2SAMWELI 21 - Bibilia Kui Mdedie fo Kimochi

Iwoho lya wana wa Sauli

¹ Kyasia kiheri kya wumangi wo Dawidi kulechapfo njaa ya maka iṟaṟu na kyenga. Kyasia Dawidi katerewa Ruwa mnu kundu nammbie nkiki kyatewa njaa iya. Kyasia, Ruwa kambia, “Ngapo ii yamuchea kipfa ili Sauli na oshari loke walewaha Wagibeoni.”

² Kyasia, Mangi Dawidi kalaha Wagibeoni wose. Wagibeoni wawei wandu wa Israeli-pfo; kyaindi nyi wawei wandu wawetsuhee wa oshari lo Waamori. Wandu wa Israeli wawewikie kyasa ke, wechiwaha Wagibeoni walyapfo, kyaindi Sauli kakunda iwawaha wose kipfa kya wana wa Israeli na Yuda.

³ Kyasia, Dawidi kadeda na Wagibeoni walya kawawesa, “Nyi kiki njechimuwutia kiwute oseso lu lui huya yadu, muidime iluterewia ko Ruwa naluwikie mboṟa?”

⁴ Kyasia Wagibeoni walya wakamhaluo wakambia, “Mondu fodu na Sauli na mba yake fochiidima ianduyo nyi fesa ang'u sahabu pfo; ma lukundi iwona iwoho lya wandu wa Israeli kipfa ketaa kiṟachepfo.” Kyasia, Mangi Dawidi kawawesase,

⁵ “Nawo wakamhaluo wakambia, ‘Sauli naweteṟie iluwaha na ilumarisa wose kulatsuhae ho ma mndu umu odu orukenyi lo Israeli.

⁶ Luinengie wana wa kisoṟo mfungade wa Sauli luwamase oshangunyi lo Mndumii-Ruwa kulya Gibeoni ifumvunyi lya Ruwa.’” Kyasia Dawidi kawahaluo kawawia, “Njechimuinenga wanduwo.”

⁷ Dawidi alewainengia Mefi-boshethi mana o Yonathani-pfo, kipfa kya kyasa Dawidi awewikie na Yonathani.

⁸ Kyaindi Dawidi kawainengia Armoni na Mefiboshethi sa Sauli awefeye na Rispa ai mana o Ahiya. Kawainenga na wana watanu wa kisoṟo wa Mikali, mana o Sauli awefeye na Adrieli mana o Barzilai Mmeholathi.

⁹ Kyasia, Wagibeoni wakawamasa na iwawaha wanawo wose mfungade wakisoṟo ifumvunyi, oshangunyi lo Ruwa. Wose mfungade walepfa mawookionyi hesambuo shilimu sha shairi.

¹⁰ Kyaindi, Rispa mana o Aya kaṟaa nguwo ya ikunyia ngaṟahambenyi na ikaa-ho kiheri kyose kesambuo shilimu kechiringa malehe halatahache mbihu iya ya wandu walya wapfie mfiri na iringa mando ha ngeṟenyi halalye mbihu iya kio.

¹¹ Dawidi kaicho kilya Rispa suria lya Sauli alewuta. Kyasia lya ifurumia, Ruwa kaidikia kiterewo kya Dawidi, katirimisha ngataṟa lya ya njaa, kaende mboṟa ya shelya.

¹² Dawidi kahenda ionduo mafuo ha Sauli na mafuo ha mana oke o Yonathani iwuka ko wandu wa Yabesh-gileadi. Wanduwo waweiiwie kidembonyi kya Beth-shani, kundu Wafilisti wawemasie Sauli na Yonathani, mkonu fulya Wafilisti walewaha Sauli fumvunyi lya Gilboa.

¹³ Kyasia Dawidi kawihiṟa mafuo ha Sauli na Yonathani mana oke kuwuka kulya; na numa kasanyia mafuo ha wanake walya mfungade sa walewoho koimaso.

¹⁴ Kyasia, Dawidi kaachikia ke mafuo halya ha Sauli na Yonathani, haṟiko kulya Zela orukenyi lo Benyamini, kipfunyi kya ndeye o Rishi.

Shida ya Warefai na Wafilisti

¹⁵ Kyasia, Wafilisti wakakapana shida na Waisraeli. Dawidi na wandu wake wa shida wakahenda ikapana na Wafilisti walya; kyaindi Dawidi kaṟengeṟa mnu mkonu fulya.

¹⁶ Ishbi-benobu, awei umu ho o Warefai nawekudikie ipfumu lya mdo fushikie shilo shiṟaṟu na kyenga, na iṟaa oshu lung'anyi luhya, kahamba nechiwaha Dawidi.

¹⁷ Kyaindi, Abishai mana o Seruya, kahenda itarama Dawidi. Kawaha Mfilisti ulya. Kyasia wandu walya wa Dawidi wakawikia Dawidi kyasa wakahamba, “Ochihenda se shidenyi naso pfo, kundu saa ya wumangi wo Israeli ilarumisho.”

¹⁸ Kyasia, kukawase shida na Wafilisti alya Gobu. Sibekai, Mhushathi, kawaha Safu mndu awekeri mndu umuho o wa oshari lo Warefai.

¹⁹ Kukawuka se shida ingi na Wafilisti kulya Gobu. Elhanani mana o Yaareo-regimu, Mbethlehemu kawaha Goliathi Mgiti, mndu sa munyi fo ipfumu lyake fuweng'anyi na ilemia cha ngongo yepfumia nguwo.

²⁰ Kukachase shida ya Wafilisti na Waisraeli alya Gathi. Mrefai umu awewode shimnyo shiṟandaṟu ko orio owoko loke, na shimnyo shiṟandaṟu ko orio odende loke,

²¹ kawoho nyi Yonathani mana o Shimei manomae o Dawidi kipfa kya ipirisikia Waisraeli.

²² Iwa wose wana walewoho nyi mbahanyi tsa Dawidi, wawekeri wa oshari lo Warefai wa Gathi.