2SAMWELI 24 - Bibilia Kui Mdedie fo Kimochi

Dawidi aitala wandu wa Israeli

¹ Kyasia, nyashi ya Ruwa ikadose huye ya wandu Waisraeli; katsutsuma Dawidi nawaendie ngataṟa koiitala wandu wose. Ruwa kawia Dawidi, “Henda itala wandu wose wa Israeli na Wayuda.”

² Kyasia Mangi Dawidi kawia Yoabu na wasongoru wa mbahanyi walya wawei nao, “Hendenyi muhende iitala wandu wa njosari tsose tsa Waisraeli, iwokia Dani mṟasa Beer-sheba, njikundi njimanye ke nyi wandu wenga waipfo.”

³ Kyaindi Yoabu kamhaluo kambia, “Ruwa menyi matorito, Ruwa chu opfo, nakuongeṟie Waisraeli ko mahana, nawekuinenga na moo mleshe mangi yako, kundu nowone wanduwo chandu wai wafoi na meso hapfo. Kyaindi njiwesa, nyi kipfa kya iki iyo mangi yako ui mchihiye kudo na kindo ki?”

⁴ Madedo ha Mangi hakawa hawode pfinya kota halya ha Yoabu na wasongoru walya wengi. Kyasia, Yoabu na wasongoru walya wengi wakakure wakahenda iitala Waisraeli chandu Mangi adeda.

⁵ Wakaambada meda fo Yordani, wakawoka iitala wandu kuwokia Aroeri na mṟi fukeri makidi hawi ha mfo fo Yordani, wakahenda Gadi na Yazeri.

⁶ Wakahenda Gileadi, na iida Kaeshi orukenyi lo Wahiti, wakashika Dani, wakawuka Dani na ishika Sidoni.

⁷ Wakashika omombo lo Tiro, na iida mṟi yose ya Wahivi na Wakanaani numa wakakure wakahenda Negebu ya Yuda ipfo Beer-Sheba.

⁸ Kyasia, wakawuya na Yerusalemu wammarisa iida oruka lose ko meri kenda na mfiri makumi hawi.

⁹ Nahong'u Yoabu kadikia mangi ndumi ya wandu waleitalo, Israeli kuwewode wasoṟo ngohoda shiku mahana nyanya (800,000) wawode pfinya tsekapana na oshu; na wasoṟo shiku mahana hatanu (500,000) wa Yuda.

¹⁰ Kyasia, Dawidi ameambilia mbonyi tsila tsa wandu waitalo, mrima foke fukasokio nyi fowa kadeda na Ruwa kambia, “Mndumii-Ruwa, ngakudekio mnu ko kindoki ngawuta. Ngaterewa nonjileheṟe kipfa kya utondo wu woko wung'anyi mnu.”

¹¹ Kyasia ili lya ngama, idedo lya Ruwa likachea mwikimbi Gadi awei mdume o Ruwa ko Dawidi likahamba,

¹² “Henda ko Dawidi nommbie, ‘Nyi inyi Ruwa njikeri ideda ngakuinenga shindo shiṟaṟu nosambuṟe ho kimu njikuwutie.’”

¹³ Kyasia Gadi kahenda ko Dawidi kambia, “Okundi maka iṟaṟu ilawode kelya orukeni lopfo? Ang'u idicha ko meri iṟaṟu kochiwingio nyi watwaṟi wapfo? Ang'u nokundi kuwade meri iṟaṟu ya ndaṟe njiwicho orukenyi kopfo? Wulalu kusaṟe nonjinenge ndumi njechiduo ko ichu anjiduma.”

¹⁴ Kyasia, Dawidi kahaluo Gadi kambia, “Kindoki kikiumu mnu! Kyaindi nyi nanga ngahoya mawokonyi ha Ruwa kipfa o na awode isaṟia, kota iombokia mawokonyi ha wandu.”

¹⁵ Kyasia, Ruwa kadika ndaṟe injiwicho kulya Israeli ngamenyi iya; ikakaaho mfiri iṟaṟu. Ikawaha Waisraeli shiku makumi mfungade (70,000) orukenyi kose lo Israeli kuwuka Dani mṟasa Beer-sheba.

¹⁶ Kiheri msu ulya o Ruwa awekuṟeheṟa irumatsa mṟi fo Yerusalemu, Ruwa kahoṟia Waisraeli walya kawia msu ulya awekeri iwaha wandu, “Tirima; Leka ulawawahese.” Msu ulya o Ruwa nawekeri kufui na handu wawekehuya Ngano ko Arauna, Myebusi.

¹⁷ Kyasia, Dawidi kahenda iwona msu ulya o Ruwa awekeri iwaha wandu, kawia Ruwa, “Ambuya inyi nyio njiwode mti? Nyi inyi njimonyi ngakudekio iyo? Wandu wa wawode mti pfo. Ngakuterewa nonjikape inyi na wa oshari loko.”

¹⁸ Mfiri na fulya Gadi kahenda ko Dawidi kambia, “Kure henda kulya ko Arauna Myebusi; handu wekehuya Ngano, nosungusie ho kitaṟa kedasia Ruwa.”

¹⁹ Kyasia, Dawidi kahenda, kawuta chandu Ruwa awawasa.

²⁰ Arauna kaambuya oralu lo seri, kawona Mangi Dawidi kechimhendia, kakure kahendia Mangi Dawidi na impfiria-ndi, na ihongoma na kyamu kyake kikakoya wanda.

²¹ Kyasia, Arauna kawesa Dawidi, “Nyi kiki kyakuende na koko inyi mṟundi opfo, Mangi yako?” Dawidi kamhaluo kambia, “Ngacha ihuṟa kitaṟa ki okehuya Ngano, njisungusie ho kitaṟa kedasia Ruwa kundu naluleheṟe, nawute ho ngataṟa ii iwode wandu.”

²² Kyasia Arauna kawia Mangi Dawidi, “Duo kindo kyose okunda. A itsi na mmbe tsedasa. Duo na shindo shose lokehuo nasho Ngano na mbau tsose tsa ngada tsa mapung'a hako noatse natso modo kitaṟenyi kedasia kya Ruwa.

²³ Ngakuinenga ishi shose Mangi. Njiterewa Ruwa naambilie kidaso kyapfo necha.”

²⁴ Nahong'u Mangi kawia Arauna, “Ote! Njechishiambilia njilakutaa kindopfo. Njechishihuṟa kopfo, cha kipfa njikundi iinenga Ruwa oko kidaso kekoṟa njilakiṟundiepfo.” Kyasia Dawidi kahuṟa kiwanja kilya kehuya Ngano na mapung'a halya, kataa heleri shekeli makumi hatanu (50).

²⁵ Dawidi kasungusia Ruwa kitaṟa kedasia handu halya, shidaso sherumatsa na shidaso sha ofoṟo. Kyasia, Ruwa kaambia shiterewo shilya kipfa kya oruka, na itirimisha ngataṟa iya iwewode oruka lulya lo Israeli.