁹ Abneri kadeda na wanene wa oshari lo Benyamini, naihenda iwia Dawidi isho wandu wa Benyamini na Israeli wateṟia wahende iwuta.

²⁰ Kyasia, Abneri kahenda na wandu makumi hawi isahia Dawidi kulya Hebroni, na Dawidi kawaambia na mfuho fung'anyi.

²¹ Abneri kawia Dawidi, njihenda ikuendie na ikudambikia Waisraeli wose, nawo wechikusambuṟa nowe Mangi yawo, chandu uwelangie mkonu ifoi. Dawidi kalekia Abneri nahende na ofoṟo.

Yoabu awaha Abneri

²² Kiheri kitutu kyamma iida Abneri amehenda, Yoabu na wasongoru wengi wa Dawidi wakawuya shidenyi warie nzohoṟa tsifoi walewada.

²³ Yoabu na wasoṟo wake washida wahende icha na iwio ke, Abneri mana o Neri nelechaisahia Mangi Dawidi, nao kambia nahende na ofoṟo lo Mndumii,

²⁴ Yoabu kahenda kechidicha ko Mangi Dawidi na immbia, “Nkiki iki owuta? Nkili olekia Abneri kahenda na ofoṟo?

²⁵ Na iyo nuichi nacheiye na iya kimtambo, naambuye chandu lukeri numa nahende ikuṟeheṟa nawuye nachelukapa shida?”

²⁶ Kyasia Yoabu kaduma waṟundi wake wahende isahia Abneri na immbihiṟa. Wakamkoya nduwenyi ya Sira, wakawuya nao; na Dawidi alaichi nkiki kiwutika.

²⁷ Abneri ahende ishika Hebroni, Yoabu kamduo mongonyi fung'anyi cha ili akundi ideda nao amonyi; kaira oshu loke lung'anyi kakapa nalyo Abneri ndewunyi, na imbaha kechitaa kiṟache kipfa kya ili alewaha manaomaye o Yoabu o Asaheli.

²⁸ Dawidi ahende iicho mbonyi tsilya kahamba, “Inyi ngalya nyamu kui rina lya Mndumii ke, inyi na wandu wako luwode owingo kipfa kya samu ya Abneri pfo.

²⁹ Owingo lo kindo ki kiwicho luhoye Yoabu na mba yake. Wandu wose wa mba ya Yoabu wa inu na iwo wefeo shiheri shose, wakapo nyi ndaṟe mbicho ya kichomba, ang'u ndaṟe ya saka, wawe Mhuli , wapfe njaa na iwohio shidenyi.”

³⁰ Kyasia, Yoabu na manomae Abishai walewaha Abneri wechitaa kiṟache kipfa kya ili alewewaha manomae elaho Asaheli wechikapana kulya Gibeoni.

Abneri aṟiko Hebroni

³¹ Nahong'u Dawidi kawia Yoabu na wandu wake, “Randuonyi nguo tsanu na iṟaa makunyia, mochifihiṟa kipfa kya Abneri.” Kyasia Dawidi kaosha nduma yawo wakudikie isanduku lilya lirie Abneri wechihenda shipfunyi .

³² Kyasia, wakaṟika Abneri kulya Hebroni, Mangi Dawidi na wandu wake wakafihiṟa na ṟu lying'anyi alya shipfunyi.

³³ Nahong'u Dawidi kaimba kiimbo kya fowa kipfa kya Abneri kechihamba; “Nkili Abneri apfa cha mndu tondo wai?

³⁴ Mawoko na madende hake haimapfunge pfo; nambahe nyi wandu wawicho mnu ko mtambo!” Kyasia, wandu walya wose wahende iicho wado wakafihiṟase kipfa kya Abneri.

³⁵ Nahong'u Dawidi kaleha ilya kindo kyose mkonu fulya foṟika Abneri. Wandu wafoi wakaterewa Dawidi nalye kindo kitutu; kyaindi Dawidi kaleha kechilya nyamu ke echilya kindo kyose pfo, mṟasa kiukanyi.

³⁶ Wandu walya wechiicho mbonyi tsilya wakachihio mnu; chandu wekechihiṟo nyi shindo shingi shose Dawidi ekewuta.

³⁷ Kyasia, kipfa kya mawuto halya ha Dawidi, wandu wose wa Yuda na Israeli walemanya ke Abneri mana o Neri alewoho kipfa kya ikunda lya Dawidi pfo.

³⁸ Dawidi kawia wandu wake, “Inu nyi Mangi ang'anyi apfa kunu Israeli.

³⁹ Ma chandu njikeri msambuṟe, mshimbuo o Ruwa, kuwode kindo njechiidima iwutia wana wa Seruya pfo. Mndumii amonyi natae kiṟache ki ko wandu wawicho mnu kipfa kya mawicho hawo.”