2SAMWELI 23 - Bibilia Kui Mdedie fo Kimochi

Madedo hefurumia ha Dawidi

¹ Iha nyi madedo hefurumia ha Dawidi; Nyi ndumi ya Dawidi mana o Yese; nyi ndumi ya mndu awemnenge wunene nyi Ruwa. Ruwa o Yakobo kashimbuo Dawidi nawe Mangi, na wandu wa Israeli wakachihiyo iimba shiimbo shake.

² “Mumuyo fo Ruwa fukadeda kiidi kyako, madedo hake hakeri oliminyi loko.

³ Ruwa o Israel adeda; iho lya iṟaṟa lya Israeli likadeda na inyi na ihamba; “Kuicha Mangi echichilia wandu kisumuhanyi; nechichilia wandu kechiowuo Ruwa.

⁴ Nechiwaa cha mbaṟi fosomoka ngamenyi kulawode mapuchi, nechiwa cha mbaṟi fokeoṟisha, mara mvuo ikameida.

⁵ Nyi kudo Ruwa echiwikia ona wa oshari loko, Ruwa nyi nalewika kyasa kya mlungana na inyi; kyasa ki nyi kya mlungana kilewa ifunjo ma ihaluka. Kiheri kyose nechinjiringa na injiinenga wuwinzi.

⁶ Kyaindi walya walakundi Ruwa, wakeri cha msha injiole; kuwode mndu echiidima iira ko mawoko hawulya pfo;

⁷ Kiwaṟi mndu naire ko menya ang'u munyi fo ipfumu. Na yechikoṟo ko modo isie piu.”

Marina ha mbahanyi tsa Dawidi

⁸ Aiha marina ha wandu wanene wa mbahanyi wa Dawidi: o kuwoka nyi Yosheb-bashebethi, Mtakmoni, nawekeri msongoru o walya waṟaṟu. Ichu nalewaha wandu mahana nyanya (800) na ipfumu lyake kiidi kya shida imu.

⁹ Ichu naleitumo nyi Eleazari mana o Dodo, o oshari loko Mwahohi. Ichu nalehoṟoka na Dawidi wakakapana na Wafilisti kiheri Waisraeli walya wengi waledicha shida.

¹⁰ Nalekapana na Wafilisti walya kechiwawaha mṟasa owoko loke lukalehela lulaidime se iwada ipfumu, na Ruwa kamtarama kamnenga wuwinzi. Waisraeli walya wawedichie walewuya shida yamsia icha isanyia nzohoṟa tsa Wafilisti walya walewoho.

¹¹ Mnene o kaṟaṟu nyi Shama mana o Agee, Mharari. Kyasia Waisraeli wakadicha Wafilisti wawekuwumbie kulya Lewi handu kuwekudeme dengu tsifoi.

¹² Kyaindi Shama aledichapfo; nalehoṟoka kechikapanyia dema lilya na Ruwa kamtarama kamnenga uwinzi wung'anyi.

¹³ Kyasia kiheri kya shilimu wanene waṟaṟu iwuka wanene wang'anyi makumi haṟaṟu wa mbahanyi ya Israeli, wakahenda isahia Dawidi akeri opangenyi lo Adulamu. Kiheri kilya Wafilisti wawewikie ihema kulya mfonyi fo Refaimu.

¹⁴ Kiheri kilya mbahanyi tsa Wafilisti wawekeri kulya mṟinyi fo Bethlehemu; na Dawidi nawekeri omombonyi loke.

¹⁵ Kyasia Dawidi kahamba ko wuangari wung'anyi, “Njiwechihiyo kokoya ngawona mndu monjiendie mṟinga fonyo fuwuka kulya iṟumbuchunyi lya Bethlehemu likeri hafui na mongo fung'anyi fo mṟi.”

¹⁶ Kyasia wanene walya waṟaṟu wa mbahanyi ya Israeli wakaida kiidi kya kiṟaṟo kya mbahanyi tsa Wafilisti, wakaendie Dawidi mṟinga fuwuka iṟumbuchunyi lilya liwekeri kufui na mongo fo mṟi fo Bethlehemu, kyaindi Dawidi alakinyo mṟinga fulya, kafupusia wanda cha kidaso ko Ruwa;

¹⁷ kahamba, “Ote Ruwa oko, kinjiwaṟi njinyo mṟinga fupfo. Nyi kimu na inyo samu ya wandu walya walewika moo yawo ngataṟeni kundu waende mṟingafu.” Kyasia Dawidi alakinyo mṟinga fulya.

¹⁸ Abishai manomayo o Yoabu, mana o Seruya nawei mnene o wanene walya makumi haṟaṟu. O nalekapana na wandu mahana haṟaṟu (300) na iwawaha wose na ipfumu lyake, iki kiletewa rina lyake likang'ana cha lya wanene walya waṟaṟu.

¹⁹ Kyaindi alawe umoho o wanene walya waṟaṟu. Kyasia, kawa mnene owo kyaindi alawode kiṟumi kya walya waṟaṟu.

²⁰ Na Benaya mana o Yehoyada, mskari awukie Kabzeeli, mkari awutie ṟiho tsing'anyi. Nalewaha wandu wawi wang'anyi cha mando, wawukie Moabu. Kiheri kingi kasokia mreshenyi kochirendia meṟa, kawadana na miso kaiwaha.

²¹ Kiheri kingi awode ndichi, kakapana na Mmisri umu awewode ipfumu; kasoka Mmisri ulya ipfumu lyake kambaha nalyo.

²² Shindo shi nyisho Benaya mana o Yehoyada alewuta shikang'anyisha rina lyake cha lya ngohoda tsilya tsiṟaṟu.

²³ Benaya nawewode kiṟumi king'anyi hamu na wanene walya makumi haṟaṟu, kyaindi alekoya kiṟumi kilya kya ngohoda tsilya tsiṟaṟu pfo. Dawidi kamsambuṟa nawe mringi oke.

²⁴ Asaheli, manomayo o Yoabu, nawekeri umuho o wanene walya makumi haṟaṟu wa Israeli. Marina ha walya wengi nyi iha:- Elhanani mana o Dodo o Bethlehemu;

²⁵ Shama, awukie Harodi; Elika awukie Harodi;

²⁶ Helesi awukie Palti. Ira mana o Ikeshi, awukie Tekoa;

²⁷ Abiezeri awukie Anathothi; Mebunai awukie Hushathi;

²⁸ Salmoni awukie Ahohi; Maharai awukie Mnetofathi;

²⁹ Helebu mana o Baana awukie Netofathi; Itai mana o Ribai awukie Gibea, o oshari lo Benyamini.

³⁰ Benaya awukie Pirathoni; Hidai awukie Sokenyi tsa Gaashi;

³¹ Abialboni awukie Arbathi; Azmawethi awukie Bahurimu;

³² Eliaba awukie Shaalboni; Wana wa Yasheni; Yonathani;

³³ Shama awukie Harari; Ahimu mana o Sharaṟi, awukie Harari;

³⁴ Elifeleti mana o Ahasbai awukie Maaka; Eliamu mana o Ahithofeli awukie Giloni;

³⁵ Hezrawi awukie Karmeli; Paarai awukie Arba;

³⁶ Igali mana o Nathani awukie Soba; Bani awukie Gadi;

³⁷ Seleki awukie Anoni; Naharai awukie Beerothi awekekudika shisha sha shida sha Yoabu mana o Seruya,

³⁸ Ira na Garebu wawukie Ithra;

³⁹ na Uria awukie Hiti. Iwa wose wawei ngohoda makumi haṟaṟu na mfungade.