2SAMWELI 22 - Bibilia Kui Mdedie fo Kimochi

Kiimbo kya Dawidi kya wuwinzi

¹ Kyasia, Ruwa kaashuo Dawidi iwuka mawokonyi ha wakituwa wake wose na Sauli, Dawidi kaimmbia Ruwa kiimbo;

² kahamba, “Ruwa nyi ngaṟahamba lyako, omombo loko na mkiṟa oko;

³ Ruwa nyi iho lya iṟaṟa lyako, njechimdichilia o; Ruwa nyi ngao yako, na pfinya ya okiṟo loko, nyi omombo loko na kidichilio kyako. Mkiṟa oko; nokenjikiṟa kiidi kya wandu wanesi.

⁴ Njikulaha iyo Mndumii uwaṟi uichiko nonjitarame, na injiashuo mawokonyi ha watuuri wako wose.

⁵ “Masinano ha opfu halenjiṟingichia, mfu fo eka lya mbicho fukanjipaṟikia;

⁶ Njileṟingichio, nyi shihowo sha wanda-shi na opfu shikanjipfunga, mdeho ya opfu ikanjihoya.

⁷ Kyaindi wukiwenyi woko ngalaha Ruwa; Nao akeri hekalunyi lyake kaicho ṟu lyako, Kifihiṟo kyako kikashika madunyi hake.

⁸ “Wuyana wose wukadedema na ikisokiso; otende lo Ruwehu lukapaṟika, kipfa kya nyashi ya Ruwa.

⁹ Mtsu fukaduka mbuonyi tsake; olewo lo modo fo makaa, furumatsa fukawuka dumbunyi lyake.

¹⁰ Kaaramitsa Ruwehu, kasokia wanda, mtima fo mema fuwekeri wanda ya madende hake.

¹¹ Kadamilia ikerubi na irunduka, kawono ai makungonyi ha otanu.

¹² Kakuringichia mema; na mapuchi hang'anyi ha ruwehu, na ipalyipalyi ling'anyi lya mṟinga.

¹³ Mbawa tsikawaṟuka osehu loke, na ngela yake ikaende sa wuyanenyi.

¹⁴ Ruwa kaṟuṟuma kulya ruwehu, na ṟu lya mangi ya wose likadeda.

¹⁵ Kadika mfi yake ya mbaṟuko, na wakituwa wake wose wakarahanyika.

¹⁶ Ruwa kawatoloma, ko owira luwuka mbuonyi tsake, na ipalyipalyi likakuhawa kawi, na meda yayo na njotende tsa wuyana tsikawono.

¹⁷ “Ruwa ai huye kanjikiṟa, kanjikuruo na owoko loke kanjiwuta mṟingenyi.

¹⁸ Kanjikiṟa iwuka mawokonyi ha watuuri wako wang'anyi, walya wawenjisuo; na walya wawewode pfinya tsing'anyi mnu kota inyi.

¹⁹ Walenjihoya kiheri kya kiwi kyako, kyaindi Ruwa kanjikiṟa.

²⁰ Kanjiende na handu kuwode nanga na oringo. Kanjikiṟa kipfa kya ili awemchihie kyako.

²¹ “Ruwa kanjiinenga mboṟa kipfa kya wuhendeli woko; Kanjiinenga mboṟa kipfa kya wusumuhanyi woko.

²² Kipfa njiweichumia chandu Ruwa awekundi, ma njilekuletsa na Ruwa oko, kipfa kya unyamaṟi pfo.

²³ Njiweichi mawawaso hake hose, ngawehaindia hose.

²⁴ Njiwewode mti osehu lokepfo, njilekuṟisa na wunyamaṟi.

²⁵ Nkyo kimatewe Ruwa anjiwutie ṟiho tsing'anyi tsidi. Nawonyi njikeri mwele.

²⁶ “Iyo nokesaṟia walya wekesaṟia wengi, nokeloṟa wuwicho wopfo ko walya wawode mti.

²⁷ Nokeloṟa wuharami ko walya wai waharami kui mrima, kyaindi nokerumatsa wanyamaṟi.

²⁸ Nokekiṟa iwo wai wahoo, na iombotsa walya wekushela.

²⁹ Ee, Ruwa iyo nyi saa yako, na Ruwa oko, nokeende ngela memenyi foko.

³⁰ Ko pfinya tsapfo njechirumatsa watuuri wako; na kui pfinya tsapfo njechiidima irunduka omombo.

³¹ Shose Ruwa ekewuta shisumuhanyi; madedo ha Ruwa nyi halohi. Ruwa nyi ekeringa walya wose wekemdichilia.

³² “Kuwode Ruwa ungi sile Mndumii-Ruwa-pfo. Ma kuwode mkiṟa ungi cha Mndumii-Ruwa-pfo.

³³ Ruwa nyio kidichilio kyako kitumhari, nalenjiloṟa njia iheṟemtsu ngakia.

³⁴ Nekewanza madende hako hakawa cha ha Sariha; ngachumia njilawode madima mtsitsionyi fo mafumvu.

³⁵ Nekenjilosha ikapana shida, na injinenga pfinya yekuruo wuda wo menya ya aṟeṟa.

³⁶ Omenjiinenga kiringa kya okiṟo, na ko pfinya tsapfo, omenjisumba wunene wung'anyi.

³⁷ Nulelandaṟa handu madende hako hechuma, kundu njilarendie njechichumia.

³⁸ Njilewingia watwari wako na iwarumatsa, ma njilaambuye nduma mṟasa wasia wose.

³⁹ Njilewarumatsa wose, makulawadeho ma umu echiidima ihoṟokase; waleomboka wose wanda ya madende hako.

⁴⁰ Cha kipfa nyi iyo ulenjiinenga pfinya yekapana shidenyi; nyi iyo Ruwa uletewa waturi wako wakasoṟowia wanda yako.

⁴¹ Nyi iyo uletewa watoaṟi wako wakadicha, na inyi ngarumatsa walya wawenjisuo.

⁴² Wakawalia mndu mowatarama kyaindi walawone mowakiṟa, wakafihiṟia Ruwa, kyaindi o nalakunde iicho ṟu lyawo.

⁴³ Ngawahuo mṟasa wakawa cha kiluli, ngawapeṟehetsa na iwachumachuma cha odoko lo njienyi.

⁴⁴ “Iyo konjikiṟa na shida ya waturi wako, konjisumba ngawa mnene o njoruka tsose; wandu wafoi njilawewaichi wakanjiindia.

⁴⁵ Wandu wa mkambo wakanjicheya wakunyiiṟie; kiheri waleicho mbonyi tsa pfinya tsako wakanjiindia.

⁴⁶ Wandu wa mkambo wakaowuo, wakawuka omombonyi lowo wechidedema.

⁴⁷ “Mndumii-Ruwa nai na moo. Naichiko-o ai iṟaṟa lyako, naṟumisho Ruwa oko, na Iṟaṟa lya okiṟo loko.

⁴⁸ Nyio alenjitaya kiṟache na itoṟisha wamkambo wanda yako.

⁴⁹ Nyio alenjiashuo mawokonyi ha waturi wako, nyi iyo ulenjinenga kiṟumi huye ya waturi wako, nyi iyo ulenjinenga mkuachie iwuka mawokonyi ha wandu wa mkika.

⁵⁰ “Kipfa kya ikyo, njechikuichika, Mndumii masangenyi hose, na iimba shiimbo sheṟumisha rina lyapfo.

⁵¹ Nekeinenga mangi oke wuwinzi wung'anyi, na iloṟa ikunda ling'anyi lilechisia ko washimbuo wake, ko Dawidi, na wa oshari loko mlungana.”